Yoohanna 12
eesa ko bait-aniyaah men masah kiya jaata hai
1fasah kee eed men abhee chhah din baaqee thay ki eesa bait-aniyaah pahuncha. yah vah jagah thee jahaan us laazar ka ghar tha jisay eesa nay murdon men say zinda kiya tha. 2vahaan us kay liyay ek khaas khaana banaaya gaya. martha khaanay vaalon kee khidmat kar rahee thee jabki laazar eesa aur baaqee mehamaanon kay saath khaanay men shareek tha. 3phir mariyam nay aadha litar khaalis jataamaasee ka nihaayat qeemtee itr lay kar eesa kay paaon par undel diya aur unhen apnay baalon say ponchh kar khushk kiya. khushboo pooray ghar men phail gaee. 4lekin eesa kay shaagird yahoodaah iskariyotee nay etiraaz kiya (baad men usee nay eesa ko dushman kay havaalay kar diya). us nay kaha, 5“is itr kee qeemat chaandee kay 300 sikkay thee. isay kyoon naheen becha gaya taaki is kay paisay ghareebon ko diay jaatay?” 6us nay yah baat is liyay naheen kee ki usay ghareebon kee fikr thee. asal men vah chor tha. vah shaagirdon ka khazaanchee tha aur jamaashuda paison men say badadiyaanatee karta raheta tha.
7lekin eesa nay kaha, “usay chhod day! us nay meree tadfeen kee tayyaaree kay liyay yah kiya hai. 8ghareeb to hamesha tumhaaray paas rahengay, lekin main hamesha tumhaaray paas naheen rahoonga.”
laazar kay khilaaf mansoobaabandee
9itnay men yahoodiyon kee badee taadaad ko maaloom hua ki eesa vahaan hai. vah na sirf eesa say milnay kay liyay aaay balki laazar say bhee jisay us nay murdon men say zinda kiya tha. 10is liyay raahanuma imaamon nay laazar ko bhee qatl karnay ka mansooba banaaya. 11kyoonki us kee vajah say bahut say yahoodee un men say chalay gaay aur eesa par eemaan lay aaay thay.
yarooshalam men eesa ka purjosh istiqbaal
12aglay din eed kay liyay aaay huay logon ko pata chala ki eesa yarooshalam a raha hai. ek bada hujoom 13khajoor kee daaliyaan pakday shaher say nikal kar us say milnay aaya. chaltay chaltay vah chilla kar naaray laga rahay thay,
“hoshaana! [a] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai.
mubaarak hai vah jo rabb kay naam say aata hai!
israaeel ka baadshaah mubaarak hai!”
14eesa ko kaheen say ek javaan gadha mil gaya aur vah us par baith gaya, jis tarah kalaam-ay-muqaddas men likha hai,
15“ai siyyoon betee, mat dar!
dekh, tera baadshaah gadhay kay bachchay par savaar a raha hai.”
16us vaqt us kay shaagirdon ko is baat kee samajh na aaee. lekin baad men jab eesa apnay jalaal ko pahuncha to unhen yaad aaya ki logon nay us kay saath yah kuchh kiya tha aur vah samajh gaay ki kalaam-ay-muqaddas men is ka zikr bhee hai.
17jo hujoom us vaqt eesa kay saath tha jab us nay laazar ko murdon men say zinda kiya tha, vah doosron ko is kay baaray men bataata raha tha. 18isee vajah say itnay log eesa say milnay kay liyay aaay thay, unhon nay us kay is ilaahee nishaan kay baaray men suna tha. 19yah dekh kar fareesee aapas men kahenay lagay, “aap dekh rahay hain ki baat naheen ban rahee. dekho, tamaam duniya us kay peechhay ho lee hai.”
kuchh yoonaanee eesa ko talaash kartay hain
20kuchh yoonaanee bhee un men thay jo fasah kee eed kay mauqay par parastish karnay kay liyay aaay huay thay. 21ab vah filippus say milnay aaay jo galeel kay bait-saida say tha. unhon nay kaha, “janaab, ham eesa say milna chaahatay hain.”
22filippus nay andriyaas ko yah baat bataaee aur phir vah mil kar eesa kay paas gaay aur usay yah khabar pahunchaaee. 23lekin eesa nay javaab diya, “ab vaqt a gaya hai ki ibn-ay-aadam ko jalaal milay. 24main tum ko sachch bataata hoon ki jab tak gandum ka daana zameen men gir kar mar na jaaay vah akela hee raheta hai. lekin jab vah mar jaata hai to bahut sa phal laata hai. 25jo apnee jaan ko piyaar karta hai vah usay kho dega, aur jo is duniya men apnee jaan say dushmanee rakhta hai vah usay abad tak mahfooz rakhega. 26agar koee meree khidmat karna chaahay to vah meray peechhay ho lay, kyoonki jahaan main hoon vahaan mera khaadim bhee hoga. aur jo meree khidmat karay mera baap us kee izzat karega.
eesa apnee maut ka zikr karta hai
27ab mera dil muztarib hai. main kya kahoon? kya main kahoon, ‘ai baap, mujhay is vaqt say bachaaay rakh’? naheen, main to isee liyay aaya hoon. 28ai baap, apnay naam ko jalaal day.”
tab aasmaan say ek aavaaz sunaaee dee, “main usay jalaal day chuka hoon aur dubaara bhee jalaal doonga.”
