Zabūr 91

¹jo allāh t’ālā kī panāh meṅ rahe vah qādir-e-mutlaq ke sāy meṅ sukūnat karegā.

²maiṅ kahūṅgā, “ai rabb, tū merī panāh aur merā qil’ā hai, merā ḵẖudā jis par maiṅ bharosā rakhtā hūṅ.”

³kyūṅki vah tujhe chiṛīmār ke phaṅde aur muhalak marz se chhuṛāegā.

⁴vah tujhe apne shāhaparoṅ ke nīche ḍhāṁp legā, aur tū us ke paroṅ tale panāh le sakegā. us kī vafādārī terī ḍhāl aur pushtā rahegī.

⁵rāt kī dahshatoṅ se ḵẖauf mat khā, na us tīr se jo din ke vaqt chale.

⁶us muhalak marz se dahshat mat khā jo tārīkī meṅ ghūme phire, na us vabāī bīmārī se jo dopahar ke vaqt tabāhī phailāe.

⁷go tere sāth khaṛe hazār afrād halāk ho jāeṅ aur tere dahane hāth das hazār mar jāeṅ, lekin tū us kī zad meṅ nahīṅ āegā.

⁸tū apnī āṅkhoṅ se is kā mulāhazā karegā, tū ḵẖud bedīnoṅ kī sazā dekhegā.

⁹kyūṅki tū ne kahā hai, “rabb merī panāhgāh hai,” tū allāh t’ālā ke sāy meṅ chhup gayā hai.

¹⁰is liye terā kisī balā se vāstā nahīṅ paṛegā, koī āfat bhī tere ḵẖaime ke qarīb phaṭakne nahīṅ pāegī.

¹¹kyūṅki vah apne farishtoṅ ko har rāh par terī hifāzat karne kā hukm degā,

¹²aur vah tujhe apne hāthoṅ par uṭhā leṅge tāki tere pāoṅ ko patthar se ṭhes na lage.

¹³tū sherbabroṅ aur zaharīle sāṁpoṅ par qadam rakhegā, tū javān sheroṅ aur ajhdahāoṅ ko kuchal degā.

¹⁴rabb farmātā hai, “chūṅki vah mujh se lipṭā rahatā hai is liye maiṅ use bachāūṅgā. chūṅki vah merā nām jāntā hai is liye maiṅ use mahfūz rakhūṅgā.

¹⁵vah mujhe pukāregā to maiṅ us kī sunūṅgā. musībat meṅ maiṅ us ke sāth hūṅgā. maiṅ use chhuṛā kar us kī izzat karūṅgā.

¹⁶maiṅ use umr kī darāzī baḵẖshūṅgā aur us par apnī najāt zāhir karūṅgā.”