Zabūr 88
tark kie gae shaḵẖs ke liye duā
1qorah kī aulād kā zabūr. mūsīqī ke rāhanumā ke liye. tarz : mahalat l’annot. haimān izrāhī kā hikmat kā gīt.
ai rabb, ai merī najāt ke ḵẖudā, din rāt maiṅ tere huzūr chīḵẖtā chillātā hūṅ.
2merī duā tere huzūr pahuṅche, apnā kān merī chīḵẖoṅ kī taraf jhukā.
3kyūṅki merī jān dukh se bharī hai, aur merī ṭāṅgeṅ qabr meṅ laṭkī huī haiṅ.
4mujhe un meṅ shumār kiyā jātā hai jo pātāl meṅ utar rahe haiṅ. maiṅ us mard kī mānind hūṅ jis kī tamām tāqat jātī rahī hai.
5mujhe murdoṅ meṅ tanhā chhoṛā gayā hai, qabr meṅ un maqtūloṅ kī tarah jin kā tū ab ḵẖayāl nahīṅ rakhtā aur jo tere hāth ke sahāre se munqate ho gae haiṅ.
6tū ne mujhe sab se gahare gaṛhe meṅ, tārīktarīn gaharāiyoṅ meṅ ḍāl diyā hai.
7tere ġazab kā pūrā bojh mujh par ā paṛā hai, tū ne mujhe apnī tamām maujoṅ ke nīche dabā diyā hai. (silāh)
8tū ne mere qarībī dostoṅ ko mujh se dūr kar diyā hai, aur ab vah mujh se ghin khāte haiṅ. maiṅ phaṅsā huā hūṅ aur nikal nahīṅ saktā.
9merī āṅkheṅ ġam ke māre pajhmurdā ho gaī haiṅ. ai rabb, din bhar maiṅ tujhe pukārtā, apne hāth terī taraf uṭhāe rakhtā hūṅ.
10kyā tū murdoṅ ke liye mojize karegā? kyā pātāl ke bāshinde uṭh kar terī tamjīd kareṅge? (silāh)
11kyā log qabr meṅ terī shafqat yā pātāl meṅ terī vafā bayān kareṅge?
12kyā tārīkī meṅ tere mojize yā mulk-e-farāmosh meṅ terī rāstī mālūm ho jāegī?
13lekin ai rabb, maiṅ madad ke liye tujhe pukārtā hūṅ, merī duā subah-savere tere sāmne ā jātī hai.
14ai rabb, tū merī jān ko kyūṅ radd kartā, apne chihare ko mujh se poshīdā kyūṅ rakhtā hai?
15maiṅ musībatzadā aur javānī se maut ke qarīb rahā hūṅ. tere dahshatanāk hamle bardāsht karte karte maiṅ jān se hāth dho baiṭhā hūṅ.
16terā bhaṛaktā qahar mujh par se guzar gayā, tere haulnāk kāmoṅ ne mujhe nābūd kar diyā hai.
17din bhar vah mujhe sailāb kī tarah ghere rakhte haiṅ, har taraf se mujh par hamlāāvar hote haiṅ.
18tū ne mere dostoṅ aur paṛosiyoṅ ko mujh se dūr kar rakhā hai. tārīkī hī merī qarībī dost ban gaī hai.