Zabūr 69
āzmāish se najāt kī duā
1dāūd kā zabūr. tarz : sosan ke phūl. mūsīqī ke rāhanumā ke liye.
ai allāh, mujhe bachā! kyūṅki pānī mere gale tak pahuṅch gayā hai.
2maiṅ gaharī daldal meṅ dhaṅs gayā hūṅ, kahīṅ pāoṅ jamāne kī jagah nahīṅ miltī. maiṅ pānī kī gaharāiyoṅ meṅ ā gayā hūṅ, sailāb mujh par ġālib ā gayā hai.
3maiṅ chillāte chillāte thak gayā hūṅ. merā galā baiṭh gayā hai. apne ḵẖudā kā intizār karte karte merī āṅkheṅ dhundalā gaīṅ.
4jo bilāvajah mujh se kīnā rakhte haiṅ vah mere sar ke bāloṅ se ziyādā haiṅ, jo besabab mere dushman haiṅ aur mujhe tabāh karnā chāhate haiṅ vah tāqatvar haiṅ. jo kuchh maiṅ ne nahīṅ lūṭā use mujh se talab kiyā jātā hai.
5ai allāh, tū merī hamāqat se vāqif hai, merā qusūr tujh se poshīdā nahīṅ hai.
6ai qādir-e-mutlaq rabb-ul-afwāj, jo tere intizār meṅ rahate haiṅ vah mere bāis sharmindā na hoṅ. ai isrāīl ke ḵẖudā, mere bāis tere tālib kī rusvāī na ho.
7kyūṅki terī ḵẖātir maiṅ sharmindagī bardāsht kar rahā hūṅ, terī ḵẖātir merā chiharā sharmasār hī rahatā hai.
8maiṅ apne sage bhāiyoṅ ke nazdīk ajnabī aur apnī māṅ ke beṭoṅ ke nazdīk pardesī ban gayā hūṅ.
9kyūṅki tere ghar kī ġairat mujhe khā gaī hai, jo tujhe gāliyāṅ dete haiṅ un kī gāliyāṅ mujh par ā gaī haiṅ.
10jab maiṅ rozā rakh kar rotā thā to log merā mazāq uṛāte the.
11jab mātmī libās pahane phirtā thā to un ke liye ibrat’aṅgez misāl ban gayā.
12jo buzurg shahar ke darvāze par baiṭhe haiṅ vah mere bāre meṅ gappeṅ hāṅkte haiṅ. sharābī mujhe apne tanz bhare gītoṅ kā nishānā banāte haiṅ.
13lekin ai rabb, merī tujh se duā hai ki maiṅ tujhe dubārā manzūr ho jāūṅ. ai allāh, apnī azīm shafqat ke mutābiq merī sun, apnī yaqīnī najāt ke mutābiq mujhe bachā.
14mujhe daldal se nikāl tāki ġarq na ho jāūṅ. mujhe un se chhuṭkārā de jo mujh se nafrat karte haiṅ. pānī kī gaharāiyoṅ se mujhe bachā.
15sailāb mujh par ġālib na āe, samundar kī gaharāī mujhe haṛap na kar le, gaṛhā mere ūpar apnā muṅh band na kar le.
16ai rabb, merī sun, kyūṅki terī shafqat bhalī hai. apne azīm raham ke mutābiq merī taraf rujū kar.
17apnā chiharā apne ḵẖādim se chhupāe na rakh, kyūṅki maiṅ musībat meṅ hūṅ. jaldī se merī sun!
18qarīb ā kar merī jān kā fidyā de, mere dushmanoṅ ke sabab se ivzānā de kar mujhe chhuṛā.
19tū merī rusvāī, merī sharmindagī aur tazlīl se vāqif hai. terī āṅkheṅ mere tamām dushmanoṅ par lagī rahatī haiṅ.
20un ke tānoṅ se merā dil ṭūṭ gayā hai, maiṅ bīmār paṛ gayā hūṅ. maiṅ hamdardī ke intizār meṅ rahā, lekin befāidā. maiṅ ne tavaqqo kī ki koī mujhe dilāsā de, lekin ek bhī na milā.
21unhoṅ ne merī ḵẖurāk meṅ kaṛvā zahar milāyā, mujhe sirkā pilāyā jab piyāsā thā.
22un kī mez un ke liye phaṅdā aur un ke sāthiyoṅ ke liye jāl ban jāe.
23un kī āṅkheṅ tārīk ho jāeṅ tāki vah dekh na sakeṅ. un kī kamar hameshā tak ḍagmagātī rahe.
24apnā pūrā ġussā un par utār, terā saḵẖt ġazab un par ā paṛe.
25un kī rihāishgāh sunsān ho jāe aur koī un ke ḵẖaimoṅ meṅ ābād na ho,
26kyūṅki jise tū hī ne sazā dī use vah satāte haiṅ, jise tū hī ne zaḵẖmī kiyā us kā dukh dūsroṅ ko sunā kar ḵẖush hote haiṅ.
27un ke qusūr kā saḵẖtī se hisāb-kitāb kar, vah tere sāmne rāstbāz na ṭhahareṅ.
28unheṅ kitāb-e-hayāt se miṭāyā jāe, un kā nām rāstbāzoṅ kī faharist meṅ darj na ho.
29hāy, maiṅ musībat meṅ phaṅsā huā hūṅ, mujhe bahut dard hai. ai allāh, terī najāt mujhe mahfūz rakhe.
30maiṅ allāh ke nām kī madahsarāī karūṅgā, shukrguzārī se us kī tāzīm karūṅgā.
31yah rabb ko bail yā sīṅg aur khur rakhne vāle sāṅḍ se kahīṅ ziyādā pasand āegā.
32halīm allāh kā kām dekh kar ḵẖush ho jāeṅge. ai allāh ke tālibo, tasallī pāo!
33kyūṅki rabb muhtājoṅ kī suntā aur apne qaidiyoṅ ko haqīr nahīṅ jāntā.
34āsmān-o-zamīn us kī tamjīd kareṅ, samundar aur jo kuchh us meṅ harkat kartā hai us kī sitāish kare.
35kyūṅki allāh siyyūn ko najāt de kar yahūdāh ke shaharoṅ ko tāmīr karegā, aur us ke ḵẖādim un par qabzā karke un meṅ ābād ho jāeṅge.
36un kī aulād mulk ko mīrās meṅ pāegī, aur us ke nām se muhabbat rakhne vāle us meṅ base raheṅge.