گِنتی 2

خیمہ گاہ میں قبیلوں کی ترتیب

¹رب نے موسیٰ اور ہارون سے کہا ²کہ اسرائیلی اپنے خیمے کچھ فاصلے پر ملاقات کے خیمے کے ارد گرد لگائیں۔ ہر ایک اپنے اپنے علَم اور اپنے اپنے آبائی گھرانے کے نشان کے ساتھ خیمہ زن ہو۔

³اِن ہدایات کے مطابق مقدِس کے مشرق میں یہوداہ کا علَم تھا جس کے ارد گرد تین دستے خیمہ زن تھے۔ پہلے، یہوداہ کا قبیلہ جس کا کمانڈر نحسون بن عمی نداب تھا، ⁴اور جس کے لشکر کے 74,600 فوجی تھے۔ ⁵دوسرے، اِشکار کا قبیلہ جس کا کمانڈر نتنی ایل بن ضُغر تھا، ⁶اور جس کے لشکر کے 54,400 فوجی تھے۔ ⁷تیسرے، زبولون کا قبیلہ جس کا کمانڈر اِلیاب بن حیلون تھا ⁸اور جس کے لشکر کے 57,400 فوجی تھے۔ ⁹تینوں قبیلوں کے فوجیوں کی کُل تعداد 1,86,400 تھی۔ روانہ ہوتے وقت یہ آگے چلتے تھے۔

¹⁰مقدِس کے جنوب میں روبن کا علَم تھا جس کے ارد گرد تین دستے خیمہ زن تھے۔ پہلے، روبن کا قبیلہ جس کا کمانڈر اِلی صور بن شدیور تھا، ¹¹اور جس کے 46,500 فوجی تھے۔ ¹²دوسرے، شمعون کا قبیلہ جس کا کمانڈر سلومی ایل بن صوری شدی تھا، ¹³اور جس کے 59,300 فوجی تھے۔ ¹⁴تیسرے، جد کا قبیلہ جس کا کمانڈر اِلیاسف بن دعوایل تھا، ¹⁵اور جس کے 45,650 فوجی تھے۔ ¹⁶تینوں قبیلوں کے فوجیوں کی کُل تعداد 1,51,450 تھی۔ روانہ ہوتے وقت یہ مشرقی قبیلوں کے پیچھے چلتے تھے۔

¹⁷اِن جنوبی قبیلوں کے بعد لاوی ملاقات کا خیمہ اُٹھا کر قبیلوں کے عین بیچ میں چلتے تھے۔ قبیلے اُس ترتیب سے روانہ ہوتے تھے جس ترتیب سے وہ اپنے خیمے لگاتے تھے۔ ہر قبیلہ اپنے علَم کے پیچھے چلتا تھا۔

¹⁸مقدِس کے مغرب میں افرائیم کا علَم تھا جس کے ارد گرد تین دستے خیمہ زن تھے۔ پہلے، افرائیم کا قبیلہ جس کا کمانڈر اِلی سمع بن عمی ہود تھا، ¹⁹اور جس کے 40,500 فوجی تھے۔ ²⁰دوسرے، منسّی کا قبیلہ جس کا کمانڈر جملی ایل بن فدا ہصور تھا، ²¹اور جس کے 32,200 فوجی تھے۔ ²²تیسرے، بن یمین کا قبیلہ جس کا کمانڈر ابدان بن جدعونی تھا، ²³اور جس کے 35,400 فوجی تھے۔ ²⁴تینوں قبیلوں کے فوجیوں کی کُل تعداد 1,08,100 تھی۔ روانہ ہوتے وقت یہ جنوبی قبیلوں کے پیچھے چلتے تھے۔

²⁵مقدِس کے شمال میں دان کا علَم تھا جس کے ارد گرد تین دستے خیمہ زن تھے۔ پہلے، دان کا قبیلہ جس کا کمانڈر اخی عزر بن عمی شدی تھا، ²⁶اور جس کے 62,700 فوجی تھے۔ ²⁷دوسرے، آشر کا قبیلہ جس کا کمانڈر فجعی ایل بن عکران تھا، ²⁸اور جس کے 41,500 فوجی تھے۔ ²⁹تیسرے، نفتالی کا قبیلہ جس کا کمانڈر اخیرع بن عینان تھا، ³⁰اور جس کے 53,400 فوجی تھے۔ ³¹تینوں قبیلوں کی کُل تعداد 1,57,600 تھی۔ وہ آخر میں اپنا علَم اُٹھا کر روانہ ہوتے تھے۔

³²پوری خیمہ گاہ کے فوجیوں کی کُل تعداد 6,03,550 تھی۔ ³³صرف لاوی اِس تعداد میں شامل نہیں تھے، کیونکہ رب نے موسیٰ کو حکم دیا تھا کہ اُن کی بھرتی نہ کی جائے۔

³⁴یوں اسرائیلیوں نے سب کچھ اُن ہدایات کے مطابق کیا جو رب نے موسیٰ کو دی تھیں۔ اُن کے مطابق ہی وہ اپنے جھنڈوں کے ارد گرد اپنے خیمے لگاتے تھے اور اُن کے مطابق ہی اپنے کنبوں اور آبائی گھرانوں کے ساتھ روانہ ہوتے تھے۔