Yoohanna 4
eesa aur saamree aurat
1fareesiyon ko ittila milee ki eesa yaheya kee nisbat ziyaada shaagird bana raha aur logon ko baptisma day raha hai, 2haalaanki vah khud baptisma naheen deta tha balki us kay shaagird. 3jab khudaavand eesa ko yah baat maaloom huee to vah yahoodiya ko chhod kar galeel ko vaapas chala gaya. 4vahaan pahunchnay kay liyay usay saamriya men say guzarna tha.
5chaltay chaltay vah ek shaher kay paas pahunch gaya jis ka naam sookhaar tha. yah us zameen kay qareeb tha jo yaaqoob nay apnay betay yoosuf ko dee thee. 6vahaan yaaqoob ka kuaan tha. eesa safar say thak gaya tha, is liyay vah kuen par baith gaya. dopaher kay taqreeban baarah baj gaay thay.
7ek saamree aurat paanee bharnay aaee. eesa nay us say kaha, “mujhay zara paanee pila.” 8(us kay shaagird khaana khareednay kay liyay shaher gaay huay thay.)
9saamree aurat nay taajjub kiya, kyoonki yahoodee saamriyon kay saath taalluq rakhnay say inkaar kartay hain. us nay kaha, “aap to yahoodee hain, aur main saamree aurat hoon. aap kis tarah mujh say paanee pilaanay kee darakhwaast kar saktay hain?”
10eesa nay javaab diya, “agar too us bakhshish say vaaqif hotee jo allaah tujh ko dena chaahata hai aur too usay jaantee jo tujh say paanee maang raha hai to too us say maangtee aur vah tujhay zindagee ka paanee deta.”
11khaatoon nay kaha, “khudaavand, aap kay paas to baaltee naheen hai aur yah kuaan gahera hai. aap ko zindagee ka yah paanee kahaan say mila? 12kya aap hamaaray baap yaaqoob say baday hain jis nay hamen yah kuaan diya aur jo khud bhee apnay beton aur revdon samet us kay paanee say lutf’andoz hua?”
13eesa nay javaab diya, “jo bhee is paanee men say piay usay dubaara piyaas lagegee. 14lekin jisay main paanee pila doon usay baad men kabhee bhee piyaas naheen lagegee. balki jo paanee main usay doonga vah us men ek chashma ban jaaega jis say paanee phoot kar abdee zindagee muhayya karega.”
15aurat nay us say kaha, “khudaavand, mujhay yah paanee pila den. phir mujhay kabhee bhee piyaas naheen lagegee aur mujhay baar baar yahaan a kar paanee bharna naheen padega.”
16eesa nay kaha, “ja, apnay khaavand ko bula la.”
17aurat nay javaab diya, “mera koee khaavand naheen hai.”
eesa nay kaha, “too nay saheeh kaha ki mera khaavand naheen hai, 18kyoonki teree shaadee paanch mardon say ho chukee hai aur jis aadmee kay saath too ab rah rahee hai vah tera shauhar naheen hai. teree baat bilkul durust hai.”
19aurat nay kaha, “khudaavand, main dekhtee hoon ki aap nabee hain. 20hamaaray baapdaada to isee pahaad par ibaadat kartay thay jabki aap yahoodee log israar kartay hain ki yarooshalam vah markaz hai jahaan hamen ibaadat karnee hai.”
21eesa nay javaab diya, “ai khaatoon, yaqeen jaan ki vah vaqt aaega jab tum na to is pahaad par baap kee ibaadat karogay, na yarooshalam men. 22tum saamree us kee parastish kartay ho jisay naheen jaantay. is kay muqaablay men ham us kee parastish kartay hain jisay jaantay hain, kyoonki najaat yahoodiyon men say hai. 23lekin vah vaqt a raha hai balki pahunch chuka hai jab haqeeqee parastaar rooh aur sachchaaee say baap kee parastish karengay, kyoonki baap aisay hee parastaar chaahata hai. 24allaah rooh hai, is liyay laazim hai ki us kay parastaar rooh aur sachchaaee say us kee parastish karen.”
25aurat nay us say kaha, “mujhay maaloom hai ki maseeh yaanee masah kiya hua shakhs a raha hai. jab vah aaega to hamen sab kuchh bata dega.”
26is par eesa nay usay bataaya, “main hee maseeh hoon jo teray saath baat kar raha hoon.”
27usee lamhay shaagird pahunch gaay. unhon nay jab dekha ki eesa ek aurat say baat kar raha hai to taajjub kiya. lekin kisee nay poochhnay kee jur’at na kee ki “aap kya chaahatay hain?” ya “aap is aurat say kyoon baaten kar rahay hain?”
