Zabūr 85
nae sire se barkat pāne ke liye duā
1qorah kī aulād kā zabūr. mūsīqī ke rāhanumā ke liye. ai rabb, pahale tū ne apne mulk ko pasand kiyā, pahale yāqūb ko bahāl kiyā.
2pahale tū ne apnī qaum kā qusūr muāf kiyā, us kā tamām gunāh ḍhāṁp diyā. (silāh)
3jo ġazab ham par nāzil ho rahā thā us kā silsilā tū ne rok diyā, jo qahar hamāre ḵẖilāf bhaṛak rahā thā use chhoṛ diyā.
4ai hamārī najāt ke ḵẖudā, hameṅ dubārā bahāl kar. ham se nārāz hone se bāz ā.
5kyā tū hameshā tak ham se ġusse rahegā? kyā tū apnā qahar pusht-dar-pusht qāim rakhegā?
6kyā tū dubārā hamārī jān ko tāzādam nahīṅ karegā tāki terī qaum tujh se ḵẖush ho jāe?
7ai rabb, apnī shafqat ham par zāhir kar, apnī najāt hameṅ atā farmā.
8maiṅ vah kuchh sunūṅgā jo ḵẖudā rabb faramāegā. kyūṅki vah apnī qaum aur apne īmāndāroṅ se salāmatī kā vādā karegā, alabattā lāzim hai ki vah dubārā hamāqat meṅ ulajh na jāeṅ.
9yaqīnan us kī najāt un ke qarīb hai jo us kā ḵẖauf mānte haiṅ tāki jalāl hamāre mulk meṅ sukūnat kare.
10shafqat aur vafādārī ek dūsre ke gale lag gae haiṅ, rāstī aur salāmatī ne ek dūsre ko bosā diyā hai.
11sacchāī zamīn se phūṭ niklegī aur rāstī āsmān se zamīn par nazar ḍālegī.
12allāh zarūr vah kuchh degā jo acchhā hai, hamārī zamīn zarūr apnī fasleṅ paidā karegī.
13rāstī us ke āge āge chal kar us ke qadmoṅ ke liye rāstā tayyār karegī.