Zabūr 99

quddūs ḵẖudā

¹rabb bādshāh hai, aqvām laraz uṭheṅ! vah karūbī farishtoṅ ke darmiyān taḵẖtnashīn hai, duniyā ḍagamagāe!

²koh-e-siyyūn par rabb azīm hai, tamām aqvām par sarbuland hai.

³vah tere azīm aur purjalāl nām kī sitāish kareṅ, kyūṅki vah quddūs hai.

⁴vah bādshāh kī qudrat kī tamjīd kareṅ jo insāf se piyār kartā hai. ai allāh, tū hī ne adal qāim kiyā, tū hī ne yāqūb meṅ insāf aur rāstī paidā kī hai.

⁵rabb hamāre ḵẖudā kī tāzīm karo, us ke pāoṅ kī chaukī ke sāmne sijdā karo, kyūṅki vah quddūs hai.

⁶mūsā aur hārūn us ke imāmoṅ meṅ se the. samūel bhī un meṅ se thā jo us kā nām pukārte the. unhoṅ ne rabb ko pukārā, aur us ne un kī sunī.

⁷vah bādal ke satūn meṅ se un se hamkalām huā, aur vah un ahkām aur farmānoṅ ke tābe rahe jo us ne unheṅ die the.

⁸ai rabb hamāre ḵẖudā, tū ne un kī sunī. tū jo allāh hai unheṅ muāf kartā rahā, alabattā unheṅ un kī burī harkatoṅ kī sazā bhī detā rahā.

⁹rabb hamāre ḵẖudā kī tāzīm karo aur us ke muqaddas pahāṛ par sijdā karo, kyūṅki rabb hamārā ḵẖudā quddūs hai.