Zabūr 66

allāh kī mojizānā madad kī tārīf

¹mūsīqī ke rāhanumā ke liye. zabūr. gīt.

ai sārī zamīn, ḵẖushī ke nāre lagā kar allāh kī madahsarāī kar!

²us ke nām ke jalāl kī tamjīd karo, us kī sitāish urūj tak le jāo!

³allāh se kaho, “tere kām kitne purjalāl haiṅ. terī baṛī qudrat ke sāmne tere dushman dabak kar terī ḵẖushāmad karne lagte haiṅ.

⁴tamām duniyā tujhe sijdā kare! vah terī tārīf meṅ gīt gāe, tere nām kī sitāish kare.” (silāh)

⁵āo, allāh ke kām dekho! ādamzād kī ḵẖātir us ne kitne purjalāl mojize kie haiṅ!

⁶us ne samundar ko ḵẖushk zamīn meṅ badal diyā. jahāṅ pahale pānī kā tez bahāo thā vahāṅ se log paidal hī guzre. chunāṅche āo, ham us kī ḵẖushī manāeṅ.

⁷apnī qudrat se vah abad tak hukūmat kartā hai. us kī āṅkheṅ qaumoṅ par lagī rahatī haiṅ tāki sarkash us ke ḵẖilāf na uṭheṅ. (silāh)

⁸ai ummato, hamāre ḵẖudā kī hamd karo. us kī sitāish dūr tak sunāī de.

⁹kyūṅki vah hamārī zindagī qāim rakhtā, hamāre pāoṅ ko ḍagmagāne nahīṅ detā.

¹⁰kyūṅki ai allāh, tū ne hameṅ āzmāyā. jis tarah chāṅdī ko pighlā kar sāf kiyā jātā hai usī tarah tū ne hameṅ pāk-sāf kar diyā hai.

¹¹tū ne hameṅ jāl meṅ phaṅsā diyā, hamārī kamar par aziyatanāk bojh ḍāl diyā.

¹²tū ne logoṅ ke rathoṅ ko hamāre saroṅ par se guzarne diyā, aur ham āg aur pānī kī zad meṅ ā gae. lekin phir tū ne hameṅ musībat se nikāl kar farāvānī kī jagah pahuṅchāyā.

¹³maiṅ bhasm hone vālī qurbāniyāṅ le kar tere ghar meṅ āūṅgā aur tere huzūr apnī mannateṅ pūrī karūṅgā,

¹⁴vah mannateṅ jo mere muṅh ne musībat ke vaqt mānī thīṅ.

¹⁵bhasm hone vālī qurbānī ke taur par maiṅ tujhe moṭī-tāzī bheṛeṅ aur meṅḍhoṅ kā dhuāṅ pesh karūṅgā, sāth sāth bail aur bakre bhī chaṛhāūṅgā. (silāh)

¹⁶ai allāh kā ḵẖauf mānne vālo, āo aur suno! jo kuchh allāh ne merī jān ke liye kiyā vah tumheṅ sunāūṅgā.

¹⁷maiṅ ne apne muṅh se use pukārā, lekin merī zabān us kī tārīf karne ke liye tayyār thī.

¹⁸agar maiṅ dil meṅ gunāh kī parvarish kartā to rabb merī na suntā.

¹⁹lekin yaqīnan rabb ne merī sunī, us ne merī iltijā par tavajjuh dī.

²⁰allāh kī hamd ho, jis ne na merī duā radd kī, na apnī shafqat mujh se bāz rakhī.