Yoohanna 13
eesa apnay shaagirdon kay paaon dhota hai
1fasah kee eed ab shuroo honay vaalee thee. eesa jaanta tha ki vah vaqt a gaya hai ki mujhay is duniya ko chhod kar baap kay paas jaana hai. go us nay hamesha duniya men apnay logon say muhabbat rakhee thee, lekin ab us nay aakhiree hadd tak un par apnee muhabbat ka izhaar kiya.
2phir shaam ka khaana tayyaar hua. us vaqt iblees shamaaoon iskariyotee kay betay yahoodaah kay dil men eesa ko dushman kay havaalay karnay ka iraada daal chuka tha. 3eesa jaanta tha ki baap nay sab kuchh meray sapurd kar diya hai aur ki main allaah men say nikal aaya aur ab us kay paas vaapas ja raha hoon. 4chunaanchay us nay dastarakhwaan say uth kar apna libaas utaar diya aur kamar par tauliya baandh liya. 5phir vah baasan men paanee daal kar shaagirdon kay paaon dhonay aur bandhay huay tauliya say ponchh kar khushk karnay laga. 6jab patras kee baaree aaee to us nay kaha, “khudaavand, aap meray paaon dhona chaahatay hain?”
7eesa nay javaab diya, “is vaqt too naheen samajhta ki main kya kar raha hoon, lekin baad men yah teree samajh men a jaaega.”
8patras nay etiraaz kiya, “main kabhee bhee aap ko meray paaon dhonay naheen doonga!”
eesa nay javaab diya, “agar main tujhay na dhooon to meray saath tera koee hissa naheen hoga.”
9yah sun kar patras nay kaha, “to phir khudaavand, na sirf meray paaon balki meray haathon aur sar ko bhee dhoen!”
10eesa nay javaab diya, “jis shakhs nay naha liya hai usay sirf apnay paaon ko dhonay kee zaroorat hotee hai, kyoonki vah pooray taur par paak-saaf hai. tum paak-saaf ho, lekin sab kay sab naheen.” 11(eesa ko maaloom tha ki kaun usay dushman kay havaalay karega. is liyay us nay kaha ki sab kay sab paak-saaf naheen hain.)
12un sab kay paaon dhonay kay baad eesa dubaara apna libaas pahen kar baith gaya. us nay savaal kiya, “kya tum samajhtay ho ki main nay tumhaaray liyay kya kiya hai? 13tum mujhay ‘ustaad’ aur ‘khudaavand’ kah kar mukhaatib kartay ho aur yah saheeh hai, kyoonki main yahee kuchh hoon. 14main, tumhaaray khudaavand aur ustaad nay tumhaaray paaon dhoay. is liyay ab tumhaara farz bhee hai ki ek doosray kay paaon dhoya karo. 15main nay tum ko ek namoona diya hai taaki tum bhee vahee karo jo main nay tumhaaray saath kiya hai. 16main tum ko sachch bataata hoon ki ghulaam apnay maalik say bada naheen hota, na paighambar apnay bhejnay vaalay say. 17agar tum yah jaantay ho to is par amal bhee karo, phir hee tum mubaarak hogay.
18main tum sab kee baat naheen kar raha. jinhen main nay chun liya hai unhen main jaanta hoon. lekin kalaam-ay-muqaddas kee us baat ka poora hona zaroor hai, ‘jo meree rotee khaata hai us nay mujh par laat uthaaee hai.’ 19main tum ko is say pahelay ki vah pesh aaay yah abhee bata raha hoon, taaki jab vah pesh aaay to tum eemaan laao ki main vahee hoon. 20main tum ko sachch bataata hoon ki jo shakhs usay qabool karta hai jisay main nay bheja hai vah mujhay qabool karta hai. aur jo mujhay qabool karta hai vah usay qabool karta hai jis nay mujhay bheja hai.”
eesa ko dushman kay havaalay kiya jaata hai
21in alfaaz kay baad eesa nihaayat muztarib hua aur kaha, “main tum ko sachch bataata hoon ki tum men say ek mujhay dushman kay havaalay kar dega.”
22shaagird uljhan men ek doosray ko dekh kar sochnay lagay ki eesa kis kee baat kar raha hai. 23ek shaagird jisay eesa piyaar karta tha us kay qareebtareen baitha tha. 24patras nay usay ishaara kiya ki vah us say darayaaft karay ki vah kis kee baat kar raha hai.
25us shaagird nay eesa kee taraf sar jhuka kar poochha, “khudaavand, yah kaun hai?”
26eesa nay javaab diya, “jisay main rotee ka luqma shorb men dubo kar doon, vahee hai.” phir luqmay ko dubo kar us nay shamaaoon iskariyotee kay betay yahoodaah ko day diya. 27joon hee yahoodaah nay yah luqma lay liya iblees us men sama gaya. eesa nay usay bataaya, “jo kuchh karna hai vah jaldee say kar lay.” 28lekin mez par baithay logon men say kisee ko maaloom na hua ki eesa nay yah kyoon kaha. 29baaz ka khayaal tha ki choonki yahoodaah khazaanchee tha is liyay vah usay bata raha hai ki eed kay liyay darkaar cheezen khareed lay ya ghareebon men kuchh taqseem kar day.
30chunaanchay eesa say yah luqma letay hee yahoodaah baahar nikal gaya. raat ka vaqt tha.
eesa ka naya hukm
31yahoodaah kay chalay jaanay kay baad eesa nay kaha, “ab ibn-ay-aadam nay jalaal paaya aur allaah nay us men jalaal paaya hai. 32haan, choonki allaah ko us men jalaal mil gaya hai is liyay allaah apnay men farzand ko jalaal dega. aur vah yah jalaal fauran dega. 33meray bachcho, main thodee der aur tumhaaray paas thaheroonga. tum mujhay talaash karogay, aur jo kuchh main yahoodiyon ko bata chuka hoon vah ab tum ko bhee bataata hoon, jahaan main ja raha hoon vahaan tum naheen a saktay. 34main tum ko ek naya hukm deta hoon, yah ki ek doosray say muhabbat rakho. jis tarah main nay tum say muhabbat rakhee usee tarah tum bhee ek doosray say muhabbat karo. 35agar tum ek doosray say muhabbat rakhogay to sab jaan lengay ki tum meray shaagird ho.”
patras kay inkaar kee peshgoee
36patras nay poochha, “khudaavand, aap kahaan ja rahay hain?”
eesa nay javaab diya, “jahaan main ja raha hoon vahaan too meray peechhay naheen a sakta. lekin baad men too meray peechhay a jaaega.”
37patras nay savaal kiya, “khudaavand, main aap kay peechhay abhee kyoon naheen ja sakta? main aap kay liyay apnee jaan tak denay ko tayyaar hoon.”
38lekin eesa nay javaab diya, “too meray liyay apnee jaan dena chaahata hai? main tujhay sachch bataata hoon ki murgh kay baang denay say pahelay pahelay too teen martaba mujhay jaannay say inkaar kar chuka hoga.