Ḵẖurooj 19

koh-ay-seenaa

¹israaeeliyon ko misr say safar kartay huay do maheenay ho gaay thay. teesray maheenay kay pahelay hee din vah seena kay registaan men pahunchay. ²us din vah rafeedeem ko chhod kar dasht-ay-seena men a pahunchay. vahaan unhon nay registaan men pahaad kay qareeb deray daalay.

³tab moosa pahaad par chadh kar allaah kay paas gaya. allaah nay pahaad par say moosa ko pukaar kar kaha, “yaaqoob kay gharaanay banee israaeel ko bata, ⁴‘tum nay dekha hai ki main nay misriyon kay saath kya kuchh kiya, aur ki main tum ko uqaab kay paron par utha kar yahaan apnay paas laaya hoon. ⁵chunaanchay agar tum meree suno aur meray ahd kay mutaabiq chalo to phir tamaam qaumon men say meree khaas milkiyat hogay. go pooree duniya meree hee hai, ⁶lekin tum meray liyay makhsoos imaamon kee baadshaahee aur muqaddas qaum hogay.’ ab ja kar yah saaree baaten israaeeliyon ko bata.”

⁷moosa nay pahaad say utar kar aur qaum kay buzurgon ko bula kar unhen vah tamaam baaten bataaeen jo kahenay kay liyay rabb nay usay hukm diya tha. ⁸javaab men pooree qaum nay mil kar kaha, “ham rabb kee har baat pooree karengay jo us nay farmaaee hai.” moosa nay pahaad par laut kar rabb ko qaum ka javaab bataaya. ⁹jab vah pahuncha to rabb nay moosa say kaha, “main ghanay baadal men teray paas aaoonga taaki log mujhay tujh say hamkalaam hotay huay sunen. phir vah hamesha tujh par bharosa rakhengay.” tab moosa nay rabb ko vah tamaam baaten bataaeen jo logon nay kee theen.

¹⁰rabb nay moosa say kaha, “ab logon kay paas laut kar aaj aur kal unhen meray liyay makhsoos-o-muqaddas kar. vah apnay libaas dho kar ¹¹teesray din kay liyay tayyaar ho jaaen, kyoonki us din rabb logon kay dekhtay dekhtay koh-ay-seena par utrega. ¹²logon kee hifaazat kay liyay chaaron taraf pahaad kee hadden muqarrar kar. unhen khabardaar kar ki hudood ko paar na karo. na pahaad par chadho, na us kay daaman ko chhuo. jo bhee usay chhuay vah zaroor maara jaaay. ¹³aur usay haath say chhoo kar naheen maarna hai balki pattharon ya teeron say. khwaah insaan ho ya haivaan, vah zinda naheen rah sakta. jab tak narsinga der tak phoonka na jaaay us vaqt tak logon ko pahaad par chadhnay kee ijaazat naheen hai.”

¹⁴moosa nay pahaad say utar kar logon ko allaah kay liyay makhsoos-o-muqaddas kiya. unhon nay apnay libaas bhee dhoay. ¹⁵us nay un say kaha, “teesray din kay liyay tayyaar ho jaao. mard aurton say hambistar na hon.”

¹⁶teesray din subah pahaad par ghana baadal chha gaya. bijlee chamaknay lagee, baadal garajnay laga aur narsingay kee nihaayat zordaar aavaaz sunaaee dee. khaimaagaah men log laraz uthay. ¹⁷tab moosa logon ko allaah say milnay kay liyay khaimaagaah say baahar pahaad kee taraf lay gaya, aur vah pahaad kay daaman men khaday huay. ¹⁸seena pahaad dhuen say dhaka hua tha, kyoonki rabb aag men us par utar aaya. pahaad say dhuaan is tarah uth raha tha jaisay kisee bhattay say uthta hai. poora pahaad shiddat say laraznay laga. ¹⁹narsingay kee aavaaz tez say teztar hotee gaee. moosa bolnay laga aur allaah usay oonchee aavaaz men javaab deta raha.

²⁰rabb seena pahaad kee chotee par utra aur moosa ko oopar aanay kay liyay kaha. moosa oopar chadha. ²¹rabb nay moosa say kaha, “fauran neechay utar kar logon ko khabardaar kar ki vah mujhay dekhnay kay liyay pahaad kee hudood men zabardastee daakhil na hon. agar vah aisa karen to bahut say halaak ho jaaengay. ²²imaam bhee jo rabb kay huzoor aatay hain apnay aap ko makhsoos-o-muqaddas karen, varna mera ghazab un par toot padega.”

²³lekin moosa nay rabb say kaha, “log pahaad par naheen a saktay, kyoonki too nay khud hee hamen khabardaar kiya ki ham pahaad kee hadden muqarrar karkay usay makhsoos-o-muqaddas karen.”

²⁴rabb nay javaab diya, “to bhee utar ja aur haaroon ko saath lay kar vaapas a. lekin imaamon aur logon ko mat aanay day. agar vah zabardastee meray paas aaen to mera ghazab un par toot padega.”

²⁵moosa nay logon kay paas utar kar unhen yah baaten bata deen.