28aurat apna ghada chhod kar shaher men chalee gaee aur vahaan logon say kahenay lagee, 29“aao, ek aadmee ko dekho jis nay mujhay sab kuchh bata diya hai jo main nay kiya hai. vah maseeh to naheen hai?” 30chunaanchay vah shaher say nikal kar eesa kay paas aaay.
31itnay men shaagird zor day kar eesa say kahenay lagay, “ustaad, kuchh khaana kha len.”
32lekin us nay javaab diya, “meray paas khaanay kee aisee cheez hai jis say tum vaaqif naheen ho.”
33shaagird aapas men kahenay lagay, “kya koee us kay paas khaana lay kar aaya?”
34lekin eesa nay un say kaha, “mera khaana yah hai ki us kee marzee pooree karoon jis nay mujhay bheja hai aur us ka kaam takmeel tak pahunchaaoon. 35tum to khud kahetay ho, ‘mazeed chaar maheenay tak fasal pak jaaegee.’ lekin main tum ko bataata hoon, apnee nazar utha kar kheton par ghaur karo. fasal pak gaee hai aur kataaee kay liyay tayyaar hai. 36fasal kee kataaee shuroo ho chukee hai. kataaee karnay vaalay ko mazdooree mil rahee hai aur vah fasal ko abdee zindagee kay liyay jama kar raha hai taaki beej bonay vaala aur kataaee karnay vaala donon mil kar khushee mana saken. 37yoon yah kahaavat durust saabit ho jaatee hai ki ‘ek beej bota aur doosra fasal kaatta hai.’ 38main nay tum ko us fasal kee kataaee karnay kay liyay bhej diya hai jisay tayyaar karnay kay liyay tum nay mehanat naheen kee. auron nay khoob mehanat kee hai aur tum is say faaida utha kar fasal jama kar saktay ho.”
39us shaher kay bahut say saamree eesa par eemaan laaay. vajah yah thee ki us aurat nay us kay baaray men yah gavaahee dee thee, “us nay mujhay sab kuchh bata diya jo main nay kiya hai.” 40jab vah us kay paas aaay to unhon nay minnat kee, “hamaaray paas thaheren.” chunaanchay vah do din vahaan raha.
41aur us kee baaten sun kar mazeed bahut say log eemaan laaay. 42unhon nay aurat say kaha, “ab ham teree baaton kee bina par eemaan naheen rakhtay balki is liyay ki ham nay khud sun aur jaan liya hai ki vaaqaee duniya ka najaatadihanda yahee hai.”
afsar kay betay kee shifaa
43vahaan do din guzaarnay kay baad eesa galeel ko chala gaya. 44us nay khud gavaahee day kar kaha tha ki nabee kee us kay apnay vatan men izzat naheen hotee. 45ab jab vah galeel pahuncha to maqaamee logon nay usay khush’aamadeed kaha, kyoonki vah fasah kee eed manaanay kay liyay yarooshalam aaay thay aur unhon nay sab kuchh dekha jo eesa nay vahaan kiya tha.
46phir vah dubaara qaana men aaya jahaan us nay paanee ko mai men badal diya tha. us ilaaqay men ek shaahee afsar tha jis ka beta kafarnahoom men beemaar pada tha. 47jab usay ittila milee ki eesa yahoodiya say galeel pahunch gaya hai to vah us kay paas gaya aur guzaarish kee, “kaana say meray paas a kar meray betay ko shifa den, kyoonki vah marnay ko hai.” 48eesa nay us say kaha, “jab tak tum log ilaahee nishaan aur mojizay naheen dekhtay eemaan naheen laatay.”
49shaahee afsar nay kaha, “khudaavand aaen, is say pahelay ki mera ladka mar jaaay.”
50eesa nay javaab diya, “ja, tera beta zinda rahega.”
aadmee eesa kee baat par eemaan laaya aur apnay ghar chala gaya. 51vah abhee raastay men tha ki us kay naukar us say milay. unhon nay usay ittila dee ki beta zinda hai.
52us nay un say poochhgichh kee ki us kee tabeeat kis vaqt say behatar honay lagee thee. unhon nay javaab diya, “bukhaar kal dopaher ek bajay utar gaya.” 53phir baap nay jaan liya ki usee vaqt eesa nay usay bataaya tha, “tumhaara beta zinda rahega.” aur vah apnay pooray gharaanay samet us par eemaan laaya.
54yoon eesa nay apna doosra ilaahee nishaan us vaqt dikhaaya jab vah yahoodiya say galeel men aaya tha.