Ḵẖurooj 13
yah eed najaat kee yaad dilaatee
1rabb nay moosa say kaha, 2“israaeeliyon kay har pahelauthay ko meray liyay makhsoos-o-muqaddas karna hai. har pahela nar bachcha mera hee hai, khwaah insaan ka ho ya haivaan ka.” 3phir moosa nay logon say kaha, “is din ko yaad rakho jab tum rabb kee azeem qudrat kay baais misr kee ghulaamee say niklay. is din koee cheez na khaana jis men khameer ho. 4aaj hee abeeb kay maheene [a] maarch ta aprail. men tum misr say ravaana ho rahay ho. 5rabb nay tumhaaray baapdaada say qasam kha kar vaada kiya hai ki vah tum ko kan’aanee, hittee, amoree, hivvee aur yaboosee qaumon ka mulk dega, ek aisa mulk jis men doodh aur shahed kee kasrat hai. jab rabb tumhen us mulk men pahuncha dega to laazim hai ki tum isee maheenay men yah rasm manaao. 6saat din bekhameeree rotee khaao. saatven din rabb kee taazeem men eed manaao. 7saat din khameeree rotee na khaana. kaheen bhee khameer na paaya jaaay. pooray mulk men khameer ka naam-o-nishaan tak na ho.
8us din apnay betay say yah kaho, ‘main yah eed us kaam kee khushee men manaata hoon jo rabb nay meray liyay kiya jab main misr say nikla.’ 9yah eed tumhaaray haath ya peshaanee par nishaan kee maanind ho jo tumhen yaad dilaaay ki rabb kee shareeat ko tumhaaray honton par rahena hai. kyoonki rabb tumhen apnee azeem qudrat say misr say nikaal laaya. 10is din kee yaad har saal theek vaqt par manaana.
pahelauthon kee makhsoosiyat
11rabb tumhen kan’aaniyon kay us mulk men lay jaaega jis ka vaada us nay qasam kha kar tum aur tumhaaray baapdaada say kiya hai. 12laazim hai ki vahaan pahunch kar tum apnay tamaam pahelauthon ko rabb kay liyay makhsoos karo. tumhaaray maveshiyon kay tamaam pahelauthay bhee rabb kee milkiyat hain. 13agar tum apna pahelautha gadha khud rakhna chaaho to rabb ko us kay badlay bhed ya bakree ka bachcha pesh karo. lekin agar tum usay rakhna naheen chaahatay to us kee gardan tod daalo. lekin insaan kay pahelauthon kay liyay har soorat men ivzee dena hai.
14aanay vaalay dinon men jab tumhaara beta poochhay ki is ka kya matlab hai to usay javaab dena, ‘rabb apnee azeem qudrat say hamen misr kee ghulaamee say nikaal laaya. 15jab firaaun nay akad kar hamen jaanay na diya to rabb nay misr kay tamaam insaanon aur haivaanon kay pahelauthon ko maar daala. is vajah say main apnay jaanvaron ka har pahela bachcha rabb ko qurbaan karta aur apnay har pahelauthay kay liyay ivzee deta hoon’. 16yah dastoor tumhaaray haath aur peshaanee par nishaan kee maanind ho jo tumhen yaad dilaaay ki rabb hamen apnee qudrat say misr say nikaal laaya.”
misr say nikalnay ka raastaa
17jab firaaun nay israaeelee qaum ko jaanay diya to allaah unhen filistiyon kay ilaaqay men say guzarnay vaalay raastay say lay kar na gaya, agarchi us par chaltay huay vah jald hee mulk-ay-kan’aan pahunch jaatay. balki rabb nay kaha, “agar us raastay par chalengay to unhen doosron say ladna padega. aisa na ho ki vah is vajah say apna iraada badal kar misr laut jaaen.” 18is liyay allaah unhen doosray raastay say lay kar gaya, aur vah registaan kay raastay say baher-ay-qulzum kee taraf badhay. misr say nikaltay vaqt mard musallah thay. 19moosa yoosuf ka taaboot bhee apnay saath lay gaya, kyoonki yoosuf nay israaeeliyon ko qasam dila kar kaha tha, “allaah yaqeenan tumhaaree dekh-bhaal karkay vahaan lay jaaega. us vaqt meree haddiyon ko bhee utha kar saath lay jaana.”
20israaeeliyon nay sukkaat ko chhod kar etaam men apnay khaimay lagaaay. etaam registaan kay kinaaray par tha. 21rabb un kay aagay aagay chalta gaya, din kay vaqt baadal kay satoon men taaki unhen raastay ka pata lagay aur raat kay vaqt aag kay satoon men taaki unhen raushnee milay. yoon vah din aur raat safar kar saktay thay. 22din kay vaqt baadal ka satoon aur raat kay vaqt aag ka satoon un kay saamnay raha. vah kabhee bhee apnee jagah say na hata.