Psalm 78

Zabūr 78

isrāīl kī tārīḵẖ meṅ ilāhī sazā aur raham

¹āsaf kā zabūr. hikmat kā gīt.

ai merī qaum, merī hidāyat par dhyān de, mere muṅh kī bātoṅ par kān lagā.

²maiṅ tamsīloṅ meṅ bāt karūṅgā, qadīm zamāne ke muamme bayān karūṅgā.

³jo kuchh ham ne sun liyā aur hameṅ mālūm huā hai, jo kuchh hamāre bāpdādā ne hameṅ sunāyā hai

⁴use ham un kī aulād se nahīṅ chhupāeṅge. ham āne vālī pusht ko rabb ke qābil-e-tārīf kām batāeṅge, us kī qudrat aur mojizāt bayān kareṅge.

⁵kyūṅki us ne yāqūb kī aulād ko sharīat dī, isrāīl meṅ ahkām qāim kie. us ne farmāyā ki hamāre bāpdādā yah ahkām apnī aulād ko sikhāeṅ

⁶tāki āne vālī pusht bhī unheṅ apnāe, vah bacche jo abhī paidā nahīṅ hue the. phir unheṅ bhī apne bacchoṅ ko sunānā thā.

⁷kyūṅki allāh kī marzī hai ki is tarah har pusht allāh par etimād rakh kar us ke azīm kām na bhūle balki us ke ahkām par amal kare.

⁸vah nahīṅ chāhatā ki vah apne bāpdādā kī mānind hoṅ jo ziddī aur sarkash nasal the, aisī nasal jis kā dil sābitqadam nahīṅ thā aur jis kī rūh vafādārī se allāh se lipṭī na rahī.

⁹chunāṅche ifrāīm ke mard go kamānoṅ se les the jaṅg ke vaqt farār hue.

¹⁰vah allāh ke ahd se vafādār na rahe, us kī sharīat par amal karne ke liye tayyār nahīṅ the.

¹¹jo kuchh us ne kiyā thā, jo mojize us ne unheṅ dikhāe the, ifrāīmī vah sab kuchh bhūl gae.

¹²mulk-e-misr ke ilāqe zuan meṅ us ne un ke bāpdādā ke dekhte dekhte mojize kie the.

¹³samundar ko chīr kar us ne unheṅ us meṅ se guzarne diyā, aur donoṅ taraf pānī mazbūt dīvār kī tarah khaṛā rahā.

¹⁴din ko us ne bādal ke zarīe aur rāt bhar chamakdār āg se un kī qiyādat kī.

¹⁵registān meṅ us ne pattharoṅ ko chāk karke unheṅ samundar kī sī kasrat kā pānī pilāyā.

¹⁶us ne hone diyā ki chaṭān se nadiyāṅ phūṭ nikleṅ aur pānī daryāoṅ kī tarah bahane lage.

¹⁷lekin vah us kā gunāh karne se bāz na āe balki registān meṅ allāh t’ālā se sarkash rahe.

¹⁸jān-būjh kar unhoṅ ne allāh ko āzmā kar vah ḵẖurāk māṅgī jis kā lālach karte the.

¹⁹allāh ke ḵẖilāf kufr bak kar vah bole, “kyā allāh registān meṅ hamāre liye mez bichhā saktā hai?

²⁰beshak jab us ne chaṭān ko mārā to pānī phūṭ niklā aur nadiyāṅ bahane lagīṅ. lekin kyā vah roṭī bhī de saktā hai, apnī qaum ko gosht bhī muhayyā kar saktā hai? yah to nāmumkin hai.”

²¹yah sun kar rabb taish meṅ ā gayā. yāqūb ke ḵẖilāf āg bhaṛak uṭhī, aur us kā ġazab isrāīl par nāzil huā.

²²kyūṅ? is liye ki unheṅ allāh par yaqīn nahīṅ thā, vah us kī najāt par bharosā nahīṅ rakhte the.

²³is ke bāvujūd allāh ne un ke ūpar bādloṅ ko hukm de kar āsmān ke darvāze khol die.

