Zabūr 89

isrāīl kī musībat aur dāūd se vādā

¹aitān izrāhī kā hikmat kā gīt.

maiṅ abad tak rabb kī meharbāniyoṅ kī madahsarāī karūṅgā, pusht-dar-pusht muṅh se terī vafā kā elān karūṅgā.

²kyūṅki maiṅ bolā, “terī shafqat hameshā tak qāim hai, tū ne apnī vafā kī mazbūt bunyād āsmān par hī rakhī hai.”

³tū ne farmāyā, “maiṅ ne apne chune hue bande se ahd bāṅdhā, apne ḵẖādim dāūd se qasam khā kar vādā kiyā hai,

⁴‘maiṅ terī nasal ko hameshā tak qāim rakhūṅgā, terā taḵẖt hameshā tak mazbūt rakhūṅgā’.” (silāh)

⁵ai rabb, āsmān tere mojizoṅ kī sitāish kareṅge, muqaddasīn kī jamāat meṅ hī terī vafādārī kī tamjīd kareṅge.

⁶kyūṅki bādloṅ meṅ kaun rabb kī mānind hai? ilāhī hastiyoṅ meṅ se kaun rabb kī mānind hai?

⁷jo bhī muqaddasīn kī majlis meṅ shāmil haiṅ vah allāh se ḵẖauf khāte haiṅ. jo bhī us ke ird-gird hote haiṅ un par us kī azmat aur rob chhāyā rahatā hai.

⁸ai rabb, ai lashkaroṅ ke ḵẖudā, kaun terī mānind hai? ai rabb, tū qavī aur apnī vafā se ghirā rahatā hai.

⁹tū ṭhāṭheṅ mārte hue samundar par hukūmat kartā hai. jab vah maujzan ho to tū use thamā detā hai.

¹⁰tū ne samundarī ajhdahe rahab ko kuchal diyā, aur vah maqtūl kī mānind ban gayā. apne qavī bāzū se tū ne apne dushmanoṅ ko tittar-bittar kar diyā.

¹¹āsmān-o-zamīn tere hī haiṅ. duniyā aur jo kuchh us meṅ hai tū ne qāim kiyā.

¹²tū ne shimāl-o-junūb ko ḵẖalaq kiyā. tabūr aur harmūn tere nām kī ḵẖushī meṅ nāre lagāte haiṅ.

¹³terā bāzū qavī aur terā hāth tāqatvar hai. terā dahanā hāth azīm kām karne ke liye tayyār hai.

¹⁴rāstī aur insāf tere taḵẖt kī bunyād haiṅ. shafqat aur vafā tere āge āge chaltī haiṅ.

¹⁵mubārak hai vah qaum jo terī ḵẖushī ke nāre lagā sake. ai rabb, vah tere chihare ke nūr meṅ chaleṅge.

¹⁶rozānā vah tere nām kī ḵẖushī manāeṅge aur terī rāstī se sarfarāz hoṅge.

¹⁷kyūṅki tū hī un kī tāqat kī shān hai, aur tū apne karam se hameṅ sarfarāz karegā.

¹⁸kyūṅki hamārī ḍhāl rabb hī kī hai, hamārā bādshāh isrāīl ke quddūs hī kā hai.

¹⁹māzī meṅ tū royā meṅ apne īmāndāroṅ se hamkalām huā. us vaqt tū ne farmāyā, “maiṅ ne ek sūrme ko tāqat se navāzā hai, qaum meṅ se ek ko chun kar sarfarāz kiyā hai.

²⁰maiṅ ne apne ḵẖādim dāūd ko pā liyā aur use apne muqaddas tel se masah kiyā hai.

²¹merā hāth use qāim rakhegā, merā bāzū use taqviyat degā.

²²dushman us par ġālib nahīṅ āegā, sharīr use ḵẖāk meṅ nahīṅ milāeṅge.

²³us ke āge āge maiṅ us ke dushmanoṅ ko pāsh pāsh karūṅgā. jo us se nafrat rakhte haiṅ unheṅ zamīn par paṭaḵẖ dūṅgā.

²⁴merī vafā aur merī shafqat us ke sāth raheṅgī, mere nām se vah sarfarāz hogā.

²⁵maiṅ us ke hāth ko samundar par aur us ke dahane hāth ko daryāoṅ par hukūmat karne dūṅgā.

