Zabūr 94
qaum par zulm karne vāloṅ se rihāī ke liye duā
1ai rabb, ai intiqām lene vāle ḵẖudā! ai intiqām lene vāle ḵẖudā, apnā nūr chamkā.
2ai duniyā ke munsif, uṭh kar maġrūroṅ ko un ke āmāl kī munāsib sazā de.
3ai rabb, bedīn kab tak, hāṅ kab tak fatah ke nāre lagāeṅge?
4vah kufr kī bāteṅ ugalte rahate, tamām badkār sheḵẖī mārte rahate haiṅ.
5ai rabb, vah terī qaum ko kuchal rahe, terī maurūsī milkiyat par zulm kar rahe haiṅ.
6bevāoṅ aur ajnabiyoṅ ko vah maut ke ghāṭ utār rahe, yatīmoṅ ko qatl kar rahe haiṅ.
7vah kahate haiṅ, “yah rabb ko nazar nahīṅ ātā, yāqūb kā ḵẖudā dhyān hī nahīṅ detā.”
8ai qaum ke nādāno, dhyān do! ai ahamqo, tumheṅ kab samajh āegī?
9jis ne kān banāyā, kyā vah nahīṅ suntā? jis ne āṅkh ko tashkīl diyā kyā vah nahīṅ dekhtā?
10jo aqvām ko tambīh kartā aur insān ko tālīm detā hai kyā vah sazā nahīṅ detā?
11rabb insān ke ḵẖayālāt jāntā hai, vah jāntā hai ki vah dam bhar ke hī haiṅ.
12ai rabb, mubārak hai vah jise tū tarbiyat detā hai, jise tū apnī sharīat kī tālīm detā hai
13tāki vah musībat ke dinoṅ se ārām pāe aur us vaqt tak sukūn se zindagī guzāre jab tak bedīnoṅ ke liye gaṛhā tayyār na ho.
14kyūṅki rabb apnī qaum ko radd nahīṅ karegā, vah apnī maurūsī milkiyat ko tark nahīṅ karegā.
15faisle dubārā insāf par mabnī hoṅge, aur tamām diyānatdār dil us kī pairvī kareṅge.
16kaun sharīroṅ ke sāmne merā difā karegā? kaun mere liye badkāroṅ kā sāmnā karegā?
17agar rabb merā sahārā na hotā to merī jān jald hī ḵẖāmoshī ke mulk meṅ jā bastī.
18ai rabb, jab maiṅ bolā, “merā pāoṅ ḍagmagāne lagā hai” to terī shafqat ne mujhe saṁbhālā.
19jab tashvīshanāk ḵẖayālāt mujhe bechain karne lage to terī tasalliyoṅ ne merī jān ko tāzādam kiyā.
20ai allāh, kyā tabāhī kī hukūmat tere sāth muttahid ho saktī hai, aisī hukūmat jo apne farmānoṅ se zulm kartī hai? hargiz nahīṅ!
21vah rāstbāz kī jān lene ke liye āpas meṅ mil jāte aur bequsūroṅ ko qātil ṭhaharāte haiṅ.
22lekin rabb merā qil’ā ban gayā hai, aur merā ḵẖudā merī panāh kī chaṭān sābit huā hai.
23vah un kī nāinsāfī un par vāpas āne degā aur un kī sharīr harkatoṅ ke javāb meṅ unheṅ tabāh karegā. rabb hamārā ḵẖudā unheṅ nest karegā.