Zabūr 71

hifāzat ke liye duā

¹ai rabb, maiṅ ne tujh meṅ panāh lī hai. mujhe kabhī sharmindā na hone de.

²apnī rāstī se mujhe bachā kar chhuṭkārā de. apnā kān merī taraf jhukā kar mujhe najāt de.

³mere liye chaṭān par mahfūz ghar ho jis meṅ maiṅ har vaqt panāh le sakūṅ. tū ne farmāyā hai ki mujhe najāt degā, kyūṅki tū hī merī chaṭān aur merā qil’ā hai.

⁴ai mere ḵẖudā, mujhe bedīn ke hāth se bachā, us ke qabze se jo beinsāf aur zālim hai.

⁵kyūṅki tū hī merī ummīd hai. ai rabb qādir-e-mutlaq, tū merī javānī hī se merā bharosā rahā hai.

⁶paidāish se hī maiṅ ne tujh par takiyā kiyā hai, māṅ ke peṭ se tū ne mujhe saṁbhālā hai. maiṅ hameshā terī hamd-o-sanā karūṅgā.

⁷bahutoṅ ke nazdīk maiṅ badashugūnī hūṅ, lekin tū merī mazbūt panāhgāh hai.

⁸din bhar merā muṅh terī tamjīd aur tāzīm se labrez rahatā hai.

⁹buṛhāpe meṅ mujhe radd na kar, tāqat ke ḵẖatm hone par mujhe tark na kar.

¹⁰kyūṅki mere dushman mere bāre meṅ bāteṅ kar rahe haiṅ, jo merī jān kī tāk lagāe baiṭhe haiṅ vah ek dūsre se salāh-mashvrā kar rahe haiṅ.

¹¹vah kahate haiṅ, “allāh ne use tark kar diyā hai. us ke pīchhe paṛ kar use pakṛo, kyūṅki koī nahīṅ jo use bachāe.”

¹²ai allāh, mujh se dūr na ho. ai mere ḵẖudā, merī madad karne meṅ jaldī kar.

¹³mere harīf sharmindā ho kar fanā ho jāeṅ, jo mujhe nuqsān pahuṅchāne ke darpai haiṅ vah lān-tān aur rusvāī tale dab jāeṅ.

¹⁴lekin maiṅ hameshā tere intizār meṅ rahūṅgā, hameshā terī sitāish kartā rahūṅgā.

¹⁵merā muṅh terī rāstī sunātā rahegā, sārā din tere najātabaḵẖsh kāmoṅ kā zikr kartā rahegā, go maiṅ un kī pūrī tādād gin bhī nahīṅ saktā.

¹⁶maiṅ rabb qādir-e-mutlaq ke azīm kām sunāte hue āūṅgā, maiṅ terī, sirf terī hī rāstī yād karūṅgā.

¹⁷ai allāh, tū merī javānī se mujhe tālīm detā rahā hai, aur āj tak maiṅ tere mojizāt kā elān kartā āyā hūṅ.

¹⁸ai allāh, ḵẖwāh maiṅ būṛhā ho jāūṅ aur mere bāl safed ho jāeṅ mujhe tark na kar jab tak maiṅ āne vālī pusht ke tamām logoṅ ko terī quvvat aur qudrat ke bāre meṅ batā na lūṅ.

¹⁹ai allāh, terī rāstī āsmān se bāteṅ kartī hai. ai allāh, tujh jaisā kaun hai jis ne itne azīm kām kie haiṅ?

²⁰tū ne mujhe mut’addid talḵẖ tajriboṅ meṅ se guzarne diyā hai, lekin tū mujhe dubārā zindā bhī karegā, tū mujhe zamīn kī gaharāiyoṅ meṅ se vāpas lāegā.

²¹merā rutbā baṛhā de, mujhe dubārā tasallī de.

²²ai mere ḵẖudā, maiṅ sitār bajā kar terī sitāish aur terī vafādārī kī tamjīd karūṅgā. ai isrāīl ke quddūs, maiṅ sarod bajā kar terī tārīf meṅ gīt gāūṅgā.

²³jab maiṅ terī madahsarāī karūṅgā to mere hoṅṭ ḵẖushī ke nāre lagāeṅge, aur merī jān jise tū ne fidyā de kar chhuṛāyā hai shādiyānā bajāygī.

²⁴merī zabān bhī din bhar terī rāstī bayān karegī, kyūṅki jo mujhe nuqsān pahuṅchānā chāhate the vah sharmasār aur rusvā ho gae haiṅ.