Zabūr 79
jaṅg kī musībat meṅ qaum kī duā
1āsaf kā zabūr.
ai allāh, ajnabī qaumeṅ terī maurūsī zamīn meṅ ghus āī haiṅ. unhoṅ ne terī muqaddas sukūnatgāh kī behuramtī karke yarūshalam ko malbe kā ḍher banā diyā hai.
2unhoṅ ne tere ḵẖādimoṅ kī lāsheṅ parindoṅ ko aur tere īmāndāroṅ kā gosht jaṅglī jānvaroṅ ko khilā diyā hai.
3yarūshalam ke chāroṅ taraf unhoṅ ne ḵẖūn kī nadiyāṅ bahāīṅ, aur koī bāqī na rahā jo murdoṅ ko dafnātā.
4hamāre paṛosiyoṅ ne hameṅ mazāq kā nishānā banā liyā hai, ird-gird kī qaumeṅ hamārī haṅsī uṛātī aur lān-tān kartī haiṅ.
5ai rabb, kab tak? kyā tū hameshā tak ġusse hogā? terī ġairat kab tak āg kī tarah bhaṛaktī rahegī?
6apnā ġazab un aqvām par nāzil kar jo tujhe taslīm nahīṅ kartīṅ, un saltanatoṅ par jo tere nām ko nahīṅ pukāratīṅ.
7kyūṅki unhoṅ ne yāqūb ko haṛap karke us kī rihāishgāh tabāh kar dī hai.
8hameṅ un gunāhoṅ ke qusūrvār na ṭhaharā jo hamāre bāpdādā se sarzad hue. ham par raham karne meṅ jaldī kar, kyūṅki ham bahut pastahāl ho gae haiṅ.
9ai hamārī najāt ke ḵẖudā, hamārī madad kar tāki tere nām ko jalāl mile. hameṅ bachā, apne nām kī ḵẖātir hamāre gunāhoṅ ko muāf kar.
10dīgar aqvām kyūṅ kaheṅ, “un kā ḵẖudā kahāṅ hai?” hamāre dekhte dekhte unheṅ dikhā ki tū apne ḵẖādimoṅ ke ḵẖūn kā badlā letā hai.
11qaidiyoṅ kī āheṅ tujh tak pahuṅchīṅ, jo marne ko haiṅ unheṅ apnī azīm qudrat se mahfūz rakh.
12ai rabb, jo lān-tān hamāre paṛosiyoṅ ne tujh par barsāī hai use sāt gunā un ke saroṅ par vāpas lā.
13tab ham jo terī qaum aur terī charāgāh kī bheṛeṅ haiṅ abad tak terī sitāish kareṅge, pusht-dar-pusht terī hamd-o-sanā kareṅge.