Ahabaar 5

gunaah kee qurbaaniyon kay baaray men khaas hidaayaat

¹ho sakta hai ki kisee nay yoon gunaah kiya ki us nay koee jurm dekha ya vah us kay baaray men kuchh jaanta hai. to bhee jab gavaahon ko qasam kay liyay bulaaya jaata hai to vah gavaahee denay kay liyay saamnay naheen aata. is soorat men vah qusoorvaar thaherta hai.

²ho sakta hai ki kisee nay ghairiraadee taur par kisee naapaak cheez ko chhoo liya hai, khwaah vah kisee janglee jaanvar, maveshee ya rengnay vaalay jaanvar kee laash kyoon na ho. is soorat men vah naapaak hai aur qusoorvaar thaherta hai.

³ho sakta hai ki kisee nay ghairiraadee taur par kisee shakhs kee naapaakee ko chhoo liya hai yaanee us kee koee aisee cheez jis say vah naapaak ho gaya hai. jab usay maaloom ho jaata hai to vah qusoorvaar thaherta hai.

⁴ho sakta hai ki kisee nay beparvaaee say kuchh karnay kee qasam khaaee hai, chaahay vah achchha kaam tha ya ghalat. jab vah jaan leta hai ki us nay kya kiya hai to vah qusoorvaar thaherta hai.

⁵jo is tarah kay kisee gunaah kee bina par qusoorvaar ho, laazim hai ki vah apna gunaah tasleem karay. ⁶phir vah gunaah kee qurbaanee kay taur par ek bhed ya bakree pesh karay. yoon imaam us ka kaffaara dega.

⁷agar qusoorvaar shakhs ghurbat kay baais bhed ya bakree na day sakay to vah rabb ko do qumriyaan ya do javaan kabootar pesh karay, ek gunaah kee qurbaanee kay liyay aur ek bhasm honay vaalee qurbaanee kay liyay. ⁸vah unhen imaam kay paas lay aaay. imaam pahelay gunaah kee qurbaanee kay liyay parinda pesh karay. vah us kee gardan marod daalay lekin aisay ki sar juda na ho jaaay. ⁹phir vah us kay khoon men say kuchh qurbaangaah kay ek paheloo par chhidkay. baaqee khoon vah yoon nikalnay day ki vah qurbaangaah kay paaay par tapkay. yah gunaah kee qurbaanee hai. ¹⁰phir imaam doosray parinday ko qavaaid kay mutaabiq bhasm honay vaalee qurbaanee kay taur par pesh karay. yoon imaam us aadmee ka kaffaara dega aur usay muaafee mil jaaegee.

¹¹agar vah shakhs ghurbat kay baais do qumriyaan ya do javaan kabootar bhee na day sakay to phir vah gunaah kee qurbaanee kay liyay dedh kilograam behtareen maida pesh karay. vah us par na tel undelay, na lubaan rakhay, kyoonki yah ghalla kee nazar naheen balki gunaah kee qurbaanee hai. ¹²vah usay imaam kay paas lay aaay jo yaadgaar ka hissa yaanee mutthee bhar un qurbaaniyon kay saath jala day jo rabb kay liyay jalaaee jaatee hain. yah gunaah kee qurbaanee hai. ¹³yoon imaam us aadmee ka kaffaara dega aur usay muaafee mil jaaegee. ghalla kee nazar kee tarah baaqee maida imaam ka hissa hai.”

qusoor kee qurbaanee

¹⁴rabb nay moosa say kaha, ¹⁵“agar kisee nay beeemaanee karkay ghairiraadee taur par rabb kee makhsoos aur muqaddas cheezon kay silsilay men gunaah kiya ho, aisa shakhs qusoor kee qurbaanee kay taur par rabb ko beaib aur qeemat kay lihaaz say munaasib mendha ya bakra pesh karay. us kee qeemat maqdis kee sharah kay mutaabiq muqarrar kee jaaay. ¹⁶jitna nuqsaan maqdis ko hua hai utna hee vah day. is kay ilaava vah mazeed 20 feesad ada karay. vah usay imaam ko day day aur imaam jaanvar ko qusoor kee qurbaanee kay taur par pesh karkay us ka kaffaara day. yoon usay muaafee mil jaaegee.

¹⁷agar koee ghairiraadee taur par gunaah karkay rabb kay kisee hukm say tajaavuz karay to vah qusoorvaar hai, aur vah us ka zimmaadaar thaherega. ¹⁸vah qusoor kee qurbaanee kay taur par imaam kay paas ek beaib aur qeemat kay lihaaz say munaasib mendha lay aaay. us kee qeemat maqdis kee sharah kay mutaabiq muqarrar kee jaaay. phir imaam yah qurbaanee us gunaah kay liyay chadhaaay jo qusoorvaar shakhs nay ghairiraadee taur par kiya hai. yoon usay muaafee mil jaaegee. ¹⁹yah qusoor kee qurbaanee hai, kyoonki vah rabb ka gunaah karkay qusoorvaar thahera hai.”