Zabūr 98

pūrī duniyā kā shāhī munsif

¹rabb kī tamjīd meṅ nayā gīt gāo, kyūṅki us ne mojize kie haiṅ. apne dahane hāth aur muqaddas bāzū se us ne najāt dī hai.

²rabb ne apnī najāt kā elān kiyā aur apnī rāstī qaumoṅ ke rū-ba-rū zāhir kī hai.

³us ne isrāīl ke liye apnī shafqat aur vafā yād kī hai. duniyā kī intihāoṅ ne sab hamāre ḵẖudā kī najāt dekhī hai.

⁴ai pūrī duniyā, nāre lagā kar rabb kī madahsarāī karo! āpe meṅ na samāo aur jashn manā kar hamd ke gīt gāo!

⁵sarod bajā kar rabb kī madahsarāī karo, sarod aur gīt se us kī sitāish karo.

⁶turam aur narsiṅgā phūṅk kar rabb bādshāh ke huzūr ḵẖushī ke nāre lagāo!

⁷samundar aur jo kuchh us meṅ hai, duniyā aur us ke bāshinde ḵẖushī se garaj uṭheṅ.

⁸daryā tāliyāṅ bajāeṅ, pahāṛ mil kar ḵẖushī manāeṅ,

⁹vah rabb ke sāmne ḵẖushī manāeṅ. kyūṅki vah zamīn kī adālat karne ā rahā hai. vah insāf se duniyā kī adālat karegā, rāstī se qaumoṅ kā faislā karegā.