²⁴us ne khāne ke liye un par mann barsāyā, unheṅ āsmān se roṭī khilāī.

²⁵har ek ne farishtoṅ kī yah roṭī khāī balki allāh ne itnā khānā bhejā ki un ke peṭ bhar gae.

²⁶phir us ne āsmān par mashriqī havā chalāī aur apnī qudrat se junūbī havā pahuṅchāī.

²⁷us ne gard kī tarah un par gosht barsāyā, samundar kī ret jaise beshumār parinde un par girne die.

²⁸ḵẖaimāgāh ke bīch meṅ hī vah gir paṛe, un ke gharoṅ ke ird-gird hī zamīn par ā gire.

²⁹tab vah khā khā kar ḵẖūb ser ho gae, kyūṅki jis kā lālach vah karte the vah allāh ne unheṅ muhayyā kiyā thā.

³⁰lekin un kā lālach abhī pūrā nahīṅ huā thā aur gosht abhī un ke muṅh meṅ thā

³¹ki allāh kā ġazab un par nāzil huā. qaum ke khāte-pīte log halāk hue, isrāīl ke javān ḵẖāk meṅ mil gae.

³²in tamām bātoṅ ke bāvujūd vah apne gunāhoṅ meṅ izāfā karte gae aur us ke mojizāt par īmān na lāe.

³³is liye us ne un ke din nākāmī meṅ guzarne die, aur un ke sāl dahshat kī hālat meṅ iḵẖtitāmpazīr hue.

³⁴jab kabhī allāh ne un meṅ qatl-o-ġārat hone dī to vah use ḍhūṅḍne lage, vah muṛ kar allāh ko talāsh karne lage.

³⁵tab unheṅ yād āyā ki allāh hamārī chaṭān, allāh t’ālā hamārā chhuṛāne vālā hai.

³⁶lekin vah muṅh se use dhokā dete, zabān se use jhūṭ pesh karte the.

³⁷na un ke dil sābitqadmī se us ke sāth lipṭe rahe, na vah us ke ahd se vafādār rahe.

³⁸to bhī allāh rahamdil rahā. us ne unheṅ tabāh na kiyā balki un kā qusūr muāf kartā rahā. bār bār vah apne ġazab se bāz āyā, bār bār apnā pūrā qahar un par utārne se gurez kiyā.

³⁹kyūṅki use yād rahā ki vah fānī insān haiṅ, havā kā ek jhoṅkā jo guzar kar kabhī vāpas nahīṅ ātā.

⁴⁰registān meṅ vah kitnī dafā us se sarkash hue, kitnī martabā use dukh pahuṅchāyā.

⁴¹bār bār unhoṅ ne allāh ko āzmāyā, bār bār isrāīl ke quddūs ko raṅjīdā kiyā.

⁴²unheṅ us kī qudrat yād na rahī, vah din jab us ne fidyā de kar unheṅ dushman se chhuṛāyā,

⁴³vah din jab us ne misr meṅ apne ilāhī nishān dikhāe, zuan ke ilāqe meṅ apne mojize kie.

⁴⁴us ne un kī naharoṅ kā pānī ḵẖūn meṅ badal diyā, aur vah apnī nadiyoṅ kā pānī pī na sake.

⁴⁵us ne un ke darmiyān jūoṅ ke ġol bheje jo unheṅ khā gaīṅ, meṅḍhak jo un par tabāhī lāe.

⁴⁶un kī paidāvār us ne javān ṭiḍḍiyoṅ ke havāle kī, un kī mehanat kā phal bāliġ ṭiḍḍiyoṅ ke sapurd kiyā.

⁴⁷un kī aṅgūr kī beleṅ us ne oloṅ se, un ke anjīr-tūt ke daraḵẖt sailāb se tabāh kar die.

⁴⁸un ke maveshī us ne oloṅ ke havāle kie, un ke revaṛ bijlī ke sapurd kie.

⁴⁹us ne un par apnā sholāzan ġazab nāzil kiyā. qahar, ḵẖafgī aur musībat yānī tabāhī lāne vāle farishtoṅ kā pūrā dastā un par hamlāāvar huā.

