Yashaayaah 51
rabb apnee qaum ko tasallee deta hai
1“tum jo raastee kay peechhay lagay rahetay, jo rabb kay taalib ho, meree baat suno! us chataan par dhyaan do jis men say tumhen taraash kar nikaala gaya hai, us kaan par ghaur karo jis men say tumhen khoda gaya hai. 2yaanee apnay baap ibraaheem aur apnee maan saara par tavajjuh do, jis nay dard-ay-zah kee takleef utha kar tumhen janm diya. ibraaheem beaulaad tha jab main nay usay bulaaya, lekin phir main nay usay barkat day kar bahut aulaad bakhshee.”
3yaqeenan rabb siyyoon ko tasallee dega. vah us kay tamaam khandaraat ko tashaffee day kar us kay registaan ko baagh-ay-adan men aur us kee banjar zameen ko rabb kay baagh men badal dega. tab us men khushee-o-shaadmaanee paaee jaaegee, har taraf shukrguzaaree aur geeton kee aavaazen sunaaee dengee.
4“ai meree qaum, mujh par dhyaan day! ai meree ummat, mujh par ghaur kar! kyoonki hidaayat mujh say saadir hogee, aur mera insaaf qaumon kee raushnee banega. 5meree raastee qareeb hee hai, meree najaat raastay men hai, aur mera zoraavar baazoo qaumon men insaaf qaaim karega. jazeeray mujh say ummeed rakhengay, vah meree qudrat dekhnay kay intizaar men rahengay. 6apnee aankhen aasmaan kee taraf uthaao! neechay zameen par nazar daalo! aasmaan dhuen kee tarah bikhar jaaega, zameen puraanay kapday kee tarah ghisay phategee aur us kay baashinday machchharon kee tarah mar jaaengay. lekin meree najaat abad tak qaaim rahegee, aur meree raastee kabhee khatm naheen hogee.
7ai saheeh raah ko jaannay vaalo, ai qaum jis kay dil men meree shareeat hai, meree baat suno! jab log tumhaaree beizzatee kartay hain to un say mat darna, jab vah tumhen gaaliyaan detay hain to mat ghabraana. 8kyoonki kiram unhen kapday kee tarah kha jaaega, keeda unhen oon kee tarah hazam karega. lekin meree raastee abad tak qaaim rahegee, meree najaat pusht-dar-pusht barqaraar rahegee.”
rabb kee rihaaee
9ai rabb kay baazoo, uth! jaag uth aur quvvat ka jaama pahen lay! yoon amal men a jis tarah qadeem zamaanay men aaya tha, jab too nay mut’addid naslon pahelay raheb ko tukday tukday kar diya, samundaree ajhdahay ko chhed daala. 10kyoonki too hee nay samundar ko khushk kiya, too hee nay gaheraaiyon kee tah par raasta banaaya taaki vah jinhen too nay ivzaana day kar chhudaaya tha us men say guzar saken.
11jinhen rabb nay fidya day kar chhudaaya hai vah vaapas aaengay. vah shaadiyaana baja kar siyyoon men daakhil hongay, aur har ek ka sar abdee khushee kay taaj say aaraasta hoga. kyoonki khushee aur shaadmaanee un par ghaalib a kar tamaam gham aur aah-o-zaaree bhaga degee.
12“main, sirf main hee tujhay tasallee deta hoon. to phir too faanee insaan say kyoon dartee hai, jo ghaas kee tarah murjha kar khatm ho jaata hai? 13too rabb apnay khaaliq ko kyoon bhool gaee hai, jis nay aasmaan ko khaimay kee tarah taan liya aur zameen kee bunyaad rakhee? jab zaalim tujhay tabaah karnay par tula raheta hai to too us kay taish say pooray din kyoon khauf khaatee rahetee hai? ab us ka taish kahaan raha? 14jo zanjeeron men jakda hua hai vah jald hee aazaad ho jaaega. na vah mar kar qabr men utrega, na rotee say maheroom rahega. 15kyoonki main rabb tera khuda hoon jo samundar ko yoon harkat men laata hai ki vah mutlaatim ho kar garajnay lagta hai. rabb-ul-afwaaj mera naam hai. 16main nay apnay alfaaz teray munh men daal kar tujhay apnay haath kay saay men chhupaaay rakha hai taaki naay siray say aasmaan ko taanoon, zameen kee bunyaaden rakhoon aur siyyoon ko bataaoon, ‘too meree qaum hai’.”
ai yarooshalam, jaag uth!
17ai yarooshalam, uth! jaag uth! ai shaher jis nay rabb kay haath say us ka ghazab bhara piyaala pee liya hai, khadee ho ja! ab too nay ladakhda denay vaalay piyaalay ko aakhiree qatray tak chaat liya hai. 18jitnay bhee betay too nay janm diay un men say ek bhee naheen raha jo teree raahanumaaee karay. jitnay bhee betay too nay paalay un men say ek bhee naheen jo tera haath pakad kar teray saath chalay. 19tujh par do aaften aaeen yaanee barbaadee-o-tabaahee, kaal aur talvaar. lekin kis nay hamdardee ka izhaar kiya? kis nay tujhay tasallee dee? 20teray betay ghash kha kar gir gaay hain. har galee men vah jaal men phansay huay ghazaal [a] ghazaal-ay-afreeqa, oryakh. kee tarah zameen par tadap rahay hain. kyoonki rabb ka ghazab un par naazil hua hai, vah ilaahee daant-dapat ka nishaana ban gaay hain.
21chunaanchay meree baat sun, ai museebatzada qaum, ai nashay men matwaalee ummat, go too mai kay asar say naheen dagamga rahee. 22rabb tera aaqa jo tera khuda hai aur apnee qaum kay liyay ladta hai vah farmaata hai, “dekh, main nay teray haath say vah piyaala door kar diya jo teray ladkhadaanay ka sabab bana. aainda too mera ghazab bhara piyaala naheen piegee. 23ab main isay un ko pakda doonga jinhon nay tujhay aziyat pahunchaaee hai, jinhon nay tujh say kaha, ‘aundhay munh jhuk ja taaki ham tujh par say guzren.’ us vaqt teree peeth khaak men dhans kar doosron kay liyay raasta ban gaee thee.”