Looqa 5
pahelay shaagirdon kee bulaahat
1ek din eesa galeel kee jheel gannesarat kay kinaaray par khada hujoom ko allaah ka kalaam suna raha tha. log suntay suntay itnay qareeb a gaay ki us kay liyay jagah kam ho gaee. 2phir usay do kashtiyaan nazar aaeen jo jheel kay kinaaray lagee theen. machheray un men say utar chukay thay aur ab apnay jaalon ko dho rahay thay. 3eesa ek kashtee par savaar hua. us nay kashtee kay maalik shamaaoon say darakhwaast kee ki vah kashtee ko kinaaray say thoda sa door lay chalay. phir vah kashtee men baitha aur hujoom ko taaleem denay laga.
4taaleem denay kay ikhtitaam par us nay shamaaoon say kaha, “ab kashtee ko vahaan lay ja jahaan paanee gahera hai aur apnay jaalon ko machhliyaan pakadnay kay liyay daal do.”
5lekin shamaaoon nay etiraaz kiya, “ustaad, ham nay to pooree raat badee koshish kee, lekin ek bhee na pakdee. taaham aap kay kahenay par main jaalon ko dubaara daaloonga.” 6yah kah kar unhon nay gaheray paanee men ja kar apnay jaal daal diay. aur vaaqaee, machhliyon ka itna bada ghol jaalon men phans gaya ki vah phatnay lagay. 7yah dekh kar unhon nay apnay saathiyon ko ishaara karkay bulaaya taaki vah doosree kashtee men a kar un kee madad karen. vah aaay aur sab nay mil kar donon kashtiyon ko itnee machhliyon say bhar diya ki aakhirkaar donon doobnay kay khatray men theen. 8jab shamaaoon patras nay yah sab kuchh dekha to us nay eesa kay saamnay munh kay bal gir kar kaha, “khudaavand, mujh say door chalay jaaen. main to gunaahgaar hoon.” 9kyoonki vah aur us kay saathee itnee machhliyaan pakadnay kee vajah say sakht hairaan thay. 10aur zabdee kay betay yaaqoob aur yoohanna kee haalat bhee yahee thee jo shamaaoon kay saath mil kar kaam kartay thay.
lekin eesa nay shamaaoon say kaha, “mat dar. ab say too aadmiyon ko pakda karega.”
11vah apnee kashtiyon ko kinaaray par lay aaay aur sab kuchh chhod kar eesa kay peechhay ho liyay.
kodh say shifaa
12ek din eesa kisee shaher men say guzar raha tha ki vahaan ek mareez mila jis ka poora jism kodh say mut’assir tha. jab us nay eesa ko dekha to vah munh kay bal gir pada aur iltija kee, “ai khudaavand, agar aap chaahen to mujhay paak-saaf kar saktay hain.”
13eesa nay apna haath badha kar usay chhua aur kaha, “main chaahata hoon, paak-saaf ho ja.” is par beemaaree fauran door ho gaee. 14eesa nay usay hidaayat kee ki vah kisee ko na bataaay ki kya hua hai. us nay kaha, “seedha bait-ul-muqaddas men imaam kay paas ja taaki vah tera muaaina karay. apnay saath vah qurbaanee lay ja jis ka taqaaza moosa kee shareeat un say kartee hai jinhen kodh say shifa miltee hai. yoon alaaniya tasdeeq ho jaaegee ki too vaaqaee paak-saaf ho gaya hai.”
15taaham eesa kay baaray men khabar aur ziyaada tezee say phailtee gaee. logon kay baday guroh us kay paas aatay rahay taaki us kee baaten sunen aur us kay haath say shifa paaen. 16phir bhee vah kaee baar unhen chhod kar dua karnay kay liyay veeraan jagahon par jaaya karta tha.
maflooj kay liyay chhat kholee jaatee hai
17ek din vah logon ko taaleem day raha tha. fareesee aur shareeat kay aalim bhee galeel aur yahoodiya kay har gaaon aur yarooshalam say a kar us kay paas baithay thay. aur rabb kee qudrat usay shifa denay kay liyay tahereek day rahee thee. 18itnay men kuchh aadmee ek maflooj ko chaarpaaee par daal kar vahaan pahunchay. unhon nay usay ghar kay andar eesa kay saamnay rakhnay kee koshish kee, 19lekin befaaida. ghar men itnay log thay ki andar jaana naamumkin tha. is liyay vah aakhirkaar chhat par chadh gaay aur kuchh taaylen udhed kar chhat ka ek hissa khol diya. phir unhon nay chaarpaaee ko maflooj samet hujoom kay darmiyaan eesa kay saamnay utaara. 20jab eesa nay un ka eemaan dekha to us nay maflooj say kaha, “ai aadmee, teray gunaah muaaf kar diay gaay hain.”
