Paidaaish 4
qaabeel aur haabeel
1aadam havva say hambistar hua to un ka pahela beta qaabeel paida hua. havva nay kaha, “rabb kee madad say main nay ek mard haasil kiya hai.” 2baad men qaabeel ka bhaaee haabeel paida hua. haabeel bhed-bakriyon ka charvaaha ban gaya jabki qaabeel kheteebaadee karnay laga.
pahela qatl
3kuchh der kay baad qaabeel nay rabb ko apnee faslon men say kuchh pesh kiya. 4haabeel nay bhee nazraana pesh kiya, lekin us nay apnee bhed-bakriyon kay kuchh pahelauthay un kee charbee samet chadhaaay. haabeel ka nazraana rabb ko pasand aaya, 5magar qaabeel ka nazraana manzoor na hua. yah dekh kar qaabeel baday ghussay men a gaya, aur us ka munh bigad gaya. 6rabb nay poochha, “too ghussay men kyoon a gaya hai? tera munh kyoon latka hua hai? 7kya agar too achchhee neeyat rakhta hai to apnee nazar utha kar meree taraf naheen dekh sakega? lekin agar achchhee neeyat naheen rakhta to khabardaar! gunaah darvaazay par dabka baitha hai aur tujhay chaahata hai. lekin tera farz hai ki us par ghaalib aaay.”
8ek din qaabeel nay apnay bhaaee say kaha, “aao, ham baahar khulay maidaan men chalen.” aur jab vah khulay maidaan men thay to qaabeel nay apnay bhaaee haabeel par hamla karkay usay maar daala.
9tab rabb nay qaabeel say poochha, “tera bhaaee haabeel kahaan hai?” qaabeel nay javaab diya, “mujhay kya pata! kya apnay bhaaee kee dekh-bhaal karna meree zimmaadaaree hai?” 10rabb nay kaha, “too nay kya kiya hai? teray bhaaee ka khoon zameen men say pukaar kar mujh say faryaad kar raha hai. 11is liyay tujh par laanat hai aur zameen nay tujhay radd kiya hai, kyoonki zameen ko munh khol kar teray haath say qatl kiay huay bhaaee ka khoon peena pada. 12ab say jab too kheteebaadee karega to zameen apnee paidaavaar denay say inkaar karegee. too mafroor ho kar maara maara phirega.” 13qaabeel nay kaha, “meree saza nihaayat sakht hai. main isay bardaasht naheen kar paaoonga. 14aaj too mujhay zameen kee satah say bhaga raha hai aur mujhay teray huzoor say bhee chhup jaana hai. main mafroor kee haisiyat say maara maara phirta rahoonga, is liyay jis ko bhee pata chalega ki main kahaan hoon vah mujhay qatl kar daalega.” 15lekin rabb nay us say kaha, “hargiz naheen. jo qaabeel ko qatl karay us say saat guna badla liya jaaega.” phir rabb nay us par ek nishaan lagaaya taaki jo bhee qaabeel ko dekhay vah usay qatl na kar day. 16is kay baad qaabeel rabb kay huzoor say chala gaya aur adan kay mashriq kee taraf nod kay ilaaqay men ja basa.
qaabeel ka khaandaan
17qaabeel kee beevee haamila huee. beta paida hua jis ka naam hanook rakha gaya. qaabeel nay ek shaher taameer kiya aur apnay betay kee khushee men us ka naam hanook rakha. 18hanook ka beta eeraad tha, eeraad ka beta mahooyaael, mahooyaael ka beta matoosaael aur matoosaael ka beta lamak tha. 19lamak matoosaael kee do beeviyaan theen, ada aur zilla. 20ada ka beta yaabal tha. us kee nasal kay log khaimon men rahetay aur maveshee paaltay thay. 21yaabal ka bhaaee yoobal tha. us kee nasal kay log sarod [a] lafzee tarjuma : chang. choonki yah saaz barr-ay-sagheer men kam hee istemaal hota hai, is liyay mutarjameen nay is kee jagah lafz “sarod” istemaal kiya hai. aur baansree bajaatay thay. 22zilla kay bhee beta paida hua jis ka naam toobal-qaabeel tha. vah lohaar tha. us kee nasal kay log peetal aur lohay kee cheezen banaatay thay. toobal-qaabeel kee bahen ka naam naama tha. 23ek din lamak nay apnee beeviyon say kaha, “ada aur zilla, meree baat suno! lamak kee beeviyo, meray alfaaz par ghaur karo! 24ek aadmee nay mujhay zakhmee kiya to main nay usay maar daala. ek ladkay nay meray chot lagaaee to main nay usay qatl kar diya. jo qaabeel ko qatl karay us say saat guna badla liya jaaega, lekin jo lamak ko qatl karay us say satattar guna badla liya jaaega.”
set aur anoos
25aadam aur havva ka ek aur beta paida hua. havva nay us ka naam set rakh kar kaha, “allaah nay mujhay haabeel kee jagah jisay qaabeel nay qatl kiya ek aur beta bakhsha hai.” 26set kay haan bhee beta paida hua. us nay us ka naam anoos rakha.
un dinon men log rabb ka naam lay kar ibaadat karnay lagay.