Zabūr 83
qaum ke dushmanoṅ ke ḵẖilāf duā
1gīt. āsaf kā zabūr.
ai allāh, ḵẖāmosh na rah! ai allāh, chup na rah!
2dekh, tere dushman shor machā rahe haiṅ, tujh se nafrat karne vāle apnā sar tere ḵẖilāf uṭhā rahe haiṅ.
3terī qaum ke ḵẖilāf vah chālāk mansūbe bāṅdh rahe haiṅ, jo terī āṛ meṅ chhup gae haiṅ un ke ḵẖilāf sāzisheṅ kar rahe haiṅ.
4vah kahate haiṅ, “āo, ham unheṅ miṭā deṅ tāki qaum nest ho jāe aur isrāīl kā nām-o-nishān bāqī na rahe.”
5kyūṅki vah āpas meṅ salāh-mashvrā karne ke bād dilī taur par muttahid ho gae haiṅ, unhoṅ ne tere hī ḵẖilāf ahd bāṅdhā hai.
6un meṅ adom ke ḵẖaime, ismāīlī, moāb, hājirī,
7jabāl, ammon, amālīq, philistiyā aur sūr ke bāshinde shāmil ho gae haiṅ.
8asūr bhī un meṅ sharīk ho kar lūt kī aulād ko sahārā de rahā hai. (silāh)
9un ke sāth vahī sulūk kar jo tū ne midiyāniyoṅ se yānī qaison nadī par sīsrā aur yābīn se kiyā.
10kyūṅki vah ain-dor ke pās halāk ho kar khet meṅ gobar ban gae.
11un ke shurfā ke sāth vahī bartāo kar jo tū ne oreb aur zaeb se kiyā. un ke tamām sardār zibah aur zalmunnā kī mānind ban jāeṅ,
12jinhoṅ ne kahā, “āo, ham allāh kī charāgāhoṅ par qabzā kareṅ.”
13ai mere ḵẖudā, unheṅ luṛhakbūṭī aur havā meṅ uṛte hue bhūse kī mānind banā de.
14jis tarah āg pūre jaṅgal meṅ phail jātī aur ek hī sholā pahāṛoṅ ko jhulsā detā hai,
15usī tarah apnī āṅdhī se un kā tāqqub kar, apne tūfān se un ko dahshatzadā kar de.
16ai rabb, un kā muṅh kālā kar tāki vah terā nām talāsh kareṅ.
17vah hameshā tak sharmindā aur havāsabāḵẖtā raheṅ, vah sharmasār ho kar halāk ho jāeṅ.
18tab hī vah jān leṅge ki tū hī jis kā nām rabb hai allāh t’ālā yānī pūrī duniyā kā mālik hai.