Ahabaar 2
ghalla kee nazar
1agar koee rabb ko ghalla kee nazar pesh karna chaahay to vah is kay liyay behtareen maida istemaal karay. us par vah zaitoon ka tel undelay aur lubaan rakh kar 2usay haaroon kay beton kay paas lay aaay jo imaam hain. imaam tel say milaaya gaya mutthee bhar maida aur tamaam lubaan lay kar qurbaangaah par jala day. yah yaadgaar ka hissa hai, aur us kee khushboo rabb ko pasand hai. 3baaqee maida aur tel haaroon aur us kay beton ka hissa hai. vah rabb kee jalnay vaalee qurbaaniyon men say ek nihaayat muqaddas hissa hai.
4agar yah qurbaanee tanoor men pakaaee huee rotee ho to us men khameer na ho. is kee do qismen ho saktee hain, rotiyaan jo behtareen maiday aur tel say banee huee hon aur rotiyaan jin par tel lagaaya gaya ho.
5agar yah qurbaanee tavay par pakaaee huee rotee ho to vah behtareen maiday aur tel kee ho. us men khameer na ho. 6choonki vah ghalla kee nazar hai is liyay rotee ko tukday tukday karna aur us par tel daalna.
7agar yah qurbaanee kadaahee men pakaaee huee rotee ho to vah behtareen maiday aur tel kee ho.
8agar too in cheezon kee banee huee ghalla kee nazar rabb kay huzoor laana chaahay to usay imaam ko pesh karna. vahee usay qurbaangaah kay paas lay aaay. 9phir imaam yaadgaar ka hissa alag karkay usay qurbaangaah par jala day. aisee qurbaanee kee khushboo rabb ko pasand hai. 10qurbaanee ka baaqee hissa haaroon aur us kay beton kay liyay hai. vah rabb kee jalnay vaalee qurbaaniyon men say ek nihaayat muqaddas hissa hai.
11ghalla kee jitnee nazren tum rabb ko pesh kartay ho un men khameer na ho, kyoonki laazim hai ki tum rabb ko jalnay vaalee qurbaanee pesh kartay vaqt na khameer, na shahed jalaao. 12yah cheezen fasal kay pahelay phalon kay saath rabb ko pesh kee ja saktee hain, lekin unhen qurbaangaah par na jalaaya jaaay, kyoonki vahaan rabb ko un kee khushboo pasand naheen hai. 13ghalla kee har nazar men namak ho, kyoonki namak us ahd kee numaaindagee karta hai jo teray khuda nay teray saath baandha hai. tujhay har qurbaanee men namak daalna hai.
14agar too ghalla kee nazar kay liyay fasal kay pahelay phal pesh karna chaahay to kuchlee huee kachchee baaliyaan bhoon kar pesh karna. 15choonki vah ghalla kee nazar hai is liyay us par tel undelana aur lubaan rakhna. 16kuchlay huay daanon aur tel ka jo hissa rabb ka hai yaanee yaadgaar ka hissa usay imaam tamaam lubaan kay saath jala day. yah nazar rabb kay liyay jalnay vaalee qurbaanee hai.