Yashaayaah 55
rabb kay paas aao taaki zindagee paao
1“kya tum piyaasay ho? aao, sab paanee kay paas aao! kya tumhaaray paas paisay naheen? udhar aao, sauda khareed kar khaana khaao. yahaan kee mai aur doodh muft hai. aao, usay paisay diay baghair khareedo. 2us par paisay kyoon kharch kartay ho jo rotee naheen hai? jo ser naheen karta us kay liyay mehanat-mashaqqat kyoon kartay ho? suno, suno meree baat! phir tum achchhee khuraak khaaogay, behtareen khaanay say lutf’andoz hogay. 3kaan laga kar meray paas aao! suno to jeetay rahogay.
main tumhaaray saath abdee ahd baandhoonga, tumhen un anmit meharbaaniyon say navaazoonga jin ka vaada daaood say kiya tha. 4dekh, main nay muqarrar kiya ki vah aqvaam kay saamnay mera gavaah ho, ki aqvaam ka raees aur hukmaraan ho. 5dekh, too aisee qaum ko bulaaega jisay too naheen jaanta, aur tujh say naavaaqif qaum rabb teray khuda kee khaatir teray paas daudee chalee aaegee. kyoonki jo israaeel ka quddoos hai us nay tujhay shaan-o-shaukat ata kee hai.”
mera kalaam betaaseer naheen rahetaa
6abhee rabb ko talaash karo jabki usay paaya ja sakta hai. abhee usay pukaaro jabki vah qareeb hee hai. 7bedeen apnee buree raah aur shareer apnay buray khayaalaat chhoday. vah rabb kay paas vaapas aaay to vah us par rahem karega. vah hamaaray khuda kay paas vaapas aaay, kyoonki vah faraakhdilee say muaaf kar deta hai.
8kyoonki rabb farmaata hai, “meray khayaalaat aur tumhaaray khayaalaat men aur meree raahon aur tumhaaree raahon men bada farq hai. 9jitna aasmaan zameen say ooncha hai utnee hee meree raahen tumhaaree raahon aur meray khayaalaat tumhaaray khayaalaat say buland hain.
10baarish aur barf par ghaur karo! zameen par padnay kay baad yah khaalee haath vaapas naheen aatee balki zameen ko yoon seraab kartee hai ki pauday phootnay aur phalnay phoolnay lagtay hain balki paktay paktay beej bonay vaalay ko beej aur bhookay ko rotee muhayya kartay hain. 11meray munh say nikla hua kalaam bhee aisa hee hai. vah khaalee haath vaapas naheen aaega balki meree marzee pooree karega aur us men kaamyaab hoga jis kay liyay main nay usay bheja tha.
12kyoonki tum khushee say niklogay, tumhen salaamatee say laaya jaaega. pahaad aur pahaadiyaan tumhaaray aanay par baagh baagh ho kar shaadiyaana bajaaengee, aur maidaan kay tamaam darakht taaliyaan bajaaengay. 13kaantedaar jhaadee kee bajaay jooneepar ka darakht ugega, aur bichchhoobootee kee bajaay mehandee phalay phoolegee. yoon rabb kay naam ko jalaal milega, aur us kee qudrat ka abdee aur anmit nishaan qaaim hoga.”