Zabūr 95
parastish aur faramāṁbardārī kī dāvat
1āo, ham shādiyānā bajā kar rabb kī madahsarāī kareṅ, ḵẖushī ke nāre lagā kar apnī najāt kī chaṭān kī tamjīd kareṅ!
2āo, ham shukrguzārī ke sāth us ke huzūr āeṅ, gīt gā kar us kī sitāish kareṅ.
3kyūṅki rabb azīm ḵẖudā aur tamām mābūdoṅ par azīm bādshāh hai.
4us ke hāth meṅ zamīn kī gaharāiyāṅ haiṅ, aur pahāṛ kī bulandiyāṅ bhī usī kī haiṅ.
5samundar us kā hai, kyūṅki us ne use ḵẖalaq kiyā. ḵẖushkī us kī hai, kyūṅki us ke hāthoṅ ne use tashkīl diyā.
6āo ham sijdā kareṅ aur rabb apne ḵẖāliq ke sāmne jhuk kar ghuṭne ṭekeṅ.
7kyūṅki vah hamārā ḵẖudā hai aur ham us kī charāgāh kī qaum aur us ke hāth kī bheṛeṅ haiṅ. agar tum āj us kī āvāz suno
8“to apne diloṅ ko saḵẖt na karo jis tarah marībā meṅ huā, jis tarah registān meṅ massā meṅ huā.
9vahāṅ tumhāre bāpdādā ne mujhe āzmāyā aur jāṅchā, hālāṅki unhoṅ ne mere kām dekh liye the.
10chālīs sāl maiṅ us nasal se ghin khātā rahā. maiṅ bolā, ‘un ke dil hameshā sahīh rāh se haṭ jāte haiṅ, aur vah merī rāheṅ nahīṅ jānte.’
11apne ġazab meṅ maiṅ ne qasam khāī, ‘yah kabhī us mulk meṅ dāḵẖil nahīṅ hoṅge jahāṅ maiṅ unheṅ sukūn detā’.”