Zabūr 96
duniyā kā ḵẖāliq aur munsif
1rabb kī tamjīd meṅ nayā gīt gāo, ai pūrī duniyā, rabb kī madahsarāī karo.
2rabb kī tamjīd meṅ gīt gāo, us ke nām kī sitāish karo, roz-ba-roz us kī najāt kī ḵẖushḵẖabarī sunāo.
3qaumoṅ meṅ us kā jalāl aur tamām ummatoṅ meṅ us ke ajāib bayān karo.
4kyūṅki rabb azīm aur sitāish ke bahut lāiq hai. vah tamām mābūdoṅ se mahīb hai.
5kyūṅki dīgar qaumoṅ ke tamām mābūd but hī haiṅ jabki rabb ne āsmān ko banāyā.
6us ke huzūr shān-o-shaukat, us ke maqdis meṅ qudrat aur jalāl hai.
7ai qaumoṅ ke qabīlo, rabb kī tamjīd karo, rabb ke jalāl aur qudrat kī sitāish karo.
8rabb ke nām ko jalāl do. qurbānī le kar us kī bārgāhoṅ meṅ dāḵẖil ho jāo.
9muqaddas libās se ārāstā ho kar rabb ko sijdā karo. pūrī duniyā us ke sāmne laraz uṭhe.
10qaumoṅ meṅ elān karo, “rabb hī bādshāh hai! yaqīnan duniyā mazbūtī se qāim hai aur nahīṅ ḍagmagāegī. vah insāf se qaumoṅ kī adālat karegā.”
11āsmān ḵẖush ho, zamīn jashn manāe! samundar aur jo kuchh us meṅ hai ḵẖushī se garaj uṭhe.
12maidān aur jo kuchh us meṅ hai bāġ bāġ ho. phir jaṅgal ke daraḵẖt shādiyānā bajāeṅge.
13vah rabb ke sāmne shādiyānā bajāeṅge, kyūṅki vah ā rahā hai, vah duniyā kī adālat karne ā rahā hai. vah insāf se duniyā kī adālat karegā aur apnī sadāqat se aqvām kā faislā karegā.