²⁶vah mujhe pukār kar kahegā, ‘tū merā bāp, merā ḵẖudā aur merī najāt kī chaṭān hai.’

²⁷maiṅ use apnā pahalauṭhā aur duniyā kā sab se ālā bādshāh banāūṅgā.

²⁸maiṅ use hameshā tak apnī shafqat se navāztā rahūṅgā, merā us ke sāth ahd kabhī tamām nahīṅ hogā.

²⁹maiṅ us kī nasal hameshā tak qāim rakhūṅgā, jab tak āsmān qāim hai us kā taḵẖt qāim rakhūṅgā.

³⁰agar us ke beṭe merī sharīat tark karke mere ahkām par amal na kareṅ,

³¹agar vah mere farmānoṅ kī behuramtī karke merī hidāyāt ke mutābiq zindagī na guzāreṅ

³²to maiṅ lāṭhī le kar un kī tādīb karūṅgā aur muhalak vabāoṅ se un ke gunāhoṅ kī sazā dūṅgā.

³³lekin maiṅ use apnī shafqat se maharūm nahīṅ karūṅgā, apnī vafā kā inkār nahīṅ karūṅgā.

³⁴na maiṅ apne ahd kī behuramtī karūṅgā, na vah kuchh tabdīl karūṅgā jo maiṅ ne farmāyā hai.

³⁵maiṅ ne ek bār sadā ke liye apnī quddūsiyat kī qasam khā kar vādā kiyā hai, aur maiṅ dāūd ko kabhī dhokā nahīṅ dūṅgā.

³⁶us kī nasal abad tak qāim rahegī, us kā taḵẖt āftāb kī tarah mere sāmne khaṛā rahegā.

³⁷chāṅd kī tarah vah hameshā tak barqarār rahegā, aur jo gavāh bādloṅ meṅ hai vah vafādār hai.” (silāh)

³⁸lekin ab tū ne apne masah kie hue ḵẖādim ko ṭhakrā kar radd kiyā, tū us se ġazabnāk ho gayā hai.

³⁹tū ne apne ḵẖādim kā ahd nāmanzūr kiyā aur us kā tāj ḵẖāk meṅ milā kar us kī behuramtī kī hai.

⁴⁰tū ne us kī tamām fasīleṅ ḍhā kar us ke qilaoṅ ko malbe ke ḍher banā diyā hai.

⁴¹jo bhī vahāṅ se guzre vah use lūṭ letā hai. vah apne paṛosiyoṅ ke liye mazāq kā nishānā ban gayā hai.

⁴²tū ne us ke muḵẖālifoṅ kā dahanā hāth sarfarāz kiyā, us ke tamām dushmanoṅ ko ḵẖush kar diyā hai.

⁴³tū ne us kī talvār kī tezī beasar karke use jaṅg meṅ fatah pāne se rok diyā hai.

⁴⁴tū ne us kī shān ḵẖatm karke us kā taḵẖt zamīn par paṭaḵẖ diyā hai.

⁴⁵tū ne us kī javānī ke din muḵẖtasar karke use rusvāī kī chādar meṅ lapeṭā hai. (silāh)

⁴⁶ai rabb, kab tak? kyā tū apne āp ko hameshā tak chhupāe rakhegā? kyā terā qahar abad tak āg kī tarah bhaṛaktā rahegā?

⁴⁷yād rahe ki merī zindagī kitnī muḵẖtasar hai, ki tū ne tamām insān kitne fānī ḵẖalaq kie haiṅ.

⁴⁸kaun hai jis kā maut se vāstā na paṛe, kaun hai jo hameshā zindā rahe? kaun apnī jān ko maut ke qabze se bachāe rakh saktā hai? (silāh)

⁴⁹ai rabb, terī vah purānī meharbāniyāṅ kahāṅ haiṅ jin kā vādā tū ne apnī vafā kī qasam khā kar dāūd se kiyā?

⁵⁰ai rabb, apne ḵẖādimoṅ kī ḵẖajālat yād kar. merā sīnā mut’addid qaumoṅ kī lān-tān se dukhtā hai,

⁵¹kyūṅki ai rabb, tere dushmanoṅ ne mujhe lān-tān kī, unhoṅ ne tere masah kie hue ḵẖādim ko har qadam par lān-tān kī hai!

⁵²abad tak rabb kī hamd ho! āmīn, phir āmīn.