Zabūr 67
tamām qaumeṅ allāh kī tārīf kareṅ
1zabūr. tārdār sāzoṅ ke sāth gānā hai. mūsīqī ke rāhanumā ke liye.
allāh ham par meharbānī kare aur hameṅ barkat de. vah apne chihare kā nūr ham par chamkāe (silāh)
2tāki zamīn par terī rāh aur tamām qaumoṅ meṅ terī najāt mālūm ho jāe.
3ai allāh, qaumeṅ terī sitāish kareṅ, tamām qaumeṅ terī sitāish kareṅ.
4ummateṅ shādmān ho kar ḵẖushī ke nāre lagāeṅ, kyūṅki tū insāf se qaumoṅ kī adālat karegā aur zamīn par ummatoṅ kī qiyādat karegā. (silāh)
5ai allāh, qaumeṅ terī sitāish kareṅ, tamām qaumeṅ terī sitāish kareṅ.
6zamīn apnī fasleṅ detī hai. allāh hamārā ḵẖudā hameṅ barkat de!
7allāh hameṅ barkat de, aur duniyā kī intihāeṅ sab us kā ḵẖauf māneṅ.