Zabūr 72
salāmatī kā bādshāh
1sulemān kā zabūr.
ai allāh, bādshāh ko apnā insāf atā kar, bādshāh ke beṭe ko apnī rāstī baḵẖsh de
2tāki vah rāstī se terī qaum aur insāf se tere musībatazadoṅ kī adālat kare.
3pahāṛ qaum ko salāmatī aur pahāṛiyāṅ rāstī pahuṅchāeṅ.
4vah qaum ke musībatazadoṅ kā insāf kare aur muhtājoṅ kī madad karke zālimoṅ ko kuchal de.
5tab log pusht-dar-pusht terā ḵẖauf māneṅge jab tak sūraj chamke aur chāṅd raushnī de.
6vah kaṭī huī ghās ke khet par barasne vālī bārish kī tarah utar āe, zamīn ko tar karne vālī bauchhāṛoṅ kī tarah nāzil ho jāe.
7us ke daur-e-hukūmat meṅ rāstbāz phale phūlegā, aur jab tak chāṅd nest na ho jāe salāmatī kā ġalbā hogā.
8vah ek samundar se dūsre samundar tak aur daryā-e-furāt se duniyā kī intihā tak hukūmat kare.
9registān ke bāshinde us ke sāmne jhuk jāeṅ, us ke dushman ḵẖāk chāṭeṅ.
10tarsīs aur sāhilī ilāqoṅ ke bādshāh use ḵẖarāj pahuṅchāeṅ, sabā aur sibā use bāj pesh kareṅ.
11tamām bādshāh use sijdā kareṅ, sab aqvām us kī ḵẖidmat kareṅ.
12kyūṅki jo zarūratmand madad ke liye pukāre use vah chhuṭkārā degā, jo musībat meṅ hai aur jis kī madad koī nahīṅ kartā use vah rihāī degā.
13vah pastahāloṅ aur ġarīboṅ par taras khāegā, muhtājoṅ kī jān ko bachāegā.
14vah ivzānā de kar unheṅ zulm-o-tashaddud se chhuṛāegā, kyūṅki un kā ḵẖūn us kī nazar meṅ qīmtī hai.
15bādshāh zindābād! sabā kā sonā use diyā jāe. log hameshā us ke liye duā kareṅ, din bhar us ke liye barkat chāheṅ.
16mulk meṅ anāj kī kasrat ho, pahāṛoṅ kī choṭiyoṅ par bhī us kī fasleṅ lahalahāeṅ. us kā phal lubnān ke phal jaisā umdā ho, shaharoṅ ke bāshinde hariyālī kī tarah phaleṅ phūleṅ.
17bādshāh kā nām abad tak qāim rahe, jab tak sūraj chamke us kā nām phale phūle. tamām aqvām us se barkat pāeṅ, aur vah use mubārak kaheṅ.
18rabb ḵẖudā kī tamjīd ho jo isrāīl kā ḵẖudā hai. sirf vahī mojize kartā hai!
19us ke jalālī nām kī abad tak tamjīd ho, pūrī duniyā us ke jalāl se bhar jāe. āmīn, phir āmīn.
20yahāṅ dāūd bin yassī kī duāeṅ ḵẖatm hotī haiṅ.