Yoohanna 3
neekudemus kay saath mulaaqaat
1fareesee firqay ka ek aadmee banaam neekudemus tha jo yahoodee adaalat-ay-aliya ka rukan tha. 2vah raat kay vaqt eesa kay paas aaya aur kaha, “ustaad, ham jaantay hain ki aap aisay ustaad hain jo allaah kee taraf say aaay hain, kyoonki jo ilaahee nishaan aap dikhaatay hain vah sirf aisa shakhs hee dikha sakta hai jis kay saath allaah ho.”
3eesa nay javaab diya, “main tujhay sachch bataata hoon, sirf vah shakhs allaah kee baadshaahee ko dekh sakta hai jo naay siray say paida hua ho.”
4neekudemus nay etiraaz kiya, “kya matlab? boodha aadmee kis tarah naay siray say paida ho sakta hai? kya vah dubaara apnee maan kay pet men ja kar paida ho sakta hai?”
5eesa nay javaab diya, “main tujhay sachch bataata hoon, sirf vah shakhs allaah kee baadshaahee men daakhil ho sakta hai jo paanee aur rooh say paida hua ho. 6jo kuchh jism say paida hota hai vah jismaanee hai, lekin jo rooh say paida hota hai vah ruhaanee hai. 7is liyay too taajjub na kar ki main kaheta hoon, ‘tumhen naay siray say paida hona zaroor hai.’ 8hava jahaan chaahay chaltee hai. too us kee aavaaz to sunta hai, lekin yah naheen jaanta ki kahaan say aatee aur kahaan ko jaatee hai. yahee haalat har us shakhs kee hai jo rooh say paida hua hai.”
9neekudemus nay poochha, “yah kis tarah ho sakta hai?”
10eesa nay javaab diya, “too to israaeel ka ustaad hai. kya is kay baavujood bhee yah baaten naheen samajhta? 11main tujh ko sachch bataata hoon, ham vah kuchh bayaan kartay hain jo ham jaantay hain aur us kee gavaahee detay hain jo ham nay khud dekha hai. to bhee tum log hamaaree gavaahee qabool naheen kartay. 12main nay tum ko duniyaavee baaten sunaaee hain aur tum un par eemaan naheen rakhtay. to phir tum kyoonkar eemaan laaogay agar tumhen aasmaanee baaton kay baaray men bataaoon? 13aasmaan par koee naheen chadha siva-ay-ibn-ay-aadam kay, jo aasmaan say utra hai.
14aur jis tarah moosa nay registaan men saamp ko lakdee par latka kar ooncha kar diya usee tarah zaroor hai ki ibn-ay-aadam ko bhee oonchay par chadhaaya jaaay, 15taaki har ek ko jo us par eemaan laaega abdee zindagee mil jaaay. 16kyoonki allaah nay duniya say itnee muhabbat rakhee ki us nay apnay iklautay farzand ko bakhsh diya, taaki jo bhee us par eemaan laaay halaak na ho balki abdee zindagee paaay. 17kyoonki allaah nay apnay farzand ko is liyay duniya men naheen bheja ki vah duniya ko mujrim thaheraaay balki is liyay ki vah usay najaat day.
18jo bhee us par eemaan laaya hai usay mujrim naheen qaraar diya jaaega, lekin jo eemaan naheen rakhta usay mujrim thaheraaya ja chuka hai. vajah yah hai ki vah allaah kay iklautay farzand kay naam par eemaan naheen laaya. 19aur logon ko mujrim thaheraanay ka sabab yah hai ki go allaah ka noor is duniya men aaya, lekin logon nay noor kee nisbat andheray ko ziyaada piyaar kiya, kyoonki un kay kaam buray thay. 20jo bhee ghalat kaam karta hai vah noor say dushmanee rakhta hai aur us kay qareeb naheen aata taaki us kay buray kaamon ka pol na khul jaaay. 21lekin jo sachcha kaam karta hai vah noor kay paas aata hai taaki zaahir ho jaaay ki us kay kaam allaah kay vaseelay say huay hain.”
eesa aur yaheyaa
22is kay baad eesa apnay shaagirdon kay saath yahoodiya kay ilaaqay men gaya. vahaan vah kuchh der kay liyay un kay saath thahera aur logon ko baptisma denay laga. 23us vaqt yaheya bhee shaalem kay qareeb vaaqay maqaam ainon men baptisma day raha tha, kyoonki vahaan paanee bahut tha. us jagah par log baptisma lenay kay liyay aatay rahay. 24(yaheya ko ab tak jel men naheen daala gaya tha.)
25ek din yaheya kay shaagirdon ka kisee yahoodee kay saath mubaahasa chhid gaya. zer-ay-ghaur mazmoon deenee ghusal tha. 26vah yaheya kay paas aaay aur kahenay lagay, “ustaad, jis aadmee say aap kee darya-ay-yardan kay paar mulaaqaat huee aur jis kay baaray men aap nay gavaahee dee ki vah maseeh hai, vah bhee logon ko baptisma day raha hai. ab sab log usee kay paas ja rahay hain.”
27yaheya nay javaab diya, “har ek ko sirf vah kuchh milta hai jo usay aasmaan say diya jaata hai. 28tum khud is kay gavaah ho ki main nay kaha, ‘main maseeh naheen hoon balki mujhay us kay aagay aagay bheja gaya hai.’ 29doolha hee dulhan say shaadee karta hai, aur dulhan usee kee hai. us ka dost sirf saath khada hota hai. aur doolhay kee aavaaz sun sun kar dost kee khushee kee intiha naheen hotee. main bhee aisa hee dost hoon jis kee khushee pooree ho gaee hai. 30laazim hai ki vah badhta jaaay jabki main ghatta jaaoon.
aasmaan say aanay vaalaa
31jo aasmaan par say aaya hai us ka ikhtiyaar sab par hai. jo duniya say hai us ka taalluq duniya say hee hai aur vah duniyaavee baaten karta hai. lekin jo aasmaan par say aaya hai us ka ikhtiyaar sab par hai. 32jo kuchh us nay khud dekha aur suna hai usee kee gavaahee deta hai. to bhee koee us kee gavaahee ko qabool naheen karta. 33lekin jis nay usay qabool kiya us nay is kee tasdeeq kee hai ki allaah sachcha hai. 34jisay allaah nay bheja hai vah allaah kee baaten sunaata hai, kyoonki allaah apna rooh naap tol kar naheen deta. 35baap apnay farzand ko piyaar karta hai, aur us nay sab kuchh us kay sapurd kar diya hai. 36chunaanchay jo allaah kay farzand par eemaan laata hai abdee zindagee us kee hai. lekin jo farzand ko radd karay vah is zindagee ko naheen dekhega balki allaah ka ghazab us par thahera rahega.”