Yoohanna 1
zindagee ka kalaam
1ibtida men kalaam tha. kalaam allaah kay saath tha aur kalaam allaah tha. 2yahee ibtida men allaah kay saath tha. 3sab kuchh kalaam kay vaseelay say paida hua. makhlooqaat kee ek bhee cheez us kay baghair paida naheen huee. 4us men zindagee thee, aur yah zindagee insaanon ka noor thee. 5yah noor taareekee men chamakta hai, aur taareekee nay us par qaaboo na paaya.
6ek din allaah nay apna paighambar bhej diya, ek aadmee jis ka naam yaheya tha. 7vah noor kee gavaahee denay kay liyay aaya. maqsad yah tha ki log us kee gavaahee kee bina par eemaan laaen. 8vah khud to noor na tha balki usay sirf noor kee gavaahee denee thee. 9haqeeqee noor jo har shakhs ko raushan karta hai duniya men aanay ko tha.
10go kalaam duniya men tha aur duniya us kay vaseelay say paida huee to bhee duniya nay usay na pahechaana. 11vah us men aaya jo us ka apna tha, lekin us kay apnon nay usay qabool na kiya. 12to bhee kuchh usay qabool karkay us kay naam par eemaan laaay. unhen us nay allaah kay farzand bannay ka haq bakhsh diya, 13aisay farzand jo na fitree taur par, na kisee insaan kay mansoobay kay tahet paida huay balki allaah say.
14kalaam insaan ban kar hamaaray darmiyaan rihaaishpazeer hua aur ham nay us kay jalaal ka mushaahada kiya. vah fazl aur sachchaaee say maamoor tha aur us ka jalaal baap kay iklautay farzand ka sa tha.
15yaheya us kay baaray men gavaahee day kar pukaar utha, “yah vahee hai jis kay baaray men main nay kaha, ek meray baad aanay vaala hai jo mujh say bada hai, kyoonki vah mujh say pahelay tha.”
16us kee kasrat say ham sab nay fazl par fazl paaya. 17kyoonki shareeat moosa kee maarifat dee gaee, lekin allaah ka fazl aur sachchaaee eesa maseeh kay vaseelay say qaaim huee. 18kisee nay kabhee bhee allaah ko naheen dekha. lekin iklauta farzand jo allaah kee god men hai usee nay allaah ko ham par zaahir kiya hai.
yaheya baptisma denay vaalay ka paighaam
19yah yaheya kee gavaahee hai jab yarooshalam kay yahoodiyon nay imaamon aur laaviyon ko us kay paas bhej kar poochha, “aap kaun hain?”
20us nay inkaar na kiya balki saaf tasleem kiya, “main maseeh naheen hoon.”
21unhon nay poochha, “to phir aap kaun hain? kya aap ilyaas hain?”
us nay javaab diya, “naheen, main vah naheen hoon.”
unhon nay savaal kiya, “kya aap aanay vaala nabee hain?”
us nay kaha, “naheen.”
22“to phir hamen bataaen ki aap kaun hain? jinhon nay hamen bheja hai unhen hamen koee na koee javaab dena hai. aap khud apnay baaray men kya kahetay hain?”
23yaheya nay yasaayaah nabee ka havaala day kar javaab diya, “main registaan men vah aavaaz hoon jo pukaar rahee hai, rabb ka raasta seedha banaao.”
24bhejay gaay log fareesee firqay say taalluq rakhtay thay. 25unhon nay poochha, “agar aap na maseeh hain, na ilyaas ya aanay vaala nabee to phir aap baptisma kyoon day rahay hain?”
26yaheya nay javaab diya, “main to paanee say baptisma deta hoon, lekin tumhaaray darmiyaan hee ek khada hai jis ko tum naheen jaantay. 27vahee meray baad aanay vaala hai aur main us kay jooton kay tasmay bhee kholnay kay laaiq naheen.”
