Yashaayaah 54
rabb nay yarooshalam ko dubaara qabool kar liya hai
1rabb farmaata hai, “khushee kay naaray laga, too jo beaulaad hai, jo bachchay ko janm hee naheen day saktee. buland aavaaz say shaadiyaana baja, too jisay paidaaish ka dard na hua. kyoonki ab tark kee huee aurat kay bachchay shaadeeshuda aurat kay bachchon say ziyaada hain. 2apnay khaimay ko bada bana, us kay parday har taraf bichha! bachat mat karna! khaimay kay rassay lambay lambay karkay mekhen mazbootee say zameen men thonk day. 3kyoonki too tezee say daaeen aur baaeen taraf phail jaaegee, aur teree aulaad deegar qaumon par qabza karkay tabaahashuda shaheron ko az sar-ay-nau aabaad karegee.
4mat darna, teree rusvaaee naheen hogee. sharmasaar na ho, teree behuramtee naheen hogee. ab too apnee javaanee kee sharmindagee bhool jaaegee, teray zahen say beva honay kee zillat utar jaaegee. 5kyoonki tera khaaliq tera shauhar hai, rabb-ul-afwaaj us ka naam hai, aur tera chhudaanay vaala israaeel ka quddoos hai, jo pooree duniya ka khuda kahelaata hai.”
6tera khuda farmaata hai, “too matrooka aur dil say majrooh beevee kee maanind hai, us aurat kee maanind jis kay shauhar nay usay radd kiya, go us kee shaadee us vaqt huee jab kunvaaree hee thee. lekin ab main, rabb nay tujhay bulaaya hai. 7ek hee lamhay kay liyay main nay tujhay tark kiya, lekin ab baday rahem say tujhay jama karoonga. 8main nay apnay ghazab ka poora zor tujh par naazil karkay pal bhar kay liyay apna chihara tujh say chhupa liya, lekin ab abdee shafqat say tujh par rahem karoonga.” rabb tera chhudaanay vaala yah farmaata hai.
9“baday sailaab kay baad main nay nooh say qasam khaaee thee ki aainda sailaab kabhee pooree zameen par naheen aaega. isee tarah ab main qasam kha kar vaada karta hoon ki aainda na main kabhee tujh say naaraaz hoonga, na tujhay malaamat karoonga. 10go pahaad hat jaaen aur pahaadiyaan jumbish khaaen, lekin meree shafqat tujh par say kabhee naheen hategee, mera salaamatee ka ahd kabhee naheen hilega.” yah rabb ka farmaan hai jo tujh par taras khaata hai.
naya shaher yarooshalam
11“bechaaree betee yarooshalam! shadeed toofaan tujh par say guzar gaay hain, aur koee naheen hai jo tujhay tasallee day. dekh, main teree deevaaron kay patthar mazboot choonay say jod doonga aur teree bunyaadon ko sang-ay-laajvard [a] lapis lazuli say rakh doonga. 12main teree deevaaron ko yaaqoot, teray darvaazon ko aab-ay-baher [b] berayal aur teree tamaam faseel ko qeemtee javaahir say taameer karoonga. 13teray tamaam farzand rabb say taaleem paaengay, aur teree aulaad kee salaamatee azeem hogee. 14tujhay insaaf kee mazboot bunyaad par rakha jaaega, chunaanchay doosron kay zulm say door rah, kyoonki darnay kee zaroorat naheen hogee. dahshatzada na ho, kyoonki dahshat khaanay ka sabab teray qareeb naheen aaega. 15agar koee tujh par hamla karay bhee to yah meree taraf say naheen hoga, is liyay har hamlaaaavar shikast khaaega.
16dekh, main hee us lohaar ka khaaliq hoon jo hava day kar koilon ko daheka deta hai taaki kaam kay liyay mauzoon hathiyaar bana lay. aur main hee nay tabaah karnay vaalay ko khalaq kiya taaki vah barbaadee ka kaam anjaam day. 17chunaanchay jo bhee hathiyaar tujh par hamla karnay kay liyay tayyaar ho jaaay vah naakaam hoga, aur jo bhee zabaan tujh par ilzaam lagaaay usay too mujrim saabit karega. yahee rabb kay khaadimon ka mauroosee hissa hai, main hee un kee raastbaazee barqaraar rakhoonga.” rabb khud yah farmaata hai.