Looqa 6
sabat kay baaray men savaal
1ek din eesa anaaj kay kheton men say guzar raha tha. chaltay chaltay us kay shaagird anaaj kee baalen todnay aur apnay haathon say mal kar khaanay lagay. sabat ka din tha. 2yah dekh kar kuchh fareesiyon nay kaha, “tum yah kyoon kar rahay ho? sabat kay din aisa karna mana hai.”
3eesa nay javaab diya, “kya tum nay kabhee naheen padha ki daaood nay kya kiya jab usay aur us kay saathiyon ko bhook lagee thee? 4vah allaah kay ghar men daakhil hua aur rabb kay liyay makhsoosashuda rotiyaan lay kar khaaeen, agarchi sirf imaamon ko inhen khaanay kee ijaazat hai. aur us nay apnay saathiyon ko bhee yah rotiyaan khilaaeen.” 5phir eesa nay un say kaha, “ibn-ay-aadam sabat ka maalik hai.”
sookhay haath kee shifaa
6sabat kay ek aur din eesa ibaadatkhaanay men ja kar sikhaanay laga. vahaan ek aadmee tha jis ka dahena haath sookha hua tha. 7shareeat kay aalim aur fareesee baday ghaur say dekh rahay thay ki kya eesa is aadmee ko aaj bhee shifa dega? kyoonki vah us par ilzaam lagaanay ka koee bahaana dhoond rahay thay. 8lekin eesa nay un kee soch ko jaan liya aur us sookhay haath vaalay aadmee say kaha, “uth, darmiyaan men khada ho.” chunaanchay vah aadmee khada hua. 9phir eesa nay un say poochha, “mujhay bataao, shareeat hamen sabat kay din kya karnay kee ijaazat detee hai, nek kaam karnay kee ya ghalat kaam karnay kee, kisee kee jaan bachaanay kee ya usay tabaah karnay kee?” 10vah khaamosh ho kar apnay ird-gird kay tamaam logon kee taraf dekhnay laga. phir us nay kaha, “apna haath aagay badha.” us nay aisa kiya to us ka haath bahaal ho gaya.
11lekin vah aapay men na rahay aur ek doosray say baat karnay lagay ki ham eesa say kis tarah nipat saktay hain?
eesa baarah rasoolon ko muqarrar karta hai
12un hee dinon men eesa nikal kar dua karnay kay liyay pahaad par chadh gaya. dua kartay kartay pooree raat guzar gaee. 13phir us nay apnay shaagirdon ko apnay paas bula kar un men say baarah ko chun liya, jinhen us nay apnay rasool muqarrar kiya. un kay naam yah hain : 14shamaaoon jis ka laqab us nay patras rakha, us ka bhaaee andriyaas, yaaqoob, yoohanna, filippus, baratulmaaee, 15mattee, toma, yaaqoob bin halfaee, shamaaoon mujaahid, 16yahoodaah bin yaaqoob aur yahoodaah iskariyotee jis nay baad men usay dushman kay havaalay kar diya.
eesa taaleem aur shifa deta hai
17phir vah un kay saath pahaad say utar kar ek khulay aur hamvaar maidaan men khada hua. vahaan shaagirdon kee badee taadaad nay usay gher liya. saath hee bahut say log yahoodiya, yarooshalam aur soor aur saida kay saahilee ilaaqay se 18us kee taaleem sunnay aur beemaariyon say shifa paanay kay liyay aaay thay. aur jinhen badruhen tang kar rahee theen unhen bhee shifa milee. 19tamaam log usay chhoonay kee koshish kar rahay thay, kyoonki us men say quvvat nikal kar sab ko shifa day rahee thee.
kaun mubaarak hai?
20phir eesa nay apnay shaagirdon kee taraf dekh kar kaha,
“mubaarak ho tum jo zarooratmand ho,
kyoonki allaah kee baadshaahee tum ko hee haasil hai.
21mubaarak ho tum jo is vaqt bhookay ho,
kyoonki ser ho jaaogay.
mubaarak ho tum jo is vaqt rotay ho,
kyoonki khushee say hansogay.
22mubaarak ho tum jab log is liyay tum say nafrat kartay aur tumhaara huqqa-paanee band kartay hain ki tum ibn-ay-aadam kay pairokaar ban gaay ho. haan, mubaarak ho tum jab vah isee vajah say tumhen laan-taan kartay aur tumhaaree badnaamee kartay hain. 23jab vah aisa kartay hain to shaadmaan ho kar khushee say naacho, kyoonki aasmaan par tum ko bada ajr milega. un kay baapdaada nay yahee sulook nabiyon kay saath kiya tha.
24magar tum par afsos jo ab daulatmand ho,
kyoonki tumhaara sukoon yaheen khatm ho jaaega.
25tum par afsos jo is vaqt khoob ser ho,
kyoonki baad men tum bhookay hogay.
tum par afsos jo ab hans rahay ho,
kyoonki ek vaqt aaega ki ro ro kar maatam karogay.