28yah yardan kay paar bait-aniyaah men hua jahaan yaheya baptisma day raha tha.
allaah ka lelaa
29aglay din yaheya nay eesa ko apnay paas aatay dekha. us nay kaha, “dekho, yah allaah ka lela hai jo duniya ka gunaah utha lay jaata hai. 30yah vahee hai jis kay baaray men main nay kaha, ‘ek meray baad aanay vaala hai jo mujh say bada hai, kyoonki vah mujh say pahelay tha.’ 31main to usay naheen jaanta tha, lekin main is liyay a kar paanee say baptisma denay laga taaki vah israaeel par zaahir ho jaaay.”
32aur yaheya nay yah gavaahee dee, “main nay dekha ki rooh-ul-quds kabootar kee tarah aasmaan par say utar kar us par thaher gaya. 33main to usay naheen jaanta tha, lekin jab allaah nay mujhay baptisma denay kay liyay bheja to us nay mujhay bataaya, ‘too dekhega ki rooh-ul-quds utar kar kisee par thaher jaaega. yah vahee hoga jo rooh-ul-quds say baptisma dega.’ 34ab main nay dekha hai aur gavaahee deta hoon ki yah allaah ka farzand hai.”
eesa kay pahelay shaagird
35aglay din yaheya dubaara vaheen khada tha. us kay do shaagird saath thay. 36us nay eesa ko vahaan say guzartay huay dekha to kaha, “dekho, yah allaah ka lela hai!”
37us kee yah baat sun kar us kay do shaagird eesa kay peechhay ho liyay. 38eesa nay mud kar dekha ki yah meray peechhay chal rahay hain to us nay poochha, “tum kya chaahatay ho?” unhon nay kaha, “ustaad, aap kahaan thaheray huay hain?”
39us nay javaab diya, “aao, khud dekh lo.” chunaanchay vah us kay saath gaay. unhon nay vah jagah dekhee jahaan vah thahera hua tha aur din kay baaqee vaqt us kay paas rahay. shaam kay taqreeban chaar baj gaay thay.
40shamaaoon patras ka bhaaee andriyaas un do shaagirdon men say ek tha jo yaheya kee baat sun kar eesa kay peechhay ho liyay thay. 41ab us kee pahelee mulaaqaat us kay apnay bhaaee shamaaoon say huee. us nay usay bataaya, “hamen maseeh mil gaya hai.” (maseeh ka matlab ‘masah kiya hua shakhs’ hai.) 42phir vah usay eesa kay paas lay gaya.
usay dekh kar eesa nay kaha, “too yoohanna ka beta shamaaoon hai. too kaifa kahelaaega.” (is ka yoonaanee tarjuma patras yaanee patthar hai.)
eesa filippus aur natanael ko bulaata hai
43aglay din eesa nay galeel jaanay ka iraada kiya. filippus say mila to us say kaha, “meray peechhay ho lay.” 44andriyaas aur patras kee tarah filippus ka vatnee shaher bait-saida tha. 45filippus natanael say mila, aur us nay us say kaha, “hamen vahee shakhs mil gaya jis ka zikr moosa nay tauret aur nabiyon nay apnay saheefon men kiya hai. us ka naam eesa bin yoosuf hai aur vah naasrat ka rahenay vaala hai.”
46natanael nay kaha, “naasrat? kya naasrat say koee achchhee cheez nikal saktee hai?” filippus nay javaab diya, “a aur khud dekh lay.”
47jab eesa nay natan-el ko aatay dekha to us nay kaha, “lo, yah sachcha israaeelee hai jis men makr naheen.”
48natan-el nay poochha, “aap mujhay kahaan say jaantay hain?”
eesa nay javaab diya, “is say pahelay ki filippus nay tujhay bulaaya main nay tujhay dekha. too anjeer kay darakht kay saay men tha.”
49natan-el nay kaha, “ustaad, aap allaah kay farzand hain, aap israaeel kay baadshaah hain.”
50eesa nay us say poochha, “achchha, meree yah baat sun kar ki main nay tujhay anjeer kay darakht kay saay men dekha too eemaan laaya hai? too is say kaheen badee baaten dekhega.” 51us nay baat jaaree rakhee, “main tum ko sachch bataata hoon ki tum aasmaan ko khula aur allaah kay farishton ko oopar chadhtay aur ibn-ay-aadam par utartay dekhogay.”