Zabūr 92

¹zabūr. sabat ke liye gīt.

rabb kā shukr karnā bhalā hai. ai allāh t’ālā, tere nām kī madahsarāī karnā bhalā hai.

²subah ko terī shafqat aur rāt ko terī vafā kā elān karnā bhalā hai,

³ḵẖāskar jab sāth sāth das tāroṅ vālā sāz, sitār aur sarod bajte haiṅ.

⁴kyūṅki ai rabb, tū ne mujhe apne kāmoṅ se ḵẖush kiyā hai, aur tere hāthoṅ ke kām dekh kar maiṅ ḵẖushī ke nāre lagātā hūṅ.

⁵ai rabb, tere kām kitne azīm, tere ḵẖayālāt kitne gahare haiṅ.

⁶nādān yah nahīṅ jāntā, ahamaq ko is kī samajh nahīṅ ātī.

⁷go bedīn ghās kī tarah phūṭ nikalte aur badkār sab phalte phūlte haiṅ, lekin āḵẖirkār vah hameshā ke liye halāk ho jāeṅge.

⁸magar tū, ai rabb, abad tak sarbuland rahegā.

⁹kyūṅki tere dushman, ai rabb, tere dushman yaqīnan tabāh ho jāeṅge, badkār sab tittar-bittar ho jāeṅge.

¹⁰tū ne mujhe jaṅglī bail kī sī tāqat de kar tāzā tel se masah kiyā hai.

¹¹merī āṅkh apne dushmanoṅ kī shikast se aur mere kān un sharīroṅ ke anjām se lutf’andoz hue haiṅ jo mere ḵẖilāf uṭh khaṛe hue haiṅ.

¹²rāstbāz khajūr ke daraḵẖt kī tarah phale phūlegā, vah lubnān ke deodār ke daraḵẖt kī tarah baṛhegā.

¹³jo paude rabb kī sukūnatgāh meṅ lagāe gae haiṅ vah hamāre ḵẖudā kī bārgāhoṅ meṅ phaleṅ phūleṅge.

¹⁴vah buṛhāpe meṅ bhī phal lāeṅge aur tar-o-tāzā aur hare-bhare raheṅge.

¹⁵us vaqt bhī vah elān kareṅge, “rabb rāst hai. vah merī chaṭān hai, aur us meṅ nārāstī nahīṅ hotī.”