Looqa 4
eesa ko aazmaaya jaata hai
1eesa darya-ay-yardan say vaapas aaya. vah rooh-ul-quds say maamoor tha jis nay usay registaan men la kar us kee raahanumaaee kee. 2vahaan usay chaalees din tak iblees say aazmaaya gaya. is pooray arsay men us nay kuchh na khaaya. aakhirkaar usay bhook lagee.
3phir iblees nay us say kaha, “agar too allaah ka farzand hai to is patthar ko hukm day ki rotee ban jaaay.”
4lekin eesa nay inkaar karkay kaha, “hargiz naheen, kyoonki kalaam-ay-muqaddas men likha hai ki insaan kee zindagee sirf rotee par munhasir naheen hotee.”
5is par iblees nay usay kisee buland jagah par lay ja kar ek lamhay men duniya kay tamaam mamaalik dikhaaay. 6vah bola, “main tujhay in mamaalik kee shaan-o-shaukat aur in par tamaam ikhtiyaar doonga. kyoonki yah meray sapurd kiay gaay hain aur jisay chaahoon day sakta hoon. 7lihaaza yah sab kuchh tera hee hoga. shart yah hai ki too mujhay sijda karay.”
8lekin eesa nay javaab diya, “hargiz naheen, kyoonki kalaam-ay-muqaddas men yoon likha hai, ‘rabb apnay allaah ko sijda kar aur sirf usee kee ibaadat kar’.”
9phir iblees nay usay yarooshalam lay ja kar bait-ul-muqaddas kee sab say oonchee jagah par khada kiya aur kaha, “agar too allaah ka farzand hai to yahaan say chhalaang laga day. 10kyoonki kalaam-ay-muqaddas men likha hai, ‘vah apnay farishton ko teree hifaazat karnay ka hukm dega, 11aur vah tujhay apnay haathon par utha lengay taaki teray paaon ko patthar say thes na lagay’.”
12lekin eesa nay teesree baar inkaar kiya aur kaha, “kalaam-ay-muqaddas yah bhee farmaata hai, ‘rabb apnay allaah ko na aazmaana’.”
13in aazmaaishon kay baad iblees nay eesa ko kuchh der kay liyay chhod diya.
khidmat ka aaghaaz
14phir eesa vaapas galeel men aaya. us men rooh-ul-quds kee quvvat thee, aur us kee shuharat us pooray ilaaqay men phail gaee. 15vahaan vah un kay ibaadatkhaanon men taaleem denay laga, aur sab nay us kee taareef kee.
eesa ko naasrat men radd kiya jaata hai
16ek din vah naasrat pahuncha jahaan vah parvaan chadha tha. vahaan bhee vah maamool kay mutaabiq sabat kay din maqaamee ibaadatkhaanay men ja kar kalaam-ay-muqaddas men say padhnay kay liyay khada ho gaya. 17usay yasaayaah nabee kee kitaab dee gaee to us nay toomaar ko khol kar yah havaala dhoond nikaala,
18“rabb ka rooh mujh par hai,
kyoonki us nay mujhay tel say masah karke
ghareebon ko khushkhabaree sunaanay ka ikhtiyaar diya hai.
us nay mujhay yah elaan karnay kay liyay bheja hai ki
qaidiyon ko rihaaee milegee
aur andhay dekhengay.
us nay mujhay bheja hai ki main kuchlay huon ko aazaad karaaoon
19aur rabb kee taraf say bahaalee kay saal ka elaan karoon.”
20yah kah kar eesa nay toomaar ko lapet kar ibaadatkhaanay kay mulaazim ko vaapas kar diya aur baith gaya. saaree jamaaat kee aankhen us par lagee theen. 21phir vah bol utha, “aaj allaah ka yah farmaan tumhaaray suntay hee poora ho gaya hai.”
22sab eesa kay haq men baaten karnay lagay. vah un purfazl baaton par hairatzada thay jo us kay munh say nikleen, aur vah kahenay lagay, “kya yah yoosuf ka beta naheen hai?”
