tīsrī kitāb 73-89

bedīnoṅ kī kāmyābī ke bāvujūd tasallī

¹āsaf kā zabūr.

yaqīnan allāh isrāīl par meharbān hai, un par jin ke dil pāk haiṅ.

²lekin maiṅ phisalne ko thā, mere qadam laġzish khāne ko the.

³kyūṅki sheḵẖībāzoṅ ko dekh kar maiṅ bechain ho gayā, is liye ki bedīn itne ḵẖushhāl haiṅ.

⁴marte vaqt un ko koī taklīf nahīṅ hotī, aur un ke jism moṭe-tāze rahate haiṅ.

⁵ām logoṅ ke masāil se un kā vāstā nahīṅ paṛtā. jis dard-o-karab meṅ dūsre mubtalā rahate haiṅ us se vah āzād hote haiṅ.

⁶is liye un ke gale meṅ takabbur kā hār hai, vah zulm kā libās pahane phirte haiṅ.

⁷charbī ke bāis un kī āṅkheṅ ubhar āī haiṅ. un ke dil belagām vahamoṅ kī girift meṅ rahate haiṅ.

⁸vah mazāq uṛā kar burī bāteṅ karte haiṅ, apne ġarūr meṅ zulm kī dhamkiyāṅ dete haiṅ.

⁹vah samajhte haiṅ ki jo kuchh hamāre muṅh se nikaltā hai vah āsmān se hai, jo bāt hamārī zabān par ā jātī hai vah pūrī zamīn ke liye ahamiyat rakhtī hai.

¹⁰chunāṅche avām un kī taraf rujū hote haiṅ, kyūṅki un ke hāṅ kasrat kā pānī piyā jātā hai.

¹¹vah kahate haiṅ, “allāh ko kyā patā hai? allāh t’ālā ko ilm hī nahīṅ.”

¹²dekho, yahī hai bedīnoṅ kā hāl. vah hameshā sukūn se rahate, hameshā apnī daulat meṅ izāfā karte haiṅ.

¹³yaqīnan maiṅ ne befāidā apnā dil pāk rakhā aur abas apne hāth ġalat kām karne se bāz rakhe.

¹⁴kyūṅki din bhar maiṅ dard-o-karab meṅ mubtalā rahatā hūṅ, har subah mujhe sazā dī jātī hai.

¹⁵agar maiṅ kahatā, “maiṅ bhī un kī tarah bolūṅgā,” to tere farzandoṅ kī nasal se ġaddārī kartā.

¹⁶maiṅ soch-bichār meṅ paṛ gayā tāki bāt samjhūṅ, lekin sochte sochte thak gayā, aziyat meṅ sirf izāfā huā.

¹⁷tab maiṅ allāh ke maqdis meṅ dāḵẖil ho kar samajh gayā ki un kā anjām kyā hogā.

¹⁸yaqīnan tū unheṅ phisalnī jagah par rakhegā, unheṅ fareb meṅ phaṅsā kar zamīn par paṭaḵẖ degā.

¹⁹achānak hī vah tabāh ho jāeṅge, dahshatanāk musībat meṅ phaṅs kar mukammal taur par fanā ho jāeṅge.

²⁰ai rabb, jis tarah ḵẖwāb jāg uṭhte vaqt ġairhaqīqī sābit hotā hai usī tarah tū uṭhte vaqt unheṅ vaham qarār de kar haqīr jānegā.

²¹jab mere dil meṅ talḵẖī paidā huī aur mere bātin meṅ saḵẖt dard thā

²²to maiṅ ahamaq thā. maiṅ kuchh nahīṅ samajhtā thā balki tere sāmne maveshī kī mānind thā.

²³to bhī maiṅ hameshā tere sāth lipṭā rahūṅgā, kyūṅki tū merā dahanā hāth thāme rakhtā hai.

²⁴tū apne mashvre se merī qiyādat karke āḵẖir meṅ izzat ke sāth merā ḵẖairamaqdam karegā.

²⁵jab tū mere sāth hai to mujhe āsmān par kyā kamī hogī? jab tū mere sāth hai to maiṅ zamīn kī koī bhī chīz nahīṅ chāhūṅgā.

²⁶ḵẖwāh merā jism aur merā dil javāb de jāeṅ, lekin allāh hameshā tak mere dil kī chaṭān aur merī mīrās hai.

²⁷yaqīnan jo tujh se dūr haiṅ vah halāk ho jāeṅge, jo tujh se bevafā haiṅ unheṅ tū tabāh kar degā.

²⁸lekin mere liye allāh kī qurbat sab kuchh hai. maiṅ ne rabb qādir-e-mutlaq ko apnī panāhgāh banāyā hai, aur maiṅ logoṅ ko tere tamām kām sunāūṅgā.