Yoohanna 2
qaana men shaadee
1teesray din galeel kay gaaon qaana men ek shaadee huee. eesa kee maan vahaan thee 2aur eesa aur us kay shaagirdon ko bhee daavat dee gaee thee. 3mai khatm ho gaee to eesa kee maan nay us say kaha, “un kay paas mai naheen rahee.”
4eesa nay javaab diya, “ai khaatoon, mera aap say kya vaasta? mera vaqt abhee naheen aaya.”
5lekin us kee maan nay naukron ko bataaya, “jo kuchh vah tum ko bataaay vah karo.” 6vahaan patthar kay chhah matkay paday thay jinhen yahoodee deenee ghusal kay liyay istemaal kartay thay. har ek men taqreeban 100 litar kee gunjaaish thee. 7eesa nay naukron say kaha, “matkon ko paanee say bhar do.” chunaanchay unhon nay unhen labaalab bhar diya. 8phir us nay kaha, “ab kuchh nikaal kar ziyaafat ka intizaam chalaanay vaalay kay paas lay jaao.” unhon nay aisa hee kiya. 9joon hee ziyaafat ka intizaam chalaanay vaalay nay vah paanee chakha jo mai men badal gaya tha to us nay doolhay ko bulaaya. (usay maaloom na tha ki yah kahaan say aaee hai, agarchi un naukron ko pata tha jo usay nikaal kar laaay thay.) 10us nay kaha, “har mezbaan pahelay achchhee qism kee mai peenay kay liyay pesh karta hai. phir jab logon ko nasha chadhnay lagay to vah nisbatan ghatiya qism kee mai pilaanay lagta hai. lekin aap nay achchhee mai ab tak rakh chhodee hai.”
11yoon eesa nay galeel kay qaana men yah pahela ilaahee nishaan dikha kar apnay jalaal ka izhaar kiya. yah dekh kar us kay shaagird us par eemaan laaay.
12is kay baad vah apnee maan, apnay bhaaiyon aur apnay shaagirdon kay saath kafarnahoom ko chala gaya. vahaan vah thoday din rahay.
eesa bait-ul-muqaddas men jaata hai
13jab yahoodee eed-ay-fasah qareeb a gaee to eesa yarooshalam chala gaya. 14bait-ul-muqaddas men ja kar us nay dekha ki kaee log us men gaay-bail, bheden aur kabootar bech rahay hain. doosray mez par baithay ghairmulkee sikkay bait-ul-muqaddas kay sikkon men badal rahay hain. 15phir eesa nay rassiyon ka koda bana kar sab ko bait-ul-muqaddas say nikaal diya. us nay bhedon aur gaay-bailon ko baahar haank diya, paisay badalnay vaalon kay sikkay bikher diay aur un kee mezen ulat deen. 16kabootar bechanay vaalon ko us nay kaha, “isay lay jaao. meray baap kay ghar ko mandee men mat badlo.” 17yah dekh kar eesa kay shaagirdon ko kalaam-ay-muqaddas ka yah havaala yaad aaya ki “teray ghar kee ghairat mujhay kha jaaegee.”
18yahoodiyon nay javaab men poochha, “aap hamen kya ilaahee nishaan dikha saktay hain taaki hamen yaqeen aaay ki aap ko yah karnay ka ikhtiyaar hai?”
19eesa nay javaab diya, “is maqdis ko dha do to main isay teen din kay andar dubaara taameer kar doonga.”
20yahoodiyon nay kaha, “bait-ul-muqaddas ko taameer karnay men 46 saal lag gaay thay aur aap usay teen din men taameer karna chaahatay hain?”
21lekin jab eesa nay “is maqdis” kay alfaaz istemaal kiay to is ka matlab us ka apna badan tha. 22us kay murdon men say jee uthnay kay baad us kay shaagirdon ko us kee yah baat yaad aaee. phir vah kalaam-ay-muqaddas aur un baaton par eemaan laaay jo eesa nay kee theen.
eesa insaanee fitrat say vaaqif hai
23jab eesa fasah kee eed kay liyay yarooshalam men tha to bahut say log us kay peshakarada ilaahee nishaanon ko dekh kar us kay naam par eemaan laanay lagay. 24lekin us ko un par etimaad naheen tha, kyoonki vah sab ko jaanta tha. 25aur usay insaan kay baaray men kisee kee gavaahee kee zaroorat naheen thee, kyoonki vah jaanta tha ki insaan kay andar kya kuchh hai.