Zabūr 77

¹āsaf kā zabūr. mūsīqī ke rāhanumā ke liye. yadūtūn ke liye.

maiṅ allāh se faryād karke madad ke liye chillātā hūṅ, maiṅ allāh ko pukārtā hūṅ ki mujh par dhyān de.

²apnī musībat meṅ maiṅ ne rabb ko talāsh kiyā. rāt ke vaqt mere hāth bilānāġā us kī taraf uṭhe rahe. merī jān ne tasallī pāne se inkār kiyā.

³maiṅ allāh ko yād kartā hūṅ to āheṅ bharne lagtā hūṅ, maiṅ soch-bichār meṅ paṛ jātā hūṅ to rūh niḍhāl ho jātī hai. (silāh)

⁴tū merī āṅkhoṅ ko band hone nahīṅ detā. maiṅ itnā bechain hūṅ ki bol bhī nahīṅ saktā.

⁵maiṅ qadīm zamāne par ġaur kartā hūṅ, un sāloṅ par jo baṛī der hue guzar gae haiṅ.

⁶rāt ko maiṅ apnā gīt yād kartā hūṅ. merā dil mahav-e-ḵẖayāl rahatā aur merī rūh taftīsh kartī rahatī hai.

⁷“kyā rabb hameshā ke liye radd karegā, kyā āindā hameṅ kabhī pasand nahīṅ karegā?

⁸kyā us kī shafqat hameshā ke liye jātī rahī hai? kyā us ke vāde ab se javāb de gae haiṅ?

⁹kyā allāh meharbānī karnā bhūl gayā hai? kyā us ne ġusse meṅ apnā raham bāz rakhā hai?” (silāh)

¹⁰maiṅ bolā, “is se mujhe dukh hai ki allāh t’ālā kā dahanā hāth badal gayā hai.”

¹¹maiṅ rabb ke kām yād karūṅgā, hāṅ qadīm zamāne ke tere mojize yād karūṅgā.

¹²jo kuchh tū ne kiyā us ke har pahalū par ġaur-o-ḵẖauz karūṅgā, tere azīm kāmoṅ meṅ mahav-e-ḵẖayāl rahūṅgā.

¹³ai allāh, terī rāh quddūs hai. kaun sā mābūd hamāre ḵẖudā jaisā azīm hai?

¹⁴tū hī mojize karne vālā ḵẖudā hai. aqvām ke darmiyān tū ne apnī qudrat kā izhār kiyā hai.

¹⁵baṛī quvvat se tū ne ivzānā de kar apnī qaum, yāqūb aur yūsuf kī aulād ko rihā kar diyā hai. (silāh)

¹⁶ai allāh, pānī ne tujhe dekhā, pānī ne tujhe dekhā to taṛapne lagā, gaharāiyoṅ tak larazne lagā.

¹⁷mūslādhār bārish barsī, bādal garaj uṭhe aur tere tīr idhar udhar chalne lage.

¹⁸āṅdhī meṅ terī āvāz kaṛaktī rahī, duniyā bijliyoṅ se raushan huī, zamīn kāṁptī kāṁptī uchhal paṛī.

¹⁹terī rāh samundar meṅ se, terā rāstā gahare pānī meṅ se guzrā, to bhī tere naqsh-e-qadam kisī ko nazar na āe.

²⁰mūsā aur hārūn ke hāth se tū ne revaṛ kī tarah apnī qaum kī rāhanumāī kī.