Ḵẖurooj 18
yitro say mulaaqaat
1moosa ka susar yitro ab tak midiyaan men imaam tha. jab us nay sab kuchh suna jo allaah nay moosa aur apnee qaum kay liyay kiya hai, ki vah unhen misr say nikaal laaya hai 2to vah moosa kay paas aaya. vah us kee beevee saffoora ko apnay saath laaya, kyoonki moosa nay usay apnay beton samet maikay bhej diya tha. 3yitro moosa kay donon beton ko bhee saath laaya. pahelay betay ka naam jairsom yaanee ‘ajnabee mulk men pardesee’ tha, kyoonki jab vah paida hua to moosa nay kaha tha, “main ajnabee mulk men pardesee hoon.” 4doosray betay ka naam ileeazar yaanee ‘mera khuda madadgaar hai’ tha, kyoonki jab vah paida hua to moosa nay kaha tha, “meray baap kay khuda nay meree madad karkay mujhay firaaun kee talvaar say bachaaya hai.”
5yitro moosa kee beevee aur betay saath lay kar us vaqt moosa kay paas pahuncha jab us nay registaan men allaah kay pahaad yaanee seena kay qareeb khaima lagaaya hua tha. 6us nay moosa ko paighaam bheja tha, “main, aap ka susar yitro aap kee beevee aur do beton ko saath lay kar aap kay paas a raha hoon.”
7moosa apnay susar kay istiqbaal kay liyay baahar nikla, us kay saamnay jhuka aur usay bosa diya. donon nay ek doosray ka haal poochha, phir khaimay men chalay gaay. 8moosa nay yitro ko tafseel say bataaya ki rabb nay israaeeliyon kee khaatir firaaun aur misriyon kay saath kya kuchh kiya hai. us nay raastay men pesh aaee tamaam mushkilaat ka zikr bhee kiya ki rabb nay hamen kis tarah un say bachaaya hai.
9yitro un saaray achchhay kaamon kay baaray men sun kar khush hua jo rabb nay israaeeliyon kay liyay kiay thay jab us nay unhen misriyon kay haath say bachaaya tha. 10us nay kaha, “rabb kee tamjeed ho jis nay aap ko misriyon aur firaaun kay qabzay say najaat dilaaee hai. usee nay qaum ko ghulaamee say chhudaaya hai! 11ab main nay jaan liya hai ki rabb tamaam maaboodon say azeem hai, kyoonki us nay yah sab kuchh un logon kay saath kiya jinhon nay apnay gharoor men israaeeliyon kay saath bura sulook kiya tha.” 12phir yitro nay allaah ko bhasm honay vaalee qurbaanee aur deegar kaee qurbaaniyaan pesh keen. tab haaroon aur tamaam buzurg moosa kay susar yitro kay saath allaah kay huzoor khaana khaanay baithay.
70 buzurgon ko muqarrar kiya jaata hai
13aglay din moosa logon ka insaaf karnay kay liyay baith gaya. un kee taadaad itnee ziyaada thee ki vah subah say lay kar shaam tak moosa kay saamnay khaday rahay. 14jab yitro nay yah sab kuchh dekha to us nay poochha, “yah kya hai jo aap logon kay saath kar rahay hain? saara din vah aap ko gheray rahetay aur aap un kee adaalat kartay rahetay hain. aap yah sab kuchh akelay hee kyoon kar rahay hain?”
15moosa nay javaab diya, “log meray paas a kar allaah kee marzee maaloom kartay hain. 16jab kabhee koee tanaazo ya jhagda hota hai to donon paartiyaan meray paas aatee hain. main faisla karkay unhen allaah kay ahkaam aur hidaayaat bataata hoon.”
17moosa kay susar nay us say kaha, “aap ka tareeqa achchha naheen hai. 18kaam itna vasee hai ki aap usay akelay naheen sambhaal saktay. is say aap aur vah log jo aap kay paas aatay hain buree tarah thak jaatay hain. 19meree baat sunen! main aap ko ek mashvra deta hoon. allaah us men aap kee madad karay. laazim hai ki aap allaah kay saamnay qaum kay numaainda rahen aur un kay muaamalaat us kay saamnay pesh karen. 20yah bhee zarooree hai ki aap unhen allaah kay ahkaam aur hidaayaat sikhaaen, ki vah kis tarah zindagee guzaaren aur kya kya karen. 21lekin saath saath qaum men say qaabil-ay-etimaad aadmee chunen. vah aisay log hon jo allaah ka khauf maantay hon, raastdil hon aur rishvat say nafrat kartay hon. unhen hazaar hazaar, sau sau, pachaas pachaas aur das das aadmiyon par muqarrar karen. 22un aadmiyon kee zimmaadaaree yah hogee ki vah har vaqt logon ka insaaf karen. agar koee bahut hee pecheeda muaamala ho to vah faislay kay liyay aap kay paas aaen, lekin deegar muaamlon ka faisla vah khud karen. yoon vah kaam men aap ka haath bataaengay aur aap ka bojh halka ho jaaega.
23agar mera yah mashvra allaah kee marzee kay mutaabiq ho aur aap aisa karen to aap apnee zimmaadaaree nibha sakengay aur yah tamaam log insaaf kay milnay par salaamatee kay saath apnay apnay ghar ja sakengay.”
24moosa nay apnay susar ka mashvra maan liya aur aisa hee kiya. 25us nay israaeeliyon men say qaabil-ay-etimaad aadmee chunay aur unhen hazaar hazaar, sau sau, pachaas pachaas aur das das aadmiyon par muqarrar kiya. 26yah mard qaazee ban kar mustaqil taur par logon ka insaaf karnay lagay. aasaan maslon ka faisla vah khud kartay aur mushkil muaamlon ko moosa kay paas lay aatay thay.
27kuchh arsay baad moosa nay apnay susar ko rukhsat kiya to yitro apnay vatan vaapas chala gaya.