Zabūr 97
allāh kī saltanat par ḵẖushī
1rabb bādshāh hai! zamīn jashn manāe, sāhilī ilāqe dūr dūr tak ḵẖush hoṅ.
2vah bādloṅ aur gahare aṅdhere se ghirā rahatā hai, rāstī aur insāf us ke taḵẖt kī bunyād haiṅ.
3āg us ke āge āge bhaṛak kar chāroṅ taraf us ke dushmanoṅ ko bhasm kar detī hai.
4us kī kaṛaktī bijliyoṅ ne duniyā ko raushan kar diyā to zamīn yah dekh kar pech-o-tāb khāne lagī.
5rabb ke āge āge, hāṅ pūrī duniyā ke mālik ke āge āge pahāṛ mom kī tarah pighal gae.
6āsmānoṅ ne us kī rāstī kā elān kiyā, aur tamām qaumoṅ ne us kā jalāl dekhā.
7tamām butparast, hāṅ sab jo butoṅ par faḵẖar karte haiṅ sharmindā hoṅ. ai tamām mābūdo, use sijdā karo!
8koh-e-siyyūn sun kar ḵẖush huā. ai rabb, tere faisloṅ ke bāis yahūdāh kī beṭiyāṅ [a] ek aur mumkinā tarjumā : yahūdāh kī ābādiyāṅ. bāġ bāġ huīṅ.
9kyūṅki tū ai rabb, pūrī duniyā par sab se ālā hai, tū tamām mābūdoṅ se sarbuland hai.
10tum jo rabb se muhabbat rakhte ho, burāī se nafrat karo! rabb apne īmāndāroṅ kī jān ko mahfūz rakhtā hai, vah unheṅ bedīnoṅ ke qabze se chhuṛātā hai.
11rāstbāz ke liye nūr kā aur dil ke diyānatdāroṅ ke liye shādmānī kā bīj boyā gayā hai.
12ai rāstbāzo, rabb se ḵẖush ho, us ke muqaddas nām kī sitāish karo.