Looqa 3
yaheya baptisma denay vaalay kee khidmat
1phir rom kay shahenshaah tibriyus kee hukoomat ka pandrahevaan saal a gaya. us vaqt puntiyus peelaatus sooba yahoodiya ka gavarnar tha, herodes antipaas galeel ka haakim tha, us ka bhaaee filippus itooriya aur trakhoneetis kay ilaaqay ka, jabki lisaaniyaas abilenay ka. 2hanna aur kaaifa donon imaam-ay-aazam thay. un dinon men allaah yaheya bin zakariyaah say hamkalaam hua jab vah registaan men tha. 3phir vah darya-ay-yardan kay pooray ilaaqay men say guzra. har jagah us nay elaan kiya ki tauba karkay baptisma lo taaki tumhen apnay gunaahon kee muaafee mil jaaay. 4yoon yasaayaah nabee kay alfaaz pooray huay jo us kee kitaab men darj hain :
‘registaan men ek aavaaz pukaar rahee hai,
rabb kee raah tayyaar karo!
us kay raastay seedhay banaao.
5laazim hai ki har vaadee bhar dee jaaay,
zarooree hai ki har pahaad aur buland jagah maidaan ban jaaay.
jo tedha hai usay seedha kiya jaaay,
jo naahamvaar hai usay hamvaar kiya jaaay.
6aur tamaam insaan allaah kee najaat dekhengay.’
7jab bahut say log yaheya kay paas aaay taaki us say baptisma len to us nay un say kaha, “ai zahereelay saamp kay bachcho! kis nay tum ko aanay vaalay ghazab say bachnay kee hidaayat kee? 8apnee zindagee say zaahir karo ki tum nay vaaqaee tauba kee hai. yah khayaal mat karo ki ham to bach jaaengay kyoonki ibraaheem hamaara baap hai. main tum ko bataata hoon ki allaah in pattharon say bhee ibraaheem kay liyay aulaad paida kar sakta hai. 9ab to adaalat kee kulhaadee darakhton kee jadon par rakhee huee hai. har darakht jo achchha phal na laaay kaata aur aag men jhonka jaaega.”
10logon nay us say poochha, “phir ham kya karen?”
11us nay javaab diya, “jis kay paas do kurtay hain vah ek us ko day day jis kay paas kuchh na ho. aur jis kay paas khaana hai vah usay khila day jis kay paas kuchh na ho.”
12taiks lenay vaalay bhee baptisma lenay kay liyay aaay to unhon nay poochha, “ustaad, ham kya karen?”
13us nay javaab diya, “sirf utnay taiks lena jitnay hukoomat nay muqarrar kiay hain.”
14kuchh faujiyon nay poochha, “hamen kya karna chaahiay?”
us nay javaab diya, “kisee say jabran ya ghalat ilzaam laga kar paisay na lena balki apnee jaaiz aamdanee par iktifa karna.”
15logon kee tavaqqoaat bahut badh gaeen. vah apnay dilon men sochnay lagay ki kya yah maseeh to naheen hai? 16is par yaheya un sab say mukhaatib ho kar kahenay laga, “main to tumhen paanee say baptisma deta hoon, lekin ek aanay vaala hai jo mujh say bada hai. main us kay jooton kay tasmay kholnay kay bhee laaiq naheen. vah tumhen rooh-ul-quds aur aag say baptisma dega. 17vah haath men chhaaj pakday huay anaaj ko bhoosay say alag karnay kay liyay tayyaar khada hai. vah gaahanay kee jagah ko bilkul saaf karkay anaaj ko apnay godaam men jama karega. lekin bhoosay ko vah aisee aag men jhonkega jo bujhnay kee naheen.”
18is qism kee bahut see aur baaton say us nay qaum ko naseehat kee aur usay allaah kee khushkhabaree sunaaee. 19lekin ek din yoon hua ki yaheya nay galeel kay haakim herodes antipaas ko daanta. vajah yah thee ki herodes nay apnay bhaaee kee beevee herodiyaas say shaadee kar lee thee aur is kay ilaava aur bahut say ghalat kaam kiay thay. 20yah malaamat sun kar herodes nay apnay ghalat kaamon men aur izaafa yah kiya ki yaheya ko jel men daal diya.
eesa ka baptismaa
21ek din jab bahut say logon ko baptisma diya ja raha tha to eesa nay bhee baptisma liya. jab vah dua kar raha tha to aasmaan khul gayaa 22aur rooh-ul-quds jismaanee soorat men kabootar kee tarah us par utar aaya. saath saath aasmaan say ek aavaaz sunaaee dee, “too mera piyaara farzand hai, tujh say main khush hoon.”
eesa ka nasabnaamaa
23eesa taqreeban tees saal ka tha jab us nay khidmat shuroo kee. usay yoosuf ka beta samjha jaata tha. us ka nasabnaama yah hai : yoosuf bin elee 24bin mattaat bin laavee bin malkee bin yanna bin yoosuf 25bin mattitiyaah bin aamoos bin naahoom bin asaliyaah bin nogaa 26bin maaat bin mattitiyaah bin shamaee bin yosekh bin yoodaah 27bin yoohannaah bin resa bin zarubbaabal bin siyaalteeel bin neree 28bin malikee bin addee bin qosaam bin ilmodaam bin er 29bin yashooa bin ileeazar bin yoreem bin mattaat bin laavee 30bin shamaaoon bin yahoodaah bin yoosuf bin yonaam bin iliyaaqeem 31bin maleaah bin minnaah bin mattitiyaah bin naatan bin daaood 32bin yassee bin obed bin boaz bin salmon bin nahson 33bin ammeenadaab bin admeen bin arnee bin hasron bin faaras bin yahoodaah 34bin yaaqoob bin ishaaq bin ibraaheem bin taarah bin nahoor 35bin sarooj bin raoo bin falaj bin ibar bin silah 36bin qeenaan bin arfaksad bin sim bin nooh bin lamak 37bin matoosilah bin hanook bin yaarid bin mahelal-el bin qeenaan 38bin anoos bin set bin aadam. aadam ko allaah nay paida kiya tha.