23us nay un say kaha, “beshak tum mujhay yah kahaavat bataaogay, ‘ai daaktar, pahelay apnay aap ka ilaaj kar.’ yaanee sunnay men aaya hai ki aap nay kafarnahoom men mojizay kiay hain. ab aisay mojizay yahaan apnay vatnee shaher men bhee dikhaaen. 24lekin main tum ko sachch bataata hoon ki koee bhee nabee apnay vatnee shaher men maqbool naheen hota.
25yah haqeeqat hai ki ilyaas nabee kay zamaanay men israaeel men bahut see zarooratmand bevaaen theen, us vaqt jab saadhay teen saal tak baarish na huee aur pooray mulk men sakht kaal pada. 26is kay baavujood ilyaas ko un men say kisee kay paas naheen bheja gaya balki ek ghairyahoodee beva kay paas jo saida kay shaher saarpat men rahetee thee. 27isee tarah ileesha nabee kay zamaanay men israaeel men kodh kay bahut say mareez thay. lekin un men say kisee ko shifa na milee balki sirf naamaan ko jo mulk-ay-shaam ka shaheree tha.”
28jab ibaadatkhaanay men jama logon nay yah baaten suneen to vah baday taish men a gaay. 29vah uthay aur usay shaher say nikaal kar us pahaadee kay kinaaray lay gaay jis par shaher ko taameer kiya gaya tha. vahaan say vah usay neechay giraana chaahatay thay, 30lekin eesa un men say guzar kar vahaan say chala gaya.
aadmee ka badruh kee girift say rihaaee paanaa
31is kay baad vah galeel kay shaher kafarnahoom ko gaya aur sabat kay din ibaadatkhaanay men logon ko sikhaanay laga. 32vah us kee taaleem sun kar hakka-bakka rah gaay, kyoonki vah ikhtiyaar kay saath taaleem deta tha. 33ibaadatkhaanay men ek aadmee tha jo kisee naapaak rooh kay qabzay men tha. ab vah cheekh cheekh kar bolnay laga, 34“aray naasrat kay eesa, hamaara aap kay saath kya vaasta hai? kya aap hamen halaak karnay aaay hain? main to jaanta hoon ki aap kaun hain, aap allaah kay quddoos hain.”
35eesa nay usay daant kar kaha, “khaamosh! aadmee men say nikal ja!” is par badruh aadmee ko jamaaat kay beech men farsh par patak kar us men say nikal gaee. lekin vah aadmee zakhmee na hua.
36tamaam log ghabra gaay aur ek doosray say kahenay lagay, “us aadmee kay alfaaz men kya ikhtiyaar aur quvvat hai ki badruhen us ka hukm maantee aur us kay kahenay par nikal jaatee hain?” 37aur eesa kay baaray men charcha us pooray ilaaqay men phail gaya.
bahut say mareezon kee shifaayaabee
38phir eesa ibaadatkhaanay ko chhod kar shamaaoon kay ghar gaya. vahaan shamaaoon kee saas shadeed bukhaar men mubtala thee. unhon nay eesa say guzaarish kee ki vah us kee madad karay. 39us nay us kay sirahaanay khaday ho kar bukhaar ko daanta to vah utar gaya aur shamaaoon kee saas usee vaqt uth kar un kee khidmat karnay lagee.
40jab din dhal gaya to sab maqaamee log apnay mareezon ko eesa kay paas laaay. khwaah un kee beemaariyaan kuchh bhee kyoon na theen, us nay har ek par apnay haath rakh kar usay shifa dee. 41bahuton men badruhen bhee theen jinhon nay nikaltay vaqt chilla kar kaha, “too allaah ka farzand hai.” lekin choonki vah jaantee theen ki vah maseeh hai is liyay us nay unhen daant kar bolnay na diya.
khushkhabaree har ek kay liyay hai
42jab agla din chadha to eesa shaher say nikal kar kisee veeraan jagah chala gaya. lekin hujoom usay dhoondtay dhoondtay aakhirkaar us kay paas pahuncha. log usay apnay paas say jaanay naheen dena chaahatay thay. 43lekin us nay un say kaha, “laazim hai ki main doosray shaheron men bhee ja kar allaah kee baadshaahee kee khushkhabaree sunaaoon, kyoonki mujhay isee maqsad kay liyay bheja gaya hai.”
44chunaanchay vah yahoodiya kay ibaadatkhaanon men munaadee karta raha.