29hujoom kay jo log vahaan khaday thay unhon nay yah sun kar kaha, “baadal garaj rahay hain.” auron nay khayaal pesh kiya, “koee farishta us say hamkalaam hua hai.”
30eesa nay unhen bataaya, “yah aavaaz meray vaastay naheen balki tumhaaray vaastay thee. 31ab duniya kee adaalat karnay ka vaqt a gaya hai, ab duniya kay hukmaraan ko nikaal diya jaaega. 32aur main khud zameen say oonchay par chadhaaay jaanay kay baad sab ko apnay paas khainch loonga.” 33in alfaaz say us nay is taraf ishaara kiya ki vah kis tarah kee maut marega.
34hujoom bol utha, “kalaam-ay-muqaddas say ham nay suna hai ki maseeh abad tak qaaim rahega. to phir aap kee yah kaisee baat hai ki ibn-ay-aadam ko oonchay par chadhaaya jaana hai? aakhir ibn-ay-aadam hai kaun?”
35eesa nay javaab diya, “noor thodee der aur tumhaaray paas rahega. jitnee der vah maujood hai is noor men chaltay raho taaki taareekee tum par chha na jaaay. jo andheray men chalta hai usay naheen maaloom ki vah kahaan ja raha hai. 36noor kay tumhaaray paas say chalay jaanay say pahelay pahelay us par eemaan laao taaki tum noor kay farzand ban jaao.”
log eemaan naheen rakhte
yah kahenay kay baad eesa chala gaya aur ghaaib ho gaya. 37agarchi eesa nay yah tamaam ilaahee nishaan un kay saamnay hee dikhaaay to bhee vah us par eemaan na laaay. 38yoon yasaayaah nabee kee peshgoee pooree huee,
“ai rabb, kaun hamaaray paighaam par eemaan laaya?
aur rabb kee qudrat kis par zaahir huee?”
39chunaanchay vah eemaan na la sakay, jis tarah yasaayaah nabee nay kaheen aur farmaaya hai,
40“allaah nay un kee aankhon ko andhaa
aur un kay dil ko behiss kar diya hai,
aisa na ho ki vah apnee aankhon say dekhen,
apnay dil say samjhen,
meree taraf rujoo karen
aur main unhen shifa doon.”
41yasaayaah nay yah is liyay farmaaya kyoonki us nay eesa ka jalaal dekh kar us kay baaray men baat kee.
42to bhee bahut say log eesa par eemaan rakhtay thay. un men kuchh raahanuma bhee shaamil thay. lekin vah is ka alaaniya iqraar naheen kartay thay, kyoonki vah dartay thay ki fareesee hamen yahoodee jamaaat say khaarij kar dengay. 43asal men vah allaah kee izzat kee nisbat insaan kee izzat ko ziyaada azeez rakhtay thay.
eesa ka kalaam logon kee adaalat karegaa
44phir eesa pukaar utha, “jo mujh par eemaan rakhta hai vah na sirf mujh par balki us par eemaan rakhta hai jis nay mujhay bheja hai. 45aur jo mujhay dekhta hai vah usay dekhta hai jis nay mujhay bheja hai. 46main noor kee haisiyat say is duniya men aaya hoon taaki jo bhee mujh par eemaan laaay vah taareekee men na rahay. 47jo meree baaten sun kar un par amal naheen karta main us kee adaalat naheen karoonga, kyoonki main duniya kee adaalat karnay kay liyay naheen aaya balki usay najaat denay kay liyay. 48to bhee ek hai jo us kee adaalat karta hai. jo mujhay radd karkay meree baaten qabool naheen karta mera pesh kiya gaya kalaam hee qiyaamat kay din us kee adaalat karega. 49kyoonki jo kuchh main nay bayaan kiya hai vah meree taraf say naheen hai. meray bhejnay vaalay baap hee nay mujhay hukm diya ki kya kahena aur kya sunaana hai. 50aur main jaanta hoon ki us ka hukm abdee zindagee tak pahunchaata hai. chunaanchay jo kuchh main sunaata hoon vahee kuchh hai jo baap nay mujhay bataaya hai.”