Looqa 23
peelaatus kay saamne
1phir pooree majlis uthee aur usay peelaatus kay paas lay aaee. 2vahaan vah us par ilzaam laga kar kahenay lagay, “ham nay maaloom kiya hai ki yah aadmee hamaaree qaum ko gumraah kar raha hai. yah shahenshaah ko taiks denay say mana karta aur daava karta hai ki main maseeh aur baadshaah hoon.”
3peelaatus nay us say poochha, “achchha, tum yahoodiyon kay baadshaah ho?”
eesa nay javaab diya, “jee, aap khud kahetay hain.”
4phir peelaatus nay raahanuma imaamon aur hujoom say kaha, “mujhay is aadmee par ilzaam lagaanay kee koee vajah nazar naheen aatee.”
5lekin vah aday rahay. unhon nay kaha, “vah pooray yahoodiya men taaleem detay huay qaum ko uksaata hai. vah galeel say shuroo karkay yahaan tak a pahuncha hai.”
herodes kay saamne
6yah sun kar peelaatus nay poochha, “kya yah shakhs galeel ka hai?” 7jab usay maaloom hua ki eesa galeel yaanee us ilaaqay say hai jis par herodes antipaas kee hukoomat hai to us nay usay herodes kay paas bhej diya, kyoonki vah bhee us vaqt yarooshalam men tha. 8herodes eesa ko dekh kar bahut khush hua, kyoonki us nay us kay baaray men bahut kuchh suna tha aur is liyay kaafee der say us say milna chaahata tha. ab us kee badee khwaahish thee ki eesa ko koee mojiza kartay huay dekh sakay. 9us nay us say bahut saaray savaal kiay, lekin eesa nay ek ka bhee javaab na diya. 10raahanuma imaam aur shareeat kay ulma saath khaday baday josh say us par ilzaam lagaatay rahay. 11phir herodes aur us kay faujiyon nay us kee tahqeer kartay huay us ka mazaaq udaaya aur usay chamakdaar libaas pahena kar peelaatus kay paas vaapas bhej diya. 12usee din herodes aur peelaatus dost ban gaay, kyoonki is say pahelay un kee dushmanee chal rahee thee.
saza-ay-maut ka faislaa
13phir peelaatus nay raahanuma imaamon, sardaaron aur avaam ko jama karke 14un say kaha, “tum nay is shakhs ko meray paas la kar is par ilzaam lagaaya hai ki yah qaum ko uksa raha hai. main nay tumhaaree maujoodgee men is ka jaaiza lay kar aisa kuchh naheen paaya jo tumhaaray ilzaamaat kee tasdeeq karay. 15herodes bhee kuchh naheen maaloom kar saka, is liyay us nay isay hamaaray paas vaapas bhej diya hai. is aadmee say koee bhee aisa qusoor naheen hua ki yah saza-ay-maut kay laaiq hai. 16is liyay main isay kodon kee saza day kar riha kar deta hoon.”
17[asal men yah us ka farz tha ki vah eed kay mauqay par un kee khaatir ek qaidee ko riha kar day.]
18lekin sab mil kar shor macha kar kahenay lagay, “isay lay jaaen! isay naheen balki bar-abba ko riha karkay hamen den.” 19(bar-abba ko is liyay jel men daala gaya tha ki vah qaatil tha aur us nay shaher men hukoomat kay khilaaf baghaavat kee thee.)
20peelaatus eesa ko riha karna chaahata tha, is liyay vah dubaara un say mukhaatib hua. 21lekin vah chillaatay rahay, “isay masloob karen, isay masloob karen.”
22phir peelaatus nay teesree dafa un say kaha, “kyoon? us nay kya jurm kiya hai? mujhay isay saza-ay-maut denay kee koee vajah nazar naheen aatee. is liyay main isay koday lagva kar riha kar deta hoon.”
23lekin vah bada shor macha kar usay masloob karnay ka taqaaza kartay rahay, aur aakhirkaar un kee aavaazen ghaalib a gaeen. 24phir peelaatus nay faisla kiya ki un ka mutaalba poora kiya jaaay. 25us nay us aadmee ko riha kar diya jo apnee baaghiyaana harkaton aur qatl kee vajah say jel men daal diya gaya tha jabki eesa ko us nay un kee marzee kay mutaabiq un kay havaalay kar diya.
eesa ko masloob kiya jaata hai
26jab faujee eesa ko lay ja rahay thay to unhon nay ek aadmee ko pakad liya jo libiya kay shaher kuren ka rahenay vaala tha. us ka naam shamaaoon tha. us vaqt vah deehaat say shaher men daakhil ho raha tha. unhon nay saleeb ko us kay kandhon par rakh kar usay eesa kay peechhay chalnay ka hukm diya.
