Zabūr 80
aṅgūr kī bel kī bahālī ke liye duā
1āsaf kā zabūr. mūsīqī ke rāhanumā ke liye. tarz : ahd ke sosan.
ai isrāīl ke gallābān, ham par dhyān de! tū jo yūsuf kī revaṛ kī tarah rāhanumāī kartā hai, ham par tavajjuh kar! tū jo karūbī farishtoṅ ke darmiyān taḵẖtnashīn hai, apnā nūr chamkā!
2ifrāīm, binyamīn aur manassī ke sāmne apnī qudrat ko harkat meṅ lā. hameṅ bachāne ā!
3ai allāh, hameṅ bahāl kar. apne chihare kā nūr chamkā to ham najāt pāeṅge.
4ai rabb, lashkaroṅ ke ḵẖudā, terā ġazab kab tak bhaṛaktā rahegā, hālāṅki terī qaum tujh se iltijā kar rahī hai?
5tū ne unheṅ āṅsūoṅ kī roṭī khilāī aur āṅsūoṅ kā piyālā ḵẖūb pilāyā.
6tū ne hameṅ paṛosiyoṅ ke jhagṛoṅ kā nishānā banāyā. hamāre dushman hamārā mazāq uṛāte haiṅ.
7ai lashkaroṅ ke ḵẖudā, hameṅ bahāl kar. apne chihare kā nūr chamkā to ham najāt pāeṅge.
8aṅgūr kī jo bel misr meṅ ug rahī thī use tū ukhāṛ kar mulk-e-kan’ān lāyā. tū ne vahāṅ kī aqvām ko bhagā kar yah bel un kī jagah lagāī.
9tū ne us ke liye zamīn tayyār kī to vah jaṛ pakaṛ kar pūre mulk meṅ phail gaī.
10us kā sāyā pahāṛoṅ par chhā gayā, aur us kī shāḵẖoṅ ne deodār ke azīm daraḵẖtoṅ ko ḍhāṅk liyā.
11us kī ṭahaniyāṅ maġrib meṅ samundar tak phail gaīṅ, us kī ḍāliyāṅ mashriq meṅ daryā-e-furāt tak pahuṅch gaīṅ.
12tū ne us kī chārdīvārī kyūṅ girā dī? ab har guzarne vālā us ke aṅgūr toṛ letā hai.
13jaṅgal ke sūar use khā khā kar tabāh karte, khule maidān ke jānvar vahāṅ charte haiṅ.
14ai lashkaroṅ ke ḵẖudā, hamārī taraf dubārā rujū farmā! āsmān se nazar ḍāl kar hālāt par dhyān de. is bel kī dekh-bhāl kar.
15use mahfūz rakh jise tere dahane hāth ne zamīn meṅ lagāyā, us beṭe ko jise tū ne apne liye pālā hai.
16is vaqt vah kaṭ kar nazar-e-ātish huā hai. tere chihare kī ḍāṅṭ-ḍapaṭ se log halāk ho jāte haiṅ.
17terā hāth apne dahane hāth ke bande ko panāh de, us ādamzād ko jise tū ne apne liye pālā thā.
18tab ham tujh se dūr nahīṅ ho jāeṅge. baḵẖsh de ki hamārī jān meṅ jān āe to ham terā nām pukāreṅge.
19ai rabb, lashkaroṅ ke ḵẖudā, hameṅ bahāl kar. apne chihare kā nūr chamkā to ham najāt pāeṅge.