Zabūr 81

¹āsaf kā zabūr. mūsīqī ke rāhanumā ke liye. tarz : gittīt.

allāh hamārī quvvat hai. us kī ḵẖushī meṅ shādiyānā bajāo, yāqūb ke ḵẖudā kī tāzīm meṅ ḵẖushī ke nāre lagāo.

²gīt gānā shurū karo. daf bajāo, sarod aur sitār kī surīlī āvāz nikālo.

³nae chāṅd ke din narsiṅgā phūṅko, pūre chāṅd ke jis din hamārī īd hotī hai use phūṅko.

⁴kyūṅki yah isrāīl kā farz hai, yah yāqūb ke ḵẖudā kā farmān hai.

⁵jab yūsuf misr ke ḵẖilāf niklā to allāh ne ḵẖud yah muqarrar kiyā.

maiṅ ne ek zabān sunī, jo maiṅ ab tak nahīṅ jāntā thā,

⁶“maiṅ ne us ke kaṅdhe par se bojh utārā aur us ke hāth bhārī ṭokrī uṭhāne se āzād kie.

⁷musībat meṅ tū ne āvāz dī to maiṅ ne tujhe bachāyā. garajte bādal meṅ se maiṅ ne tujhe javāb diyā aur tujhe marībā ke pānī par āzmāyā. (silāh)

⁸ai merī qaum, sun, to maiṅ tujhe āgāh karūṅgā. ai isrāīl, kāsh tū merī sune!

⁹tere darmiyān koī aur ḵẖudā na ho, kisī ajnabī mābūd ko sijdā na kar.

¹⁰maiṅ hī rabb terā ḵẖudā hūṅ jo tujhe mulk-e-misr se nikāl lāyā. apnā muṅh ḵẖūb khol to maiṅ use bhar dūṅgā.

¹¹lekin merī qaum ne merī na sunī, isrāīl merī bāt mānne ke liye tayyār na thā.

¹²chunāṅche maiṅ ne unheṅ un ke diloṅ kī zid ke havāle kar diyā, aur vah apne zātī mashvaroṅ ke mutābiq zindagī guzārne lage.

¹³kāsh merī qaum sune, isrāīl merī rāhoṅ par chale!

¹⁴tab maiṅ jaldī se us ke dushmanoṅ ko zer kartā, apnā hāth us ke muḵẖālifoṅ ke ḵẖilāf uṭhātā.

¹⁵tab rabb se nafrat karne vāle dabak kar us kī ḵẖushāmad karte, un kī shikast abdī hotī.

¹⁶lekin isrāīl ko maiṅ behtarīn gandum khilātā, maiṅ chaṭān meṅ se shahad nikāl kar use ser kartā.”