chauthī kitāb 90-106

fānī insān allāh meṅ panāh le

¹mard-e-ḵẖudā mūsā kī duā.

ai rabb, pusht-dar-pusht tū hamārī panāhgāh rahā hai.

²is se pahale ki pahāṛ paidā hue aur tū zamīn aur duniyā ko vujūd meṅ lāyā tū hī thā. ai allāh, tū azal se abad tak hai.

³tū insān ko dubārā ḵẖāk hone detā hai. tū farmātā hai, ‘ai ādamazādo, dubārā ḵẖāk meṅ mil jāo!’

⁴kyūṅki terī nazar meṅ hazār sāl kal ke guzre hue din ke barābar yā rāt ke ek pahar kī mānind haiṅ.

⁵tū logoṅ ko sailāb kī tarah bahā le jātā hai, vah nīṅd aur us ghās kī mānind haiṅ jo subah ko phūṭ nikaltī hai.

⁶vah subah ko phūṭ nikaltī aur ugtī hai, lekin shām ko murjhā kar sūkh jātī hai.

⁷kyūṅki ham tere ġazab se fanā ho jāte aur tere qahar se havāsabāḵẖtā ho jāte haiṅ.

⁸tū ne hamārī ḵẖatāoṅ ko apne sāmne rakhā, hamāre poshīdā gunāhoṅ ko apne chihare ke nūr meṅ lāyā hai.

⁹chunāṅche hamāre tamām din tere qahar ke tahat ghaṭte ghaṭte ḵẖatm ho jāte haiṅ. jab ham apne sāloṅ ke iḵẖtitām par pahuṅchte haiṅ to zindagī sard āh ke barābar hī hotī hai.

¹⁰hamārī umr 70 sāl yā agar ziyādā tāqat ho to 80 sāl tak pahuṅchtī hai, aur jo din faḵẖar kā bāis the vah bhī taklīfdih aur bekār haiṅ. jald hī vah guzar jāte haiṅ, aur ham parindoṅ kī tarah uṛ kar chale jāte haiṅ.

¹¹kaun tere ġazab kī pūrī shiddat jāntā hai? kaun samajhtā hai ki terā qahar hamārī ḵẖudātarasī kī kamī ke mutābiq hī hai?

¹²chunāṅche hameṅ hamāre dinoṅ kā sahīh hisāb karnā sikhā tāki hamāre dil dānishmand ho jāeṅ.

¹³ai rabb, dubārā hamārī taraf rujū farmā! tū kab tak dūr rahegā? apne ḵẖādimoṅ par taras khā!

¹⁴subah ko hameṅ apnī shafqat se ser kar! tab ham zindagī bhar bāġ bāġ hoṅge aur ḵẖushī manāeṅge.

¹⁵hameṅ utne hī din ḵẖushī dilā jitne tū ne hameṅ past kiyā hai, utne hī sāl jitne hameṅ dukh sahanā paṛā hai.

¹⁶apne ḵẖādimoṅ par apne kām aur un kī aulād par apnī azmat zāhir kar.

¹⁷rabb hamārā ḵẖudā hameṅ apnī meharbānī dikhāe. hamāre hāthoṅ kā kām mazbūt kar, hāṅ hamāre hāthoṅ kā kām mazbūt kar