Zabūr 86
musībat meṅ duā
1dāūd kī duā.
ai rabb, apnā kān jhukā kar merī sun, kyūṅki maiṅ musībatzadā aur muhtāj hūṅ.
2merī jān ko mahfūz rakh, kyūṅki maiṅ īmāndār hūṅ. apne ḵẖādim ko bachā jo tujh par bharosā rakhtā hai. tū hī merā ḵẖudā hai!
3ai rabb, mujh par meharbānī kar, kyūṅki din bhar maiṅ tujhe pukārtā hūṅ.
4apne ḵẖādim kī jān ko ḵẖush kar, kyūṅki maiṅ terā ārzūmand hūṅ.
5kyūṅki tū ai rabb bhalā hai, tū muāf karne ke liye tayyār hai. jo bhī tujhe pukārte haiṅ un par tū baṛī shafqat kartā hai.
6ai rabb, merī duā sun, merī iltijāoṅ par tavajjuh kar.
7musībat ke din maiṅ tujhe pukārtā hūṅ, kyūṅki tū merī suntā hai.
8ai rabb, mābūdoṅ meṅ se koī terī mānind nahīṅ hai. jo kuchh tū kartā hai koī aur nahīṅ kar saktā.
9ai rabb, jitnī bhī qaumeṅ tū ne banāīṅ vah ā kar tere huzūr sijdā kareṅgī aur tere nām ko jalāl deṅgī.
10kyūṅki tū hī azīm hai aur mojize kartā hai. tū hī ḵẖudā hai.
11ai rabb, mujhe apnī rāh sikhā tāki terī vafādārī meṅ chalūṅ. baḵẖsh de ki maiṅ pūre dil se terā ḵẖauf mānūṅ.
12ai rabb mere ḵẖudā, maiṅ pūre dil se terā shukr karūṅgā, hameshā tak tere nām kī tāzīm karūṅgā.
13kyūṅki terī mujh par shafqat azīm hai, tū ne merī jān ko pātāl kī gaharāiyoṅ se chhuṛāyā hai.
14ai allāh, maġrūr mere ḵẖilāf uṭh khaṛe hue haiṅ, zālimoṅ kā jathā merī jān lene ke darpai hai. yah log terā lihāz nahīṅ karte.
15lekin tū, ai rabb, rahīm aur meharbān ḵẖudā hai. tū tahammul, shafqat aur vafā se bharpūr hai.
16merī taraf rujū farmā, mujh par meharbānī kar! apne ḵẖādim ko apnī quvvat atā kar, apnī ḵẖādimā ke beṭe ko bachā.
17mujhe apnī meharbānī kā koī nishān dikhā. mujh se nafrat karne vāle yah dekh kar sharmindā ho jāeṅ ki tū rabb ne merī madad karke mujhe tasallī dī hai.