27ek bada hujoom us kay peechhay ho liya jis men kuchh aisee aurten bhee shaamil theen jo seena peet peet kar us ka maatam kar rahee theen. 28eesa nay mud kar un say kaha, “yarooshalam kee betiyo! meray vaastay na ro balki apnay aur apnay bachchon kay vaastay ro. 29kyoonki aisay din aaengay jab log kahengay, ‘mubaarak hain vah jo baanjh hain, jinhon nay na to bachchon ko janm diya, na doodh pilaaya.’ 30phir log pahaadon say kahenay lagengay, ‘ham par gir pado,’ aur pahaadiyon say ki ‘hamen chhupa lo.’ 31kyoonki agar haree lakdee say aisa sulook kiya jaata hai to phir sookhee lakdee ka kya banega?”
32do aur mardon ko bhee phaansee denay kay liyay baahar lay jaaya ja raha tha. donon mujrim thay. 33chaltay chaltay vah us jagah pahunchay jis ka naam khopdee tha. vahaan unhon nay eesa ko donon mujrimon samet masloob kiya. ek mujrim ko us kay daaen haath aur doosray ko us kay baaen haath latka diya gaya. 34eesa nay kaha, “ai baap, inhen muaaf kar, kyoonki yah jaantay naheen ki kya kar rahay hain.”
unhon nay qur’a daal kar us kay kapday aapas men baant liyay. 35hujoom vahaan khada tamaasha dekhta raha jabki qaum kay sardaaron nay us ka mazaaq bhee udaaya. unhon nay kaha, “us nay auron ko bachaaya hai. agar yah allaah ka chuna hua aur maseeh hai to apnay aap ko bachaaay.”
36faujiyon nay bhee usay laan-taan kee. us kay paas a kar unhon nay usay mai ka sirka pesh kiyaa 37aur kaha, “agar too yahoodiyon ka baadshaah hai to apnay aap ko bacha lay.”
38us kay sar kay oopar ek takhtee lagaaee gaee thee jis par likha tha, “yah yahoodiyon ka baadshaah hai.”
39jo mujrim us kay saath masloob huay thay un men say ek nay kufr baktay huay kaha, “kya too maseeh naheen hai? to phir apnay aap ko aur hamen bhee bacha lay.”
40lekin doosray nay yah sun kar usay daanta, “kya too allaah say bhee naheen darta? jo saza usay dee gaee hai vah tujhay bhee milee hai. 41hamaaree saza to vaajibee hai, kyoonki hamen apnay kaamon ka badla mil raha hai, lekin is nay koee bura kaam naheen kiya.” 42phir us nay eesa say kaha, “jab aap apnee baadshaahee men aaen to mujhay yaad karen.”
43eesa nay us say kaha, “main tujhay sachch bataata hoon ki too aaj hee meray saath firdaus men hoga.”
eesa kee maut
44baarah bajay say dopaher teen bajay tak poora mulk andheray men doob gaya. 45sooraj taareek ho gaya aur bait-ul-muqaddas kay muqaddastareen kamray kay saamnay latka hua parda do hisson men phat gaya. 46eesa oonchee aavaaz say pukaar utha, “ai baap, main apnee rooh teray haathon men saumpta hoon.” yah kah kar us nay dam chhod diya.
47yah dekh kar vahaan khaday faujee afsar [a] sau sipaahiyon par muqarrar afsar. nay allaah kee tamjeed karkay kaha, “yah aadmee vaaqaee raastbaaz tha.”
48aur hujoom kay tamaam log jo yah tamaasha dekhnay kay liyay jama huay thay yah sab kuchh dekh kar chhaatee peetnay lagay aur shaher men vaapas chalay gaay. 49lekin eesa kay jaannay vaalay kuchh faasilay par khaday dekhtay rahay. un men vah khavaateen bhee shaamil theen jo galeel men us kay peechhay chal kar yahaan tak us kay saath aaee theen.
eesa ko dafan kiya jaata hai
50vahaan ek nek aur raastbaaz aadmee banaam yoosuf tha. vah yahoodee adaalat-ay-aliya ka rukan thaa 51lekin doosron kay faislay aur harkaton par razaamand naheen hua tha. yah aadmee yahoodiya kay shaher arimatiyaah ka rahenay vaala tha aur is intizaar men tha ki allaah kee baadshaahee aaay. 52ab us nay peelaatus kay paas ja kar us say eesa kee laash lay jaanay kee ijaazat maangee. 53phir laash ko utaar kar us nay usay kataan kay kafan men lapet kar chataan men taraashee huee ek qabr men rakh diya jis men ab tak kisee ko dafnaaya naheen gaya tha. 54yah tayyaaree ka din yaanee jum’a tha, lekin sabat ka din shuroo honay ko thaa [b] yahoodee din sooraj kay ghuroob honay say shuroo hota hai. . 55jo aurten eesa kay saath galeel say aaee theen vah yoosuf kay peechhay ho leen. unhon nay qabr ko dekha aur yah bhee ki eesa kee laash kis tarah us men rakhee gaee hai. 56phir vah shaher men vaapas chalee gaeen aur us kee laash kay liyay khushboodaar masaalay tayyaar karnay lageen. lekin beech men sabat ka din shuroo hua, is liyay unhon nay shareeat kay mutaabiq aaraam kiya.