⁵⁰us ne apne ġazab ke liye rāstā tayyār karke unheṅ maut se na bachāyā balki muhalak vabā kī zad meṅ āne diyā.

⁵¹misr meṅ us ne tamām pahalauṭhoṅ ko mār ḍālā aur hām ke ḵẖaimoṅ meṅ mardāngī kā pahalā phal tamām kar diyā.

⁵²phir vah apnī qaum ko bheṛ-bakriyoṅ kī tarah misr se bāhar lā kar registān meṅ revaṛ kī tarah liye phirā.

⁵³vah hifāzat se un kī qiyādat kartā rahā. unheṅ koī ḍar nahīṅ thā jabki un ke dushman samundar meṅ ḍūb gae.

⁵⁴yūṅ allāh ne unheṅ muqaddas mulk tak pahuṅchāyā, us pahāṛ tak jise us ke dahane hāth ne hāsil kiyā thā.

⁵⁵un ke āge āge vah dīgar qaumeṅ nikāltā gayā. un kī zamīn us ne taqsīm karke isrāīliyoṅ ko mīrās meṅ dī, aur un ke ḵẖaimoṅ meṅ us ne isrāīlī qabīle basāe.

⁵⁶is ke bāvujūd vah allāh t’ālā ko āzmāne se bāz na āe balki us se sarkash hue aur us ke ahkām ke tahat na rahe.

⁵⁷apne bāpdādā kī tarah vah ġaddār ban kar bevafā hue. vah ḍhīlī kamān kī tarah nākām ho gae.

⁵⁸unhoṅ ne ūṅchī jagahoṅ kī ġalat qurbānagāhoṅ se allāh ko ġussā dilāyā aur apne butoṅ se use raṅjīdā kiyā.

⁵⁹jab allāh ko ḵẖabar milī to vah ġazabnāk huā aur isrāīl ko mukammal taur par mustarad kar diyā.

⁶⁰us ne sailā meṅ apnī sukūnatgāh chhoṛ dī, vah ḵẖaimā jis meṅ vah insān ke darmiyān sukūnat kartā thā.

⁶¹ahd kā sandūq us kī qudrat aur jalāl kā nishān thā, lekin us ne use dushman ke havāle karke jilāvatanī meṅ jāne diyā.

⁶²apnī qaum ko us ne talvār kī zad meṅ āne diyā, kyūṅki vah apnī maurūsī milkiyat se nihāyat nārāz thā.

⁶³qaum ke javān nazar-e-ātish hue, aur us kī kuṅvāriyoṅ ke liye shādī ke gīt gāe na gae.

⁶⁴us ke imām talvār se qatl hue, aur us kī bevāoṅ ne mātam na kiyā.

⁶⁵tab rabb jāg uṭhā, us ādmī kī tarah jis kī nīṅd uchāṭ ho gaī ho, us sūrme kī mānind jis se nashe kā asar utar gayā ho.

⁶⁶us ne apne dushmanoṅ ko mār mār kar bhagā diyā aur unheṅ hameshā ke liye sharmindā kar diyā.

⁶⁷us vaqt us ne yūsuf kā ḵẖaimā radd kiyā aur ifrāīm ke qabīle ko na chunā

⁶⁸balki yahūdāh ke qabīle aur koh-e-siyyūn ko chun liyā jo use piyārā thā.

⁶⁹us ne apnā maqdis bulandiyoṅ kī mānind banāyā, zamīn kī mānind jise us ne hameshā ke liye qāim kiyā hai.

⁷⁰us ne apne ḵẖādim dāūd ko chun kar bheṛ-bakriyoṅ ke bāṛoṅ se bulāyā.

⁷¹hāṅ, us ne use bheṛoṅ ^[a] ibrānī matan se murād vah bheṛ hai jo abhī apne bacchoṅ ko dūdh pilātī hai. kī dekh-bhāl se bulāyā tāki vah us kī qaum yāqūb, us kī mīrās isrāīl kī gallābānī kare.

⁷²dāūd ne ḵẖulūsdilī se un kī gallābānī kī, baṛī mahārat se us ne un kī rāhanumāī kī.