Paidaaish 1
duniya kee takhleeq ka pahela din : raushnee
1ibtida men allaah nay aasmaan aur zameen ko banaaya. 2abhee tak zameen veeraan aur khaalee thee. vah gaheray paanee say dhakee huee thee jis kay oopar andhera hee andhera tha. allaah ka rooh paanee kay oopar mandla raha tha.
3phir allaah nay kaha, “raushnee ho jaaay” to raushnee paida ho gaee. 4allaah nay dekha ki raushnee achchhee hai, aur us nay raushnee ko taareekee say alag kar diya. 5allaah nay raushnee ko din ka naam diya aur taareekee ko raat ka. shaam huee, phir subah. yoon pahela din guzar gaya.
doosra din : aasmaan
6allaah nay kaha, “paanee kay darmiyaan ek aisa gumbad paida ho jaaay jis say nichla paanee oopar kay paanee say alag ho jaaay.” 7aisa hee hua. allaah nay ek aisa gumbad banaaya jis say nichla paanee oopar kay paanee say alag ho gaya. 8allaah nay gumbad ko aasmaan ka naam diya. shaam huee, phir subah. yoon doosra din guzar gaya.
teesra din : khushk zameen aur paude
9allaah nay kaha, “jo paanee aasmaan kay neechay hai vah ek jagah jama ho jaaay taaki doosree taraf khushk jagah nazar aaay.” aisa hee hua. 10allaah nay khushk jagah ko zameen ka naam diya aur jamaashuda paanee ko samundar ka. aur allaah nay dekha ki yah achchha hai. 11phir us nay kaha, “zameen hariyaaval paida karay, aisay pauday jo beej rakhtay hon aur aisay darakht jin kay phal apnee apnee qism kay beej rakhtay hon.” aisa hee hua. 12zameen nay hariyaaval paida kee, aisay pauday jo apnee apnee qism kay beej rakhtay aur aisay darakht jin kay phal apnee apnee qism kay beej rakhtay thay. allaah nay dekha ki yah achchha hai. 13shaam huee, phir subah. yoon teesra din guzar gaya.
chautha din : sooraj, chaand aur sitaare
14allaah nay kaha, “aasmaan par raushniyaan paida ho jaaen taaki din aur raat men imtiyaaz ho aur isee tarah mukhtalif mausmon, dinon aur saalon men bhee. 15aasmaan kee yah raushniyaan duniya ko raushan karen.” aisa hee hua. 16allaah nay do badee raushniyaan banaaeen, sooraj jo bada tha din par hukoomat karnay ko aur chaand jo chhota tha raat par. in kay ilaava us nay sitaaron ko bhee banaaya. 17us nay unhen aasmaan par rakha taaki vah duniya ko raushan karen, 18din aur raat par hukoomat karen aur raushnee aur taareekee men imtiyaaz paida karen. allaah nay dekha ki yah achchha hai. 19shaam huee, phir subah. yoon chautha din guzar gaya.
paanchvaan din : paanee aur hava kay jaandaar
20allaah nay kaha, “paanee aabee jaandaaron say bhar jaaay aur fiza men parinday udtay phiren.” 21allaah nay baday baday samundaree jaanvar banaaay, paanee kee tamaam deegar makhlooqaat aur har qism kay par rakhnay vaalay jaandaar bhee banaaay. allaah nay dekha ki yah achchha hai. 22us nay unhen barkat dee aur kaha, “phalo phoolo aur taadaad men badhtay jaao. samundar tum say bhar jaaay. isee tarah parinday zameen par taadaad men badh jaaen.” 23shaam huee, phir subah. yoon paanchvaan din guzar gaya.
chhata din : zameen par chalnay vaalay jaanvar aur insaan
24allaah nay kaha, “zameen har qism kay jaandaar paida karay : maveshee, rengnay vaalay aur janglee jaanvar.” aisa hee hua. 25allaah nay har qism kay maveshee, rengnay vaalay aur janglee jaanvar banaaay. us nay dekha ki yah achchha hai.
26allaah nay kaha, “aao ab ham insaan ko apnee soorat par banaaen, vah ham say mushaabahet rakhay. vah tamaam jaanvaron par hukoomat karay, samundar kee machhliyon par, hava kay parindon par, maveshiyon par, janglee jaanvaron par aur zameen par kay tamaam rengnay vaalay jaandaaron par.” 27yoon allaah nay insaan ko apnee soorat par banaaya, allaah kee soorat par. us nay unhen mard aur aurat banaaya. 28allaah nay unhen barkat dee aur kaha, “phalo phoolo aur taadaad men badhtay jaao. duniya tum say bhar jaaay aur tum us par ikhtiyaar rakho. samundar kee machhliyon, hava kay parindon aur zameen par kay tamaam rengnay vaalay jaandaaron par hukoomat karo.”
29allaah nay un say mazeed kaha, “tamaam beejdaar pauday aur phaldaar darakht tumhaaray hee hain. main unhen tum ko khaanay kay liyay deta hoon. 30is tarah main tamaam jaanvaron ko khaanay kay liyay hariyaalee deta hoon. jis men bhee jaan hai vah yah kha sakta hai, khwaah vah zameen par chalnay phirnay vaala jaanoovar, hava ka parinda ya zameen par rengnay vaala kyoon na ho.” aisa hee hua. 31allaah nay sab par nazar kee to dekha ki vah bahut achchha ban gaya hai. shaam huee, phir subah. chhata din guzar gaya.