Yoohanna 10
charvaahay kee tamseel
1main tum ko sachch bataata hoon ki jo darvaazay say bhedon kay baaday men daakhil naheen hota balki phalaang kar andar ghus aata hai vah chor aur daakoo hai. 2lekin jo darvaazay say daakhil hota hai vah bhedon ka charvaaha hai. 3chaukeedaar us kay liyay darvaaza khol deta hai aur bheden us kee aavaaz suntee hain. vah apnee har ek bhed ka naam lay kar unhen bulaata aur baahar lay jaata hai. 4apnay pooray gallay ko baahar nikaalnay kay baad vah un kay aagay aagay chalnay lagta hai aur bheden us kay peechhay peechhay chal padtee hain, kyoonki vah us kee aavaaz pahechaanatee hain. 5lekin vah kisee ajnabee kay peechhay naheen chalengee balki us say bhaag jaaengee, kyoonki vah us kee aavaaz naheen pahechaanateen.”
6eesa nay unhen yah tamseel pesh kee, lekin vah na samjhay ki vah unhen kya bataana chaahata hai.
achchha charvaahaa
7is liyay eesa dubaara is par baat karnay laga, “main tum ko sachch bataata hoon ki bhedon kay liyay darvaaza main hoon. 8jitnay bhee mujh say pahelay aaay vah chor aur daakoo hain. lekin bhedon nay un kee na sunee. 9main hee darvaaza hoon. jo bhee meray zareeay andar aaay usay najaat milegee. vah aata jaata aur haree charaagaahen paata rahega. 10chor to sirf choree karnay, zabah karnay aur tabaah karnay aata hai. lekin main is liyay aaya hoon ki vah zindagee paaen, balki kasrat kee zindagee paaen.
11achchha charvaaha main hoon. achchha charvaaha apnee bhedon kay liyay apnee jaan deta hai. 12mazdoor charvaahay ka kirdaar ada naheen karta, kyoonki bheden us kee apnee naheen hoteen. is liyay joon hee koee bhediya aata hai to mazdoor usay dekhtay hee bhedon ko chhod kar bhaag jaata hai. nateejay men bhediya kuchh bheden pakad leta aur baaqiyon ko muntashir kar deta hai. 13vajah yah hai ki vah mazdoor hee hai aur bhedon kee fikr naheen karta. 14achchha charvaaha main hoon. main apnee bhedon ko jaanta hoon aur vah mujhay jaantee hain, 15bilkul usee tarah jis tarah baap mujhay jaanta hai aur main baap ko jaanta hoon. aur main bhedon kay liyay apnee jaan deta hoon. 16meree aur bhee bheden hain jo is baaday men naheen hain. laazim hai ki unhen bhee lay aaoon. vah bhee meree aavaaz sunengee. phir ek hee galla aur ek hee gallaabaan hoga.
17mera baap mujhay is liyay piyaar karta hai ki main apnee jaan deta hoon taaki usay phir lay loon. 18koee meree jaan mujh say chheen naheen sakta balki main usay apnee marzee say day deta hoon. mujhay usay denay ka ikhtiyaar hai aur usay vaapas lenay ka bhee. yah hukm mujhay apnay baap kee taraf say mila hai.”
19in baaton par yahoodiyon men dubaara phoot pad gaee. 20bahuton nay kaha, “yah badruh kee girift men hai, yah deevaana hai. is kee kyoon sunen!”
21lekin auron nay kaha, “yah aisee baaten naheen hain jo badruh-girifta shakhs kar sakay. kya badruhen andhon kee aankhen bahaal kar saktee hain?”
eesa ko radd kiya jaata hai
22sardiyon ka mausam tha aur eesa bait-ul-muqaddas kee makhsoosiyat kee eed banaam hanooka kay dauraan yarooshalam men tha. 23vah bait-ul-muqaddas kay us baraamday men phir raha tha jis ka naam sulemaan ka baraamda tha. 24yahoodee usay gher kar kahenay lagay, “aap hamen kab tak uljhan men rakhengay? agar aap maseeh hain to hamen saaf saaf bata den.”
25eesa nay javaab diya, “main tum ko bata chuka hoon, lekin tum ko yaqeen naheen aaya. jo kaam main apnay baap kay naam say karta hoon vah meray gavaah hain. 26lekin tum eemaan naheen rakhtay kyoonki tum meree bheden naheen ho. 27meree bheden meree aavaaz suntee hain. main unhen jaanta hoon aur vah meray peechhay chaltee hain. 28main unhen abdee zindagee deta hoon, is liyay vah kabhee halaak naheen hongee. koee unhen meray haath say chheen na lega, 29kyoonki meray baap nay unhen meray sapurd kiya hai aur vahee sab say bada hai. koee unhen baap kay haath say chheen naheen sakta. 30main aur baap ek hain.”
31yah sun kar yahoodee dubaara patthar uthaanay lagay taaki eesa ko sangasaar karen. 32us nay un say kaha, “main nay tumhen baap kee taraf say kaee ilaahee nishaan dikhaaay hain. tum mujhay in men say kis nishaan kee vajah say sangasaar kar rahay ho?”
33yahoodiyon nay javaab diya, “ham tum ko kisee achchhay kaam kee vajah say sangasaar naheen kar rahay balki kufr baknay kee vajah say. tum jo sirf insaan ho allaah honay ka daava kartay ho.”
34eesa nay kaha, “kya yah tumhaaree shareeat men naheen likha hai ki allaah nay farmaaya, ‘tum khuda ho’? 35unhen ‘khuda’ kaha gaya jin tak allaah ka yah paighaam pahunchaaya gaya. aur ham jaantay hain ki kalaam-ay-muqaddas ko mansookh naheen kiya ja sakta. 36to phir tum kufr baknay kee baat kyoon kartay ho jab main kaheta hoon ki main allaah ka farzand hoon? aakhir baap nay khud mujhay makhsoos karkay duniya men bheja hai. 37agar main apnay baap kay kaam na karoon to meree baat na maano. 38lekin agar us kay kaam karoon to beshak meree baat na maano, lekin kam az kam un kaamon kee gavaahee to maano. phir tum jaan logay aur samajh jaaogay ki baap mujh men hai aur main baap men hoon.”
39ek baar phir unhon nay usay giriftaar karnay kee koshish kee, lekin vah un kay haath say nikal gaya.
40phir eesa dubaara darya-ay-yardan kay paar us jagah chala gaya jahaan yaheya shuroo men baptisma diya karta tha. vahaan vah kuchh der thahera. 41bahut say log us kay paas aatay rahay. unhon nay kaha, “yaheya nay kabhee koee ilaahee nishaan na dikhaaya, lekin jo kuchh us nay is kay baaray men bayaan kiya, vah bilkul saheeh nikla.” 42aur vahaan bahut say log eesa par eemaan laaay.