21yah sun kar shareeat kay aalim aur fareesee soch-bichaar men pad gaay, “yah kis tarah ka banda hai jo is qism ka kufr bakta hai? sirf allaah hee gunaah muaaf kar sakta hai.”
22lekin eesa nay jaan liya ki yah kya soch rahay hain, is liyay us nay poochha, “tum dil men is tarah kee baaten kyoon soch rahay ho? 23kya maflooj say yah kahena ziyaada aasaan hai ki ‘teray gunaah muaaf kar diay gaay hain’ ya yah ki ‘uth kar chal phir’? 24lekin main tum ko dikhaata hoon ki ibn-ay-aadam ko vaaqaee duniya men gunaah muaaf karnay ka ikhtiyaar hai.” yah kah kar vah maflooj say mukhaatib hua, “uth, apnee chaarpaaee utha kar apnay ghar chala ja.”
25logon kay dekhtay dekhtay vah aadmee khada hua aur apnee chaarpaaee utha kar allaah kee hamd-o-sana kartay huay apnay ghar chala gaya. 26yah dekh kar sab sakht hairatzada huay aur allaah kee tamjeed karnay lagay. un par khauf chha gaya aur vah kah uthay, “aaj ham nay naaqaabil-ay-yaqeen baaten dekhee hain.”
eesa mattee ko bulaata hai
27is kay baad eesa nikal kar ek taiks lenay vaalay kay paas say guzra jo apnee chaukee par baitha tha. us ka naam laavee tha. usay dekh kar eesa nay kaha, “meray peechhay ho lay.” 28vah utha aur sab kuchh chhod kar us kay peechhay ho liya.
29baad men us nay apnay ghar men eesa kee badee ziyaafat kee. bahut say taiks lenay vaalay aur deegar mehamaan is men shareek huay. 30yah dekh kar kuchh fareesiyon aur un say taalluq rakhnay vaalay shareeat kay aalimon nay eesa kay shaagirdon say shikaayat kee. unhon nay kaha, “tum taiks lenay vaalon aur gunaahgaaron kay saath kyoon khaatay-peetay ho?”
31eesa nay javaab diya, “sehatmandon ko daaktar kee zaroorat naheen hotee balki mareezon ko. 32main raastbaazon ko naheen balki gunaahgaaron ko bulaanay aaya hoon taaki vah tauba karen.”
shaagird roza kyoon naheen rakhtay?
33kuchh logon nay eesa say ek aur savaal poochha, “yaheya kay shaagird aksar roza rakhtay hain. aur saath saath vah dua bhee kartay rahetay hain. fareesiyon kay shaagird bhee isee tarah kartay hain. lekin aap kay shaagird khaanay-peenay ka silsila jaaree rakhtay hain.”
34eesa nay javaab diya, “kya tum shaadee kay mehamaanon ko roza rakhnay ko kah saktay ho jab doolha un kay darmiyaan hai? hargiz naheen! 35lekin ek din aaega jab doolha un say lay liya jaaega. us vaqt vah zaroor roza rakhengay.”
36us nay unhen yah misaal bhee dee, “kaun kisee naay libaas ko phaad kar us ka ek tukda kisee puraanay libaas men lagaaega? koee bhee naheen! agar vah aisa karay to na sirf naya libaas kharaab hoga balki us say liya gaya tukda puraanay libaas ko bhee kharaab kar dega. 37isee tarah koee bhee angoor ka taaza ras puraanee aur belachak mashkon men naheen daalega. agar vah aisa karay to puraanee mashken paida honay vaalee gais kay baais phat jaaengee. nateejay men mai aur mashken donon zaaay ho jaaengee. 38is liyay angoor ka taaza ras naee mashkon men daala jaata hai jo lachakdaar hotee hain. 39lekin jo bhee puraanee mai peena pasand karay vah angoor ka naya aur taaza ras pasand naheen karega. vah kahega ki puraanee hee behatar hai.”