26tum par afsos jin kee tamaam log taareef kartay hain, kyoonki un kay baapdaada nay yahee sulook jhootay nabiyon kay saath kiya tha.
apnay dushmanon say muhabbat rakhnaa
27lekin tum ko jo sun rahay ho main yah bataata hoon, apnay dushmanon say muhabbat rakho, aur un say bhalaaee karo jo tum say nafrat kartay hain. 28jo tum par laanat kartay hain unhen barkat do, aur jo tum say bura sulook kartay hain un kay liyay dua karo. 29agar koee tumhaaray ek gaal par thappad maaray to usay doosra gaal bhee pesh kar do. isee tarah agar koee tumhaaree chaadar chheen lay to usay qamees lenay say bhee na roko. 30jo bhee tum say kuchh maangta hai usay do. aur jis nay tum say kuchh liya hai us say usay vaapas denay ka taqaaza na karo. 31logon kay saath vaisa sulook karo jaisa tum chaahatay ho ki vah tumhaaray saath karen.
32agar tum sirf un hee say muhabbat karo jo tum say kartay hain to is men tumhaaree kya khaas meharbaanee hogee? gunaahgaar bhee aisa hee kartay hain. 33aur agar tum sirf un hee say bhalaaee karo jo tum say bhalaaee kartay hain to is men tumhaaree kya khaas meharbaanee hogee? gunaahgaar bhee aisa hee kartay hain. 34isee tarah agar tum sirf un hee ko udhaar do jin kay baaray men tumhen andaaza hai ki vah vaapas kar dengay to is men tumhaaree kya khaas meharbaanee hogee? gunaahgaar bhee gunaahgaaron ko udhaar detay hain jab unhen sab kuchh vaapas milnay ka yaqeen hota hai. 35naheen, apnay dushmanon say muhabbat karo aur un hee say bhalaaee karo. unhen udhaar do jin kay baaray men tumhen vaapas milnay kee ummeed naheen hai. phir tum ko bada ajr milega aur tum allaah t’aala kay farzand saabit hogay, kyoonki vah bhee naashukron aur buray logon par nekee ka izhaar karta hai. 36laazim hai ki tum rahemdil ho kyoonki tumhaara baap bhee rahemdil hai.
munsif na bannaa
37doosron kee adaalat na karna to tumhaaree bhee adaalat naheen kee jaaegee. doosron ko mujrim qaraar na dena to tum ko bhee mujrim qaraar naheen diya jaaega. muaaf karo to tum ko bhee muaaf kar diya jaaega. 38do to tum ko bhee diya jaaega. haan, jis hisaab say tum nay diya usee hisaab say tum ko diya jaaega, balki paimaana daba daba aur hila hila kar aur labrez karkay tumhaaree jholee men daal diya jaaega. kyoonki jis paimaanay say tum naaptay ho usee say tumhaaray liyay naapa jaaega.”
39phir eesa nay yah misaal pesh kee. “kya ek andha doosray andhay kee raahanumaaee kar sakta hai? hargiz naheen! agar vah aisa karay to donon gadhay men gir jaaengay. 40shaagird apnay ustaad say bada naheen hota balki jab usay pooree trening milee ho to vah apnay ustaad hee kee maanind hoga.
41too kyoon ghaur say apnay bhaaee kee aankh men paday tinkay par nazar karta hai jabki tujhay vah shaheteer nazar naheen aata jo teree apnee aankh men hai? 42too kyoonkar apnay bhaaee say kah sakta hai, ‘bhaaee, thahero, mujhay tumhaaree aankh men pada tinka nikaalnay do’ jabki tujhay apnee aankh ka shaheteer nazar naheen aata? riyaakaar! pahelay apnee aankh kay shaheteer ko nikaal. tab hee tujhay bhaaee ka tinka saaf nazar aaega aur too usay achchhee tarah say dekh kar nikaal sakega.
darakht us kay phal say pahechaana jaata hai
43na achchha darakht kharaab phal laata hai, na kharaab darakht achchha phal. 44har qism ka darakht us kay phal say pahechaana jaata hai. khaardaar jhaadiyon say anjeer ya angoor naheen today jaatay. 45nek shakhs ka achchha phal us kay dil kay achchhay khazaanay say nikalta hai jabki buray shakhs ka kharaab phal us kay dil kee buraaee say nikalta hai. kyoonki jis cheez say dil bhara hota hai vahee chhalak kar munh say nikaltee hai.
do qism kay makaan
46tum kyoon mujhay ‘khudaavand, khudaavand’ kah kar pukaartay ho? meree baat par to tum amal naheen kartay. 47lekin main tum ko bataata hoon ki vah shakhs kis kee maanind hai jo meray paas a kar meree baat sun leta aur us par amal karta hai. 48vah us aadmee kee maanind hai jis nay apna makaan banaanay kay liyay gaheree bunyaad kee khudaaee karvaaee. khod khod kar vah chataan tak pahunch gaya. usee par us nay makaan kee bunyaad rakhee. makaan mukammal hua to ek din sailaab aaya. zor say baheta hua paanee makaan say takraaya, lekin vah usay hila na saka kyoonki vah mazbootee say banaaya gaya tha. 49lekin jo meree baat sunta aur us par amal naheen karta vah us shakhs kee maanind hai jis nay apna makaan bunyaad kay baghair zameen par hee taameer kiya. joon hee zor say baheta hua paanee us say takraaya to vah gir gaya aur saraasar tabaah ho gaya.”