Ḵẖurooj 12
fasah kee eed
1phir rabb nay misr men moosa aur haaroon say kaha, 2“ab say yah maheena tumhaaray liyay saal ka pahela maheena ho.” 3israaeel kee pooree jamaaat ko bataana ki is maheenay kay dasven din har khaandaan ka sarparast apnay gharaanay kay liyay lela yaanee bhed ya bakree ka bachcha haasil karay. 4agar gharaanay kay afraad poora jaanvar khaanay kay liyay kam hon to vah apnay sab say qareebee padosee kay saath mil kar lela haasil karen. itnay log us men say khaaen ki sab kay liyay kaafee ho aur poora jaanvar khaaya jaaay. 5is kay liyay ek saal ka nar bachcha chun lena jis men nuqs na ho. vah bhed ya bakree ka bachcha ho sakta hai.
6maheenay kay 14ven din tak us kee dekh-bhaal karo. us din tamaam israaeelee sooraj kay ghuroob hotay vaqt apnay lelay zabah karen. 7har khaandaan apnay jaanvar ka kuchh khoon jama karkay usay us ghar kay darvaazay kee chaukhat par lagaaay jahaan lela khaaya jaaega. yah khoon chaukhat kay oopar vaalay hissay aur daaen baaen kay baazooon par lagaaya jaaay. 8laazim hai ki log jaanvar ko bhoon kar usee raat khaaen. saath hee vah kadva saag-paat aur bekhameeree rotiyaan bhee khaaen. 9lelay ka gosht kachcha na khaana, na usay paanee men ubaalna balki pooray jaanvar ko sar, pairon aur androonee hisson samet aag par bhoonna. 10laazim hai ki poora gosht usee raat khaaya jaaay. agar kuchh subah tak bach jaaay to usay jalaana hai. 11khaana khaatay vaqt aisa libaas pahenna jaisay tum safar par ja rahay ho. apnay jootay pahenay rakhna aur haath men safar kay liyay laathee liyay huay tum usay jaldee jaldee khaana. rabb kay fasah kee eed yoon manaana.
12main aaj raat misr men say guzaroonga aur har pahelauthay ko jaan say maar doonga, khwaah insaan ka ho ya haivaan ka. yoon main jo rabb hoon misr kay tamaam devtaaon kee adaalat karoonga. 13lekin tumhaaray gharon par laga hua khoon tumhaara khaas nishaan hoga. jis jis ghar kay darvaazay par main vah khoon dekhoonga usay chhodta jaaoonga. jab main misr par hamla karoonga to muhalak vaba tum tak naheen pahunchegee. 14aaj kee raat ko hamesha yaad rakhna. isay nasal-dar-nasal aur har saal rabb kee khaas eed kay taur par manaana.
bekhameeree rotee kee eed
15saat din tak bekhameeree rotee khaana hai. pahelay din apnay gharon say tamaam khameer nikaal dena. agar koee in saat dinon kay dauraan khameer khaaay to usay qaum men say mitaaya jaaay. 16is eed kay pahelay aur aakhiree din muqaddas ijtima mun’aqid karna. in tamaam dinon kay dauraan kaam na karna. sirf ek kaam kee ijaazat hai aur vah hai apna khaana tayyaar karna. 17bekhameeree rotee kee eed manaana laazim hai, kyoonki us din main tumhaaray mut’addid khaandaanon ko misr say nikaal laaya. is liyay yah din nasal-dar-nasal har saal yaad rakhna. 18pahelay maheenay kay 14ven din kee shaam say lay kar 21ven din kee shaam tak sirf bekhameeree rotee khaana. 19saat din tak tumhaaray gharon men khameer na paaya jaaay. jo bhee is dauraan khameer khaaay usay israaeel kee jamaaat men say mitaaya jaaay, khwaah vah israaeelee shaheree ho ya ajnabee. 20gharaz, is eed kay dauraan khameer na khaana. jahaan bhee tum rahetay ho vahaan bekhameeree rotee hee khaana hai.
pahelauthon kee halaakat
21phir moosa nay tamaam israaeelee buzurgon ko bula kar un say kaha, “jaao, apnay khaandaanon kay liyay bhed ya bakree kay bachchay chun kar unhen fasah kee eed kay liyay zabah karo. 22zoofay ka guchchha lay kar usay khoon say bharay huay baasan men dubo dena. phir usay lay kar khoon ko chaukhat kay oopar vaalay hissay aur daaen baaen kay baazooon par laga dena. subah tak koee apnay ghar say na niklay. 23jab rabb misriyon ko maar daalnay kay liyay mulk men say guzrega to vah chaukhat kay oopar vaalay hissay aur daaen baaen kay baazooon par laga hua khoon dekh kar un gharon ko chhod dega. vah halaak karnay vaalay farishtay ko ijaazat naheen dega ki vah tumhaaray gharon men ja kar tumhen halaak karay.
24tum apnee aulaad samet hamesha in hidaayaat par amal karna. 25yah rasm us vaqt bhee ada karna jab tum us mulk men pahunchogay jo rabb tumhen dega. 26aur jab tumhaaray bachchay tum say poochhen ki ham yah eed kyoon manaatay hain 27to un say kaho, ‘yah fasah kee qurbaanee hai jo ham rabb ko pesh kartay hain. kyoonki jab rabb misriyon ko halaak kar raha tha to us nay hamaaray gharon ko chhod diya tha’.”
yah sun kar israaeeliyon nay allaah ko sijda kiya. 28phir unhon nay sab kuchh vaisa hee kiya jaisa rabb nay moosa aur haaroon ko bataaya tha.
29aadhee raat ko rabb nay baadshaah kay pahelauthay say lay kar jel kay qaidee kay pahelauthay tak misriyon kay tamaam pahelauthon ko jaan say maar diya. chaupaaiyon kay pahelauthay bhee mar gaay. 30us raat misr kay har ghar men koee na koee mar gaya. firaaun, us kay uhdedaar aur misr kay tamaam log jaag uthay aur zor zor say ronay aur cheekhnay lagay.
israaeeliyon kee hijrat
31abhee raat thee ki firaaun nay moosa aur haaroon ko bula kar kaha, “ab tum aur baaqee israaeelee meree qaum men say nikal jaao. apnee darakhwaast kay mutaabiq rabb kee ibaadat karo. 32jis tarah tum chaahatay ho apnee bhed-bakriyon ko bhee apnay saath lay jaao. aur mujhay bhee barkat dena.” 33baaqee misriyon nay bhee israaeeliyon par zor day kar kaha, “jaldee jaldee mulk say nikal jaao, varna ham sab mar jaaengay.”
34israaeeliyon kay goondhay huay aatay men khameer naheen tha. unhon nay usay goondhnay kay bartanon men rakh kar apnay kapdon men lapet liya aur safar kartay vaqt apnay kandhon par rakh liya. 35israaeelee moosa kee hidaayat par amal karkay apnay misree padosiyon kay paas gaay aur un say kapday aur sonay-chaandee kee cheezen maangeen. 36rabb nay misriyon kay dilon ko israaeeliyon kee taraf maail kar diya tha, is liyay unhon nay un kee har darakhwaast pooree kee. yoon israaeeliyon nay misriyon ko loot liya.
37israaeelee raamsees say ravaana ho kar sukkaat pahunch gaay. aurton aur bachchon ko chhod kar un kay 6 laakh mard thay. 38vah apnay bhed-bakriyon aur gaay-bailon kay baday baday revad bhee saath lay gaay. bahut say aisay log bhee un kay saath niklay jo israaeelee naheen thay. 39raastay men unhon nay us bekhameeree aatay say rotiyaan banaaeen jo vah saath lay kar niklay thay. aatay men is liyay khameer naheen tha ki unhen itnee jaldee say misr say nikaal diya gaya tha ki khaana tayyaar karnay ka vaqt hee na mila tha.
40israaeelee 430 saal tak misr men rahay thay. 41430 saal kay ain baad, usee din rabb kay yah tamaam khaandaan misr say niklay. 42us khaas raat rabb nay khud pahera diya taaki israaeelee misr say nikal saken. is liyay tamaam israaeeliyon kay liyay laazim hai ki vah nasal-dar-nasal is raat rabb kee taazeem men jaagtay rahen, vah bhee aur un kay baad kee aulaad bhee.
fasah kee eed kee hidaayaat
43rabb nay moosa aur haaroon say kaha, “fasah kee eed kay yah usool hain :
kisee bhee pardesee ko fasah kee eed ka khaana khaanay kee ijaazat naheen hai. 44agar tum nay kisee ghulaam ko khareed kar us ka khatna kiya hai to vah fasah ka khaana kha sakta hai. 45lekin ghairshaheree ya mazdoor ko fasah ka khaana khaanay kee ijaazat naheen hai. 46yah khaana ek hee ghar kay andar khaana hai. na gosht ghar say baahar lay jaana, na lelay kee kisee haddee ko todna. 47laazim hai ki israaeel kee pooree jamaaat yah eed manaaay. 48agar koee pardesee tumhaaray saath raheta hai jo fasah kee eed men shirkat karna chaahay to laazim hai ki pahelay us kay gharaanay kay har mard ka khatna kiya jaaay. tab vah israaeelee kee tarah khaanay men shareek ho sakta hai. lekin jis ka khatna na hua usay fasah ka khaana khaanay kee ijaazat naheen hai. 49yahee usool har ek par laagoo hoga, khwaah vah israaeelee ho ya pardesee.”
50tamaam israaeeliyon nay vaisa hee kiya jaisa rabb nay moosa aur haaroon say kaha tha. 51usee din rabb tamaam israaeeliyon ko khaandaanon kee tarteeb kay mutaabiq misr say nikaal laaya.