Ḵẖurooj 11
aakhiree saza ka elaan
1tab rabb nay moosa say kaha, “ab main firaaun aur misr par aakhiree aafat laanay ko hon. is kay baad vah tumhen jaanay dega balki tumhen zabardastee nikaal dega. 2israaeeliyon ko bata dena ki har mard apnay padosee aur har aurat apnee padosan say sonay-chaandee kee cheezen maang lay.” 3(rabb nay misriyon kay dil israaeeliyon kee taraf maail kar diay thay. vah firaaun kay uhdedaaron samet khaaskar moosa kee badee izzat kartay thay).
4moosa nay kaha, “rabb farmaata hai, ‘aaj aadhee raat kay vaqt main misr men say guzaroonga. 5tab baadshaah kay pahelauthay say lay kar chakkee peesnay vaalee naukraanee kay pahelauthay tak misriyon ka har pahelautha mar jaaega. chaupaaiyon kay pahelauthay bhee mar jaaengay. 6misr kee sarzameen par aisa rona peetna hoga ki na maazee men kabhee hua, na mustaqbil men kabhee hoga. 7lekin israaeelee aur un kay jaanvar bachay rahengay. kutta bhee un par naheen bhaunkega. is tarah tum jaan logay ki rabb israaeeliyon kee nisbat misriyon say farq sulook karta hai’.” 8moosa nay yah kuchh firaaun ko bataaya phir kaha, “us vaqt aap kay tamaam uhdedaar a kar meray saamnay jhuk jaaengay aur minnat karengay, ‘apnay pairokaaron kay saath chalay jaaen.’ tab main chala hee jaaoonga.” yah kah kar moosa firaaun kay paas say chala gaya. vah baday ghussay men tha.
9rabb nay moosa say kaha tha, “firaaun tumhaaree naheen sunega. kyoonki laazim hai ki main misr men apnee qudrat ka mazeed izhaar karoon.” 10go moosa aur haaroon nay firaaun kay saamnay yah tamaam mojizay dikhaaay, lekin rabb nay firaaun ko ziddee banaaay rakha, is liyay us nay israaeeliyon ko mulk